«ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىن جۇزەگە اسىرۋعا جاۋاپتى پرەمەر-ءمينيستردىڭ ورىنباسارى قانات بوزىمباەۆ الداعى جۇمىستىڭ ءۇش نەگىزگى باعىتىن ايقىندادى. وڭىرلەردىڭ باسىم بولىگى جوندەۋ جۇمىستارىنا كىرىسىپ كەتتى.
دەگەنمەن، اكىمدىكتەرگە 2026 جىلدىڭ جوبالارىن ەرەكشە باقىلاۋعا الىپ، جۇمىستاردىڭ بەلگىلەنگەن مەرزىمدە اياقتالۋىن قامتاماسىز ەتۋ تاپسىرىلدى. سونىمەن بىرگە وڭىرلەر قاجەتتى پروتسەدۋرالاردى ۋاقىتىلى وتكىزىپ، كەلەسى قۇرىلىس ماۋسىمىندا جۇمىستى ءۇزىلىسسىز باستاۋ ءۇشىن 2027 جىلعا ارنالعان جوبالاردى الدىن الا دايىنداۋى ءتيىس.
تۇتىنۋشىلاردى ەسەپتەۋ قۇرالدارىمەن (ەسەپتەگىشتەرمەن) قامتاماسىز ەتۋگە بولەك كوڭىل ءبولىندى. تىكەلەي جاۋاپتى مينيسترلىكتەرگە اكىمدىكتەرمەن بىرلەسىپ، ءار ءوڭىردىڭ قاجەتتىلىگىن انىقتاۋ جانە 2029 جىلعا دەيىن ەسەپتەگىشتەردى ورناتۋدىڭ ناقتى جوسپارىن بەكىتۋ تاپسىرىلدى. قانات بوزىمباەۆتىڭ پايىمداۋىنشا، سۋ، جىلۋ جانە ەلەكتر ەنەرگياسىن تۇتىنۋدى تولىق ەسەپكە المايىنشا، كوممۋنالدىق سالانى تولىققاندى تسيفرلاندىرۋعا ءوتۋ مۇمكىن ەمەس.
تاعى ءبىر تاپسىرما كوممۋنالدىق قىزمەتتەردى تولەۋ كەزىندەگى تۇرعىن ءۇي كومەگىنە قاتىستى بولدى. ونى تاعايىنداۋ ءراسىمىن جەڭىلدەتىپ، اۆتوماتتاندىرۋ جوسپارلانۋدا. ول ءۇشىن بىرىڭعاي ەسەپ ايىرىسۋ ورتالىقتارى مەملەكەتتىك اقپاراتتىق جۇيەلەرمەن ينتەگراتسيالانۋى ءتيىس، وسىلايشا قاجەتتى مالىمەتتەر اۆتوماتتى تۇردە ءتۇسىپ، ازاماتتارعا قۇجاتتاردى قايتا جيناۋدىڭ قاجەتى بولمايدى.
