ۇلتتىق ۇلاننىڭ 5571 اسكەري ءبولىمىنىڭ سەرجانتى دامير ناعاليەۆ اكەسىنە بەرگەن ۋادەسىن ورىنداۋ ءۇشىن ۆەلوسيپەدپەن 900 شاقىرىمنان استام جولدى ءجۇرىپ ءوتتى. بۇل ساپار – تەك سپورتتىق جەتىستىك ەمەس، اكە اماناتىنا دەگەن ادالدىقتىڭ، وتباسى قۇندىلىعىنا دەگەن قۇرمەتتىڭ جانە اسكەري قىزمەتشىگە ءتان تاباندىلىقتىڭ جارقىن كورىنىسى.
كەڭەس وداعىنىڭ باتىرى، گۆارديا پولكوۆنيگى باۋىرجان مومىشۇلى اتىنداعى 5571 اسكەري بولىمىندە قىزمەت ەتەتىن سەرجانت دامير ناعاليەۆ كوپتەن بەرى اكەسىنىڭ ارمانىن جۇزەگە اسىرۋدى ماقسات ەتكەن. اكەسى كەزىندە جەتىسايدان ساقانعا دەيىن ۆەلوسيپەدپەن ساپار شەگۋدى ارمانداعان، بىراق ورىنداۋعا مۇمكىندىك بولماعان.
وسى ارماندى اكە اماناتى رەتىندە قابىلداعان اسكەري قىزمەتشى ەڭبەك دەمالىسىن تولىقتاي وسى ماقساتقا ارنادى. ول الماتى قالاسىنان جەتىسايعا دەيىن 900 شاقىرىمنان استام قاشىقتىقتى سەگىز كۇن ىشىندە ۆەلوسيپەدپەن ەڭسەردى.
- اكەمدى رايىنان قايتارىپ الدىمەن بۇل جولدىڭ قانشالىقتى قيىن ەكەنىن ءوزىم كورىپ، بىلگىم كەلدى. سول سەبەپتى ەڭ الدىمەن ءوزىم ءجۇرىپ ءوتۋدى ءجون كوردىم. اكەمنەن رۇقسات الىپ، دەمالىسقا شىعار الدىندا ۆەلوسيپەد ساتىپ الدىم. 1 شىلدە كۇنى تۇنگى ساعات 02:00-دە ەشقانداي دايىندىقسىز جولعا شىقتىم، - دەيدى دامير ناعاليەۆ.
ساپار بارىسىندا ۇلاندىق جاۋىنگەر جاۋىن-شاشىنعا، قاتتى جەلگە جانە كۇردەلى اسۋلارعا قاراماستان دىتتەگەن جەرىنە امان-ەسەن جەتتى. ەڭ ۇزاق كۇندىك ءجۇرىسى – 230 شاقىرىمدى قۇراعان.
ءداميردىڭ ايتۋىنشا، اسكەري قىزمەتتە قالىپتاسقان ءتارتىپ، توزىمدىلىك پەن جاۋاپكەرشىلىك، سونداي-اق وتباسى مەن ارىپتەستەرىنىڭ قولداۋى بارلىق قيىندىقتى ەڭسەرۋگە كۇش بەرگەن.
بۇل ساپار – تەك ۇزاق قاشىقتىقتى باعىندىرۋ ەمەس. بۇل - اكە اماناتىنا دەگەن قۇرمەتتىڭ، بەرىلگەن ۋادەگە ادالدىقتىڭ جانە اسكەري قىزمەتشى رۋحىنىڭ ايقىن ۇلگىسى. وسىنداي ونەگەلى ءىس جاستارعا وتانسۇيگىشتىك پەن وتباسىلىق قۇندىلىقتاردىڭ ماڭىزىن دارىپتەيدى
