جاپونيانىڭ وڭتۇستىگىندەگى كۋماموتو پرەفەكتۋراسىندا ماگنيتۋداسى 7,1 بولاتىن كۇشتى جەر سىلكىنىسى تىركەلدى، دەپ حابارلايدى "ادىرنا" ۇلتتىق پورتالى.
تابيعي اپات سالدارىنان مىڭداعان تۇرعىن جارىقسىز قالىپ، جولدار مەن كوپىرلەر زاقىمداندى، كەمىندە 50 ادام جاراقات الدى. جەر سىلكىنىسى جەرگىلىكتى ۋاقىت بويىنشا ساعات 16:27-دە كيۋسيۋ ارالىنىڭ اۋماعىندا بولدى. وسىعان بايلانىستى 150 مىڭنان استام تۇرعىنعا ەۆاكۋاتسيالىق پۋنكتتەرگە كوشۋ تۋرالى نۇسقاۋ بەرىلدى.
باستاپقىدا تسۋنامي قاۋپىنە بايلانىستى ەسكەرتۋ جاريالانعانىمەن، ءبىر ساعاتتان كەيىن ونىڭ كۇشى جويىلدى.
جاپونيانىڭ پرەمەر-ءمينيسترى ساناە تاكايچي قازىرگى ۋاقىتتا ادام شىعىنى مەن كەلتىرىلگەن زالالدىڭ ناقتى كولەمى انىقتالىپ جاتقانىن حابارلادى.
«قازىر جارالانعاندار تۋرالى اقپارات كەلىپ تۇسۋدە. بىرقاتار اۋداندا ەلەكتر قۋاتى ءوشىپ، ورتتەر تىركەلدى. سونداي-اق جولدار مەن كوپىرلەر زاقىمدانىپ، كەيبىر عيماراتتار قۇلادى»، – دەدى ۇكىمەت باسشىسى.
جاپونيانىڭ NHK تەلەارناسىنىڭ مالىمەتىنشە، اۋرۋحانالاردىڭ بىرىنە 50-دەن استام زارداپ شەككەن ادام جەتكىزىلگەن. سونىمەن قاتار جوعارى جىلدامدىقتى پويىزدا بولعان بىرنەشە ادامنىڭ جاراقات العانى حابارلاندى.
تابيعي اپات سالدارىنان نەگىزگى اۆتوجولداردا، ونىڭ ىشىندە جول وتكەلدەرىندە ءىرى جارىقتار پايدا بولعان. جۇك پويىزى رەلستەن شىعىپ كەتكەن. تەمىرجول قاتىناسى ۋاقىتشا توقتاتىلىپ، بىرقاتار اۋە رەيسى كەيىنگە قالدىرىلدى.
