«اتامەكەن» ۇلتتىق كاسىپكەرلەر پالاتاسىنىڭ بۇرىنعى توراعاسى ابىلاي مىرزاحمەتوۆ مەرزىمىنەن بۇرىن بوستاندىققا شىقتى، دەپ حابارلايدى “ادىرنا” ءتىلشىسى.
پاۆلودار وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ مالىمەتىنشە، سوت ونى جازانىڭ وتەلمەگەن بولىگىن نەعۇرلىم جەڭىل جازا تۇرىنە اۋىستىرۋ تۋرالى شەشىمدى بيىلعى اقپان ايىندا قابىلداعان.
ۆەدومستۆونىڭ حابارلاۋىنشا، ابىلاي مىرزاحمەتوۆ جازاسىن وتەۋ بارىسىندا ءتورت مارتە كوتەرمەلەنگەن. مىنەز-قۇلقىنىڭ وڭ باعالانۋى جانە جەڭىلدەتىلگەن جاعدايدا ۇستالۋى وعان جازانىڭ وتەلمەگەن بولىگىن اۋىستىرۋ تۋرالى ءوتىنىش بەرۋگە مۇمكىندىك بەرگەن.
ءتيىستى شەشىمدى پاۆلودار وبلىستىق سوتى شىعاردى.
جازانىڭ وتەلمەگەن بولىگىندە ابىلاي مىرزاحمەتوۆ تۇرعىلىقتى جەرى بويىنشا پروباتسيالىق باقىلاۋدا بولادى. وعان تۇراقتى مەكەنجايىن وزگەرتۋگە، پروباتسيا قىزمەتىن حاباردار ەتپەي وبلىس اۋماعىنان شىعۋعا جانە ويىن-ساۋىق ورىندارىنا بارۋعا تىيىم سالىنعان.
ايتا كەتەيىك، ابىلاي مىرزاحمەتوۆ پاۆلودار وبلىسىنداعى №46 مەكەمەدە جازاسىن وتەدى. بۇعان دەيىن باس پروكۋراتۋرا تۇزەۋ مەكەمەسىندە وندىرىستىك تسەحتىڭ اشىلعانىن حابارلاعان. وندا سوتتالعاندار سپورتتىق كيىمدەر تىگىپ، اعاش جانە مەتالل بۇيىمدارىن، سونداي-اق بيگ-بەگ قاپتارىن شىعارۋمەن اينالىسقان.
پروكۋراتۋرانىڭ مالىمەتىنشە، ابىلاي مىرزاحمەتوۆ ءوندىرىستى ۇيىمداستىرۋعا قاتىسىپ، بىرنەشە تىگىن ماشيناسىن ءوز قاراجاتىنا ساتىپ العان جانە وزگە سوتتالعاندارمەن بىرگە وندىرىستە ەڭبەك ەتكەن.
ابىلاي مىرزاحمەتوۆ 2024 جىلى الاياقتىق جاساعانى ءۇشىن كىنالى دەپ تانىلىپ، سوت ۇكىمىمەن باس بوستاندىعىنان ايىرىلعان.
