ريو وليمپياداسىنىڭ چەمپيونى دانيار ەلەۋسىنوۆ اكتەر ءارى فايتەر ەركەبۇلان توقتارعا ءۇن قاتىپ، جەكپە-جەككە شاقىردى، دەپ جازادى "ادىرنا".
بۇل تۋرالى ەركەبۇلان توقتار الەۋمەتتىك جەلىدەگى پاراقشاسىندا ايتتى.
اكتەردىڭ سوزىنشە، دانيار ەلەۋسىنوۆ ونىڭ سۋرەتىن جاريالاپ، وليمپيادا چەمپيوندارىن تومەن سانايتىن ادام رەتىندە سيپاتتاعان. وسىدان كەيىن ەركەبۇلان توقتار بوكسشىنىڭ جازباسىنا تاڭعالعانىن ايتىپ، ءوزىنىڭ سۇحباتتارىندا وليمپيادا چەمپيوندارىنا قاتىستى تەرىس پىكىر بىلدىرمەگەنىن مالىمدەدى.
«مەن بۇل اعامىزعا نە ىستەپ قويعانىمدى بىلمەيمىن. سۇحباتتارىمدا وليمپيادا چەمپيوندارىنا ءتىل تيگىزگەن ەمەسپىن. مۇمكىن، مەنى موتيۆاتورمەن شاتاستىرىپ العان شىعار. ول كىسى – وليمپيادا چەمپيونى. مەنىڭ دەڭگەيىمە ءتۇسىپ، مەنىمەن قولعاپ ءتۇيىستىرىپ، ءوز دەڭگەيىن تۇسىرەتىن ادام ەمەس ەدى»، – دەدى اكتەر.
سونىمەن قاتار ەركەبۇلان توقتار دانيار ەلەۋسىنوۆپەن جەكپە-جەك وتكىزۋگە دايىن ەكەنىن جەتكىزدى. الايدا كەزدەسۋدىڭ رەسمي تۇردە ۇيىمداستىرىلعانىن قالايتىنىن ايتتى.
«ەگەر مەنى ۇرعىسى كەلسە، «رۋح بوكسينگكە» كەلىپ جۇدىرىقتاسساق بولادى. وليمپيادا چەمپيونى، قازاق اعامنان ۇتىلۋ مەن ءۇشىن ۇيات ەمەس. ال ەگەر حالىقتىڭ الدىندا ۇرعىسى كەلسە، وندا پروموۋتەرلەرگە گونورار، اقشاسىن تولەتىپ، رەسمي تۇردە جەكپە-جەك ۇيىمداستىرسىن. اقشاسىن تولەسە، مەن شىعىپ بەرەمىن. ونداي جاعدايدا شىعۋعا دايىنمىن جانە بارىنشا لايىقتى ونەر كورسەتۋگە تىرىسامىن»، – دەدى ول.
اكتەر بۇل جاعدايدى تۇسىنىسپەۋشىلىك بولۋى مۇمكىن دەپ سانايتىنىن ايتىپ، وقىرماندارىنان وسى جاعدايعا قاتىستى پىكىر ءبىلدىرۋدى سۇرادى.
