«Atameken» ūlttyq käsıpkerler palatasynyŋ būrynǧy töraǧasy Abylai Myrzahmetov merzımınen būryn bostandyqqa şyqty, dep habarlaidy “Adyrna” tılşısı.
Pavlodar oblysy boiynşa Qylmystyq-atqaru jüiesı departamentınıŋ mälımetınşe, sot ony jazanyŋ ötelmegen bölıgın neǧūrlym jeŋıl jaza türıne auystyru turaly şeşımdı biylǧy aqpan aiynda qabyldaǧan.
Vedomstvonyŋ habarlauynşa, Abylai Myrzahmetov jazasyn öteu barysynda tört märte kötermelengen. Mınez-qūlqynyŋ oŋ baǧalanuy jäne jeŋıldetılgen jaǧdaida ūstaluy oǧan jazanyŋ ötelmegen bölıgın auystyru turaly ötınış beruge mümkındık bergen.
Tiıstı şeşımdı Pavlodar oblystyq soty şyǧardy.
Jazanyŋ ötelmegen bölıgınde Abylai Myrzahmetov tūrǧylyqty jerı boiynşa probasiialyq baqylauda bolady. Oǧan tūraqty mekenjaiyn özgertuge, probasiia qyzmetın habardar etpei oblys aumaǧynan şyǧuǧa jäne oiyn-sauyq oryndaryna baruǧa tyiym salynǧan.
Aita keteiık, Abylai Myrzahmetov Pavlodar oblysyndaǧy №46 mekemede jazasyn ötedı. Būǧan deiın Bas prokuratura tüzeu mekemesınde öndırıstık sehtyŋ aşylǧanyn habarlaǧan. Onda sottalǧandar sporttyq kiımder tıgıp, aǧaş jäne metall būiymdaryn, sondai-aq big-beg qaptaryn şyǧarumen ainalysqan.
Prokuraturanyŋ mälımetınşe, Abylai Myrzahmetov öndırıstı ūiymdastyruǧa qatysyp, bırneşe tıgın maşinasyn öz qarajatyna satyp alǧan jäne özge sottalǧandarmen bırge öndırıste eŋbek etken.
Abylai Myrzahmetov 2024 jyly alaiaqtyq jasaǧany üşın kınälı dep tanylyp, sot ükımımen bas bostandyǧynan aiyrylǧan.
