گولليۆۋد اكتەرى لەوناردو دي كاپريو مەن كاسىپكەر دجەفف بەزوستىڭ قورلارى سيرەك كەزدەسەتىن 100 جانۋار ءتۇرىن قالپىنا كەلتىرۋگە باعىتتالعان جوبانى ىسكە قوستى. بۇل تۋرالى Independent جازدى، دەپ حابارلايدى «ادىرنا» ءتىلشىسى.
اڭگىمە دي كاپريو نەگىزىن قالاعان ءارى قارجىلاندىراتىن «Re:wild» قورى مەن بەزوستىڭ «Bezos Earth Fund « قورى جۇزەگە اسىرىپ جاتقان Phoenix Species Project باعدارلاماسى تۋرالى بولىپ وتىر. بۇل – اتالعان قورلار تاريحىنداعى جويىلىپ كەتۋ قاۋپى تونگەن تۇرلەردى ساقتاپ قالۋعا عانا باعىتتالعان ەڭ ءىرى جوبا.
جوبانىڭ يدەياسىن لەوناردو دي كاپريو بىرنەشە جىل بويى ازىرلەگەن. كەيىن باستاماعا دجەفف بەزوس پەن ونىڭ جۇبايى لورەن سانچەس بەزوس قوسىلعان. جەرگىلىكتى بيلىك وكىلدەرى، ەكولوگتار جانە بايىرعى حالىقتارمەن بىرلەسىپ، قور ماماندارى التىن باستى سيفاكا (ماداگاسكار), سولتۇستىك كارولينا سالاماندراسى، ۆيساي سۇيەلدى قابانى (فيليپپين), كوسۋمەل ارالىنىڭ تىشقانى، قىزعىلت قۇرلىقتىق يگۋانا (گالاپاگوس ارالدارى), اتتەنبورونىڭ ۇزىن تۇمسىقتى ەحيدناسى (جاڭا گۆينەيا) جانە باسقا دا سيرەك تۇرلەردىڭ سانىن قالپىنا كەلتىرۋ جوسپارىن ازىرلەگەن.
«جوبانىڭ ماقساتى – جەكەلەگەن جانۋار تۇرلەرىن ساقتاپ قالۋمەن شەكتەلمەي، بۇعان دەيىن شاعىن بيۋدجەتپەن جۇمىس ىستەپ كەلگەن جەرگىلىكتى تابيعاتتى قورعاۋ باستامالارىنا ۇزاق مەرزىمدى قولداۋ كورسەتۋ»،– دەپ جازدى باسىلىم.
