تۇرعىن ءۇي كەزەگىندە ۇزاق جىل بويى تۇرعان ساتباەۆ قالاسىنىڭ 30 وتباسى بۇگىن قونىس تويىن تويلادى.
قۇرىلىسى ەندى اياقتالعان جاڭا تۇرعىن ۇيلەردىڭ پاتەر كىلتتەرى حالىقتىڭ الەۋمەتتىك وسال توپتارى مەن وزگە دە ارنايى ساناتتار بويىنشا كەزەكتە تۇرعان ازاماتتارعا تابىستالدى. جالپى، بيىل جىل سوڭىنا دەيىن ۇلىتاۋ وبلىسىندا 900-گە جۋىق وتباسى باسپانالى بولادى دەپ جوسپارلانىپ وتىر.
جاڭا پاتەرلەردىڭ كىلتىن قالا اكىمى مۇرات بورىباەۆ سالتاناتتى تۇردە تابىستاپ، قونىس يەلەرىن قۋانىشتارىمەن قۇتتىقتادى.
«وزدەرىڭىز بىلەتىندەي، مامىر ايىندا دا 30 وتباسىنىڭ جاڭا باسپاناعا قول جەتكىزگەن قۋانىشىنا ورتاق بولعان ەدىك. بۇگىن سول يگى ءىستىڭ جالعاسى رەتىندە تاعى بىرقاتار وتباسىن قونىس تويىمەن قۇتتىقتاپ وتىرمىز. قالامىزداعى تۇرعىن ءۇي قورىن جاڭعىرتۋ جانە تۇرعىنداردى باسپانامەن قامتاماسىز ەتۋ باعىتىنداعى جۇمىستار الداعى ۋاقىتتا دا جۇيەلى تۇردە جالعاسادى»، – دەدى ساتباەۆ قالاسىنىڭ اكىمى مۇرات بورىباەۆ.
«بۇگىن مەنىڭ وتباسىم ءۇشىن ەرەكشە، قۋانىشتى كۇن بولدى. 2014 جىلدان بەرى تۇرعىن ءۇي كەزەگىندە تۇرىپ، كوپتەن كۇتكەن باسپاناما قول جەتكىزدىم.
وسى ۋاقىت ىشىندە ارمانىمىزدىڭ ورىندالۋىن كۇتتىك. بۇگىن مىنە، ءوز ءۇيىمىزدىڭ كىلتىن الىپ، ۇلكەن قۋانىشقا بولەنىپ وتىرمىز.
وسىنداي مۇمكىندىك جاساپ، قولداۋ كورسەتكەن قالا باسشىلىعىنا، مەملەكەتىمىزگە العىسىمدى بىلدىرەمىن. جاڭا شاڭىراعىمىز قۇت-بەرەكەگە تولىپ، ءار وتباسى وسىنداي قۋانىشقا جەتسىن!»، - دەدى جاڭا پاتەر يەسى بەكزات بالگاباەۆا.
بۇل – مەن ءۇشىن كوپتەن كۇتكەن ەرەكشە قۋانىش. بۇگىنگى قۋانىشىمدى سوزبەن جەتكىزۋ قيىن، قاتتى تولقىپ تۇرمىن. 2014 جىلدان بەرى تۇرعىن ءۇي كەزەگىندە تۇردىم. وسى جىلدار بويى ءوز باسپانام بولسا ەكەن دەپ ارماندادىم. كەشە پاتەر كىلتىن الاتىنىمدى ەستىگەندە ەرەكشە قۋانىپ، كوپتەن كۇتكەن ارمانىمنىڭ ورىندالعانىنا سەنە الماي تۇردىم. ءوزىم ءىى توپتاعى مۇگەدەكپىن. بۇگىن ەكى بولمەلى جاڭا پاتەردىڭ كىلتىن الىپ، ۇلكەن باقىتقا كەنەلىپ وتىرمىن. بۇل – مەن ءۇشىن عانا ەمەس، جاقىندارىم ءۇشىن دە ۇلكەن قۋانىش. وسىنداي مۇمكىندىك جاساپ، بىزگە قولداۋ كورسەتكەن مەملەكەتكە، وبلىس جانە قالا باسشىلىعىنا شىنايى ريزاشىلىعىمدى بىلدىرەمىن. بارشا باسپانا كەزەگىندە تۇرعان ازاماتتارعا وسىنداي قۋانىشتى كۇن تەزىرەك بۇيىرسىن. جاڭا شاڭىراعىمىز قۇت-بەرەكەگە، باق-بەرەكەگە تولى بولسىن»، – دەدى جاڭا پاتەر يەسى ءبىرجان كوجاگۋلوۆ.
اتالعان جوبا ۇلىتاۋ وبلىسى اكىمدىگى مەن وتباسى بانك اراسىنداعى ىنتىماقتاستىق تۋرالى كەلىسىم اياسىندا جۇزەگە اسىرىلۋدا.
ايتا كەتەيىك، وبلىس قۇرىلعان ساتتەن باستاپ، وڭىردە 400 مىڭ شارشى مەترگە جۋىق تۇرعىن ءۇي پايدالانۋعا بەرىلسە، بيىل 73 مىڭ شارشى مەتر باسپانانىڭ قۇرىلىسى اياقتالادى دەپ كۇتىلۋدە.
