الەمگە ايگىلى سۋداعى «F1H2O» سايىسى الداعى 5 جىل بويى قاپشاعاي سۋ قويماسىندا ءوتۋى مۇمكىن. حالىقارالىق سايىستىڭ ۇيىمداستىرۋشىلارى ارنايى الماتى وبلىسىنا كەلىپ، ءوڭىر باسشىسى مارات سۇلتانعازيەۆپەن كەزدەستى. جيىندا الەمدىك F1H2O ۇيىمى، iHolding كومپانياسى جانە ساۋد ارابياسىنان كەلگەن رەسمي دەلەگاتسيا وكىلدەرى مەن الماتى وبلىسىنىڭ اكىمى 2027 جىلعى الەم چەمپيوناتىن قوناەۆ قالاسىندا وتكىزۋ تۋرالى كەلىسىمگە قول قويدى، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.
قازاقستان – بۇل الەم چەمپيوناتىن قابىلدايتىن التىنشى مەملەكەت. جارىسقا شەتەلدەن كەمىندە 5 مىڭ قوناق كەلەدى دەپ كۇتىلۋدە. جەرگىلىكتى تۇرعىندار مەن تۋريستەردى قوسقاندا ولاردىڭ سانى تىپتەن ارتادى. سونداي-اق سۋ بەتىندەگى شەبەرلىك پەن جىلدامدىقتى جاقسى كورەتىن 1 ميللياردقا جۋىق كورەرمەن جارىستى تىكەلەي ەفيردەن تاماشالايدى دەپ كۇتىلۋدە.
«ساۋد ارابياسى سپورت سالاسىندا الەمدەگى ەڭ ۇزدىك جوبالاردى ىسكە اسىرىپ كەلەدى. بۇل بەلسەندى دەمالىستى دامىتىپ، سالاۋاتتى ءومىر سالتىن ساقتاۋعا سەپتىگىن تيگىزەدى. جىل سايىن قاپشاعاي سۋ قويماسىندا «Tengri ultra» مارافونى مەن «Oceanman» اشىق سۋدا ءجۇزۋ جارىسى وتكىزىلەدى. ودان بولەك رەسپۋبليكالىق دەڭگەيدەگى ءتۇرلى سايىستار ۇيىمداستىرىلادى. مۇنداي حالىقارالىق شارالار ءتۋريزمدى دامىتىپ، ءوڭىردىڭ وركەندەۋىنە جول اشادى. سوندىقتان ءبىز بۇل جوبانى بىرلەسىپ ىسكە اسىرۋعا دايىنبىز»، – دەدى مارات ەلەۋسىزۇلى.
KSA ProMediaPortal جانە F1H2O ۇيىمدارىنىڭ وكىلى ءارى باسقارما توراعاسى ياسسەر ءالي ءال-يامي قازىرگى تاڭدا چەمپيوناتقا 11 مەملەكەت قاتىساتىنىن ايتتى. بۇل تالابى جوعارى كۇردەلى جارىس بولعاندىقتان، مۇندا ارنايى دايىندىقتان وتكەن كوماندالار عانا باق سىناي الادى. چەمپيونات بارىسىندا كورەرمەننىڭ قاۋىپسىزدىگى تولىق قامتاماسىز ەتىلەدى. VIP-ايماقتار، جارىستى باسقارۋ ورتالىعى، كوماندالاردىڭ دايىندىعىنا ارنالعان اۋماق جانە مەديا ورتالىق قاراستىرىلادى. سونداي-اق وتباسىلىق دەمالىسقا ارنالعان ورىندار دا قۇرىلادى. وندا ەلىمىزدىڭ مادەنيەتى تانىستىرىلىپ، ۇلتتىق تاعامدار مەن كادەسىيلار ۇسىنىلادى. سپورت سايىسىنان بولەك ءتۇرلى مەرەكەلىك ءىس-شارالار جانكۇيەرلەر كوڭىلىن كوتەرەدى. جارىستىڭ جابىلۋ سالتاناتىندا اۋقىمدى گالا-كونتسەرت وتكىزىلىپ، وندا الەمگە تانىمال جۇلدىزدار ونەر كورسەتەدى.
«بۇگىندە ساۋد ارابياسى مەن قازاقستان اراسىندا بەرىك ىنتىماقتاستىق ورناعان. ءبىز الماتى وبلىسىنىڭ دامۋ كورسەتكىشتەرىن زەرتتەپ، ونىڭ بولاشاعى زور ەكەنىن كوردىك. الداعى ۋاقىتتا بۇل ايماق حالىقارالىق بيزنەس ورتالىعىنا اينالادى دەپ سەنەمىز»، – دەدى باسقارما توراعاسى ياسسەر ءالي ءال-يامي.
دەمەك، الداعى 5 جىلدا الماتى وبلىسىنا الەمنىڭ تۇكپىر-تۇكپىرىنەن سپورتسۇيەر جانكۇيەر اعىلىپ، قوناەۆ تۋريستەر تولاسسىز كەلەتىن ورتالىققا اينالادى. چەمپيونات ەلىمىزدى دۇنيەجۇزىنە تانىتىپ، ونىڭ كوركەم تابيعاتى مەن مۇمكىندىكتەرىن الەمگە ايگىلەيدى. وڭىرگە ينۆەستيتسيا تارتۋعا، ينفراقۇرىلىمىن جاقسارتۋعا جانە ەكونوميكانى ىلگەرىلەتۋگە دە زور ىقپال ەتەدى.
