بۇگىن، 29 شىلدەدە «قازاقستان» رەسپۋبليكالىق تەلەراديوكورپوراتسياسىنىڭ ۇيىمداستىرۋىمەن قۇرىلتاي سايلاۋىنا قاتىساتىن ساياسي پارتيالار اراسىندا ۇلتتىق تەلەدەبات وتەدى، دەپ حابارلايدى «ادىرنا» ءتىلشىسى.
بيىل پىكىرسايىس «قازاقستاننىڭ بولاشاعى – ادام كاپيتالى» تاقىرىبىنا ارنالادى. تەلەدەبات الاڭىندا جەتى ساياسي پارتيانىڭ وكىلدەرى باس قوسىپ، وزدەرىنىڭ سايلاۋالدى باعدارلامالارىن تانىستىرىپ، ەل دامۋىنىڭ نەگىزگى باعىتتارى بويىنشا ۇستانىمدارىن ورتاعا سالادى.
پىكىرسايىس بارىسىندا كورەرمەندەردىڭ ساۋالدارى مەن ۇسىنىستارىن قابىلداۋ ءۇشىن ارنايى بايلانىس ورتالىعى جۇمىس ىستەيدى. WhatsApp پەن الەۋمەتتىك جەلىلەر ارقىلى جولدانعان سۇراقتار تىكەلەي ەفيردە قاتىسۋشىلارعا قويىلادى.
«Qazaqstan» ۇلتتىق تەلەارناسىنىڭ ديرەكتورى جالعاس سادىبەكۇلىنىڭ ايتۋىنشا، بيىلعى ۇلتتىق دەبات بۇرىنعى فورماتتاردان بىرقاتار جاڭاشىلدىعىمەن ەرەكشەلەنەدى.
«ساياسي پارتيا وكىلدەرى برەندتەلگەن اۆتوبۋستارمەن كەلەدى. مۇنداي تاجىريبە الەمنىڭ بىرقاتار ەلدەرىندە قولدانىلعانىمەن، ەلىمىزدە العاش رەت ەنگىزىلىپ وتىر. سول ارقىلى قوعامنىڭ ساياسي ۇدەرىسكە قىزىعۋشىلىعىن ارتتىرۋدى كوزدەپ وتىرمىز. بۇدان بولەك تەلەدەبات باستالار الدىندا پارتيا وكىلدەرى ەتيكا حارتياسىنا قول قويادى. سول ارقىلى زاڭ تالاپتارىنىڭ ساقتالۋىنا، قارسىلاسقا قۇرمەتپەن قاراۋعا، جالعان اقپارات تاراتپاۋعا مىندەتتەلەدى. وعان قوسا پارتيالاردىڭ سويلەۋ كەزەگى راندومايزەر ارقىلى انىقتالادى. ياعني، ەشبىر تاراپقا ارتىقشىلىق بەرىلمەيدى، بارلىعى كەزدەيسوق ساندار ارقىلى رەتتەلەدى. وسى ارقىلى ءبىز ساياسي دودانىڭ ءادىل ءارى اشىق ءوتۋىن قامتاماسىز ەتەمىز»،– دەدى ول.
ۇلتتىق تەلەدەبات ساعات 19:25-تە «Qazaqstan» ۇلتتىق تەلەارناسىنان جانە ارنانىڭ الەۋمەتتىك جەلىلەردەگى رەسمي پاراقشالارىندا تىكەلەي ەفيردە كورسەتىلەدى.
