قازاقستاندا شەتەلدەن اۆتوكولىك اكەلۋ ءتارتىبى قاتاڭداتىلۋى مۇمكىن، دەپ حابارلايدى "ادىرنا" ءتىلشىسى.
بيلىك ءرولى وڭ جاقتان سول جاققا اۋىستىرىلعان كولىكتەردى ەلگە اكەلۋگە بايلانىستى شەكتەۋ ەنگىزۋدى جانە SOS باتىرماسىنىڭ جۇمىسىن بەينەجازبا ارقىلى تەكسەرۋدى جوسپارلاپ وتىر.
پرەمەر-مينيستر بيىل ماۋسىمدا 1 قىركۇيەكتەن باستاپ اۆتوكولىك يمپورتىن قيىنداتاتىن شارالار ازىرلەۋدى تاپسىرعان. 4 تامىزدا ساۋدا جانە ينتەگراتسيا ءمينيسترى ارمان شاققاليەۆ بريفينگ بارىسىندا كولىك قۇرالى كونسترۋكتسياسىنىڭ قاۋىپسىزدىگىن راستايتىن كۋالىكتەردى زاڭسىز راسىمدەۋگە جول بەرمەۋ شارالارى ازىرلەنىپ جاتقانىن حابارلادى.
وسى ماقساتتا ساۋدا جانە ينتەگراتسيا مينيسترلىگى شىلدە ايىندا سايكەستىكتى باعالاۋ قاعيدالارىنا وزگەرىستەر ەنگىزۋ جوباسىن ازىرلەدى. قۇجات قوعامدىق تالقىلاۋدان ءوتىپ، قازىرگى ۋاقىتتا ادىلەت مينيسترلىگىنىڭ قاراۋىندا.
ۇسىنىلىپ وتىرعان وزگەرىستەرگە سايكەس، ءرولى وڭ جاقتان سول جاققا اۋىستىرىلىپ، كولىك قۇرىلىمىنا وزگەرىس ەنگىزىلگەن اۆتوموبيلدەرگە كولىك قۇرالى كونسترۋكتسياسىنىڭ قاۋىپسىزدىگىن راستايتىن كۋالىك بەرۋگە تىيىم سالىنۋى مۇمكىن.
سونىمەن قاتار كولىكتەردى سايكەستىكتى باعالاۋ كەزىندە ساراپتاما جۇرگىزۋدىڭ جاڭا ءتارتىبى ەنگىزىلەدى. اككرەديتتەلگەن زەرتحانا ماماندارى ءاۆتوموبيلدى سىناۋ بارىسىندا ونىڭ سايكەستەندىرۋ ءنومىرىن جانە جەدەل قىزمەت شاقىرۋ قۇرىلعىسىنىڭ جۇمىسىن ۇزدىكسىز بەينەجازباعا تۇسىرۋگە ءتيىس.
تەكسەرۋ كەزىندە مامان كولىكتىڭ وتالدىرۋ جۇيەسىن قوسىپ، SOS باتىرماسىنداعى ينديكاتورلاردىڭ جانۋىن تەكسەرەدى. ودان كەيىن باتىرمانى باسىپ، جەدەل قىزمەت وپەراتورىنىڭ جاۋابىن كۇتەدى. قوڭىراۋ بارىسىندا كولىكتىڭ ماركاسى، مودەلى مەن ءتۇسى تۋرالى اقپارات بەرىلەدى.
وپەراتور الىنعان مالىمەتتەردى سالىستىرىپ، تەكسەرۋ ناتيجەسىن حابارلايدى. مۇنداي بەينەجازبالار كەمىندە ءۇش جىل ساقتالۋى كەرەك.
مينيسترلىك بۇل تالاپتار سايكەستىكتى باعالاۋ راسىمىنەن وتپەي، كولىك قۇرالىنىڭ قاۋىپسىزدىگىن راستايتىن قۇجاتتاردى زاڭسىز راسىمدەۋدىڭ الدىن الۋعا مۇمكىندىك بەرەتىنىن اتاپ ءوتتى.
بۇدان بولەك، قۇجاتتا كولىك قۇرالى كونسترۋكتسياسىنىڭ قاۋىپسىزدىگىن راستايتىن كۋالىكتىڭ قولدانىلۋىن توقتاتۋ نەمەسە ۋاقىتشا توقتاتۋ نەگىزدەرى مەن ءتيىستى راسىمدەر دە قاراستىرىلعان.
