بوكستان وليمپيادا چەمپيونى دانيار ەلەۋسىنوۆ 20 تاۋلىك اكىمشىلىك قاماۋدان كەيىن بوستاندىققا شىقتى، دەپ حابارلايدى "ادىرنا" ءتىلشىسى Tengrinews-كە سىلتەپ.
28 شىلدە كەشىندە سپورتشىنى اكىمشىلىك قاماۋداعىلارعا ارنالعان ارنايى قابىلداۋ ورنىنىڭ الدىندا جۇبايى مەن دوستارى قارسى الدى. جۋرناليستەردىڭ سۇراعىنا جاۋاپ بەرگەن دانيار ەلەۋسىنوۆ بولعان وقيعاعا وكىنىش ءبىلدىردى.
"وقيعاعا قاتىستى... بولعان جاعداي بولدى، ءبارىڭىز كوردىڭىزدەر. سول ءۇشىن قاتتى وكىنەمىن", – دەدى سپورتشى.
وسىدان كەيىن ول جاقىندارىنىڭ سۇيەمەلدەۋىمەن كولىككە وتىرىپ، وقيعا ورنىنان كەتىپ قالدى.
ەسكە سالايىق، دانيار ەلەۋسىنوۆ 9 شىلدەدە ماس كۇيىندە كولىك جۇرگىزىپ، جول-كولىك وقيعاسىن جاساعانى ءۇشىن ۇستالعان. استانا قالاسىنىڭ اكىمشىلىك سوتى ونى 20 تاۋلىككە اكىمشىلىك قاماۋعا الىپ، 7 جىلعا كولىك باسقارۋ قۇقىعىنان ايىرعان.
