اقتوبەدە جەرگىلىكتى تۇرعىن جول ۇستىندە «شوۋ» ۇيىمداستىرعانى ءۇشىن بىردەن 14 اكىمشىلىك ايىپپۇل ارقالادى. بۇل تۋرالى وبلىستىق پوليتسيا دەپارتامەنتى جازدى، دەپ حابارلايدى «ادىرنا» ءتىلشىسى.
پد تاراتقان ۆيدەودا جۇرگىزۋشى ءوزىن «جەرگىلىكتى ايعىرمىن» دەپ تانىستىرعان.
«الەۋمەتتىك جەلىلەرگە جۇرگىزىلگەن مونيتورينگ بارىسىندا پوليتسيا قىزمەتكەرلەرى جاس جىگىتتىڭ كولىك باسقارۋ كەزىندە ورەسكەل جول ەرەجەلەرىن بۇزعان بەينەجازباسىن انىقتادى. اقتوبە قالاسىنداعى باستى داڭعىلداردىڭ بىرىندە جۇرگىزۋشى جول قوزعالىسىنىڭ باسقا قاتىسۋشىلارىنا قاۋىپ توندىرە وتىرىپ، جول قوزعالىسى ەرەجەلەرىن قاساقانا بۇزعان. ونىڭ ۇستىنە ءوز ارەكەتىن بەينەكامەراعا ءتۇسىرىپ، كەيىن الەۋمەتتىك جەلىلەردە جاريالاعان. شاماسى، جۇرگىزۋشى لايك پەن قارالىم جيناۋدى كوزدەگەن. الايدا الەۋمەتتىك جەلىدەگى تانىمالدىقتىڭ ورنىنا پوليتسيا قىزمەتكەرلەرىنىڭ شىنايى نازارىنا ىلىكتى. قۇقىق بۇزۋشىنىڭ جەكە باسى انىقتالىپ، جاس جىگىت پوليتسيا بولىمىنە جەتكىزىلدى. تەكسەرۋ ناتيجەسىندە جول قوزعالىسى ەرەجەلەرىن بۇزعانى ءۇشىن وعان قاتىستى 14 اكىمشىلىك حاتتاما تولتىرىلدى»،— دەلىنگەن حابارلامادا.
كولىك ارنايى ايىپ تۇراعىنا قويىلعان.
