قوستاناي قالاسىنىڭ №2 سوتى اقشا ءۇشىن ادامدى سوققىعا جىققان ەر ادامعا قاتىستى ۇكىم شىعاردى، دەپ حابارلايدى "ادىرنا" ۇلتتىق پورتالى.
سوت ونى اسا قاتىگەزدىكپەن كۇش قولدانىپ، جابىرلەنۋشىگە ءتان ازابىن كەلتىرگەنى ءۇشىن كىنالى دەپ تانىپ، ءتورت جىلعا باس بوستاندىعىنان ايىردى.
سوت ماتەريالدارىنا سايكەس، سوتتالعان ازامات Telegram مەسسەندجەرى ارقىلى زاڭسىز اقشا تابۋدىڭ جولىن ىزدەپ، ادامدارعا كۇش قولدانۋ جونىندەگى تاپسىرىستاردى ورىنداۋعا كەلىسكەن.
2026 جىلدىڭ ناۋرىز ايىنىڭ سوڭىندا وعان بەلگىسىز ادام حابارلاسىپ، ك. ەسىمدى ازاماتتى تاۋىپ، ونى ۇرىپ-سوعۋدى تاپسىرعان. بۇل جۇمىسى ءۇشىن وعان 100-200 دوللار كولەمىندە سىياقى ۋادە ەتىلگەن.
تەرگەۋ مالىمەتىنشە، سوتتالعان ازامات بىرنەشە اداممەن الدىن الا كەلىسىپ، جابىرلەنۋشىنىڭ جۇرگەن جەرىن انىقتاعان. كەيىن ولار ك. ەسىمدى ازاماتتى قولدارىمەن جانە اياقتارىمەن باسىنان جانە دەنەسىنەن بىرنەشە رەت ۇرعان. تاپسىرمانى ورىنداعاننان كەيىن سوتتالعان ازاماتقا 100 دوللار بەرىلگەن.
سوت وتىرىسىندا مەملەكەتتىك ايىپتاۋشى سوتتالۋشىنى ءتورت جىلعا باس بوستاندىعىنان ايىرۋدى سۇرادى. ەر ادام ءوز كىناسىن تولىق مويىنداپ، باس بوستاندىعىنان ايىرۋعا بايلانىستى ەمەس جازا تاعايىنداۋدى ءوتىندى.
جابىرلەنۋشى سوتتالۋشىعا ماتەريالدىق نەمەسە مورالدىق تالاپ-ارىزى جوق ەكەنىن ايتىپ، وعان قاتاڭ جازا قولدانباۋدى سۇراعان.
سوت قىلمىستىق جاۋاپكەرشىلىكتى جەڭىلدەتەتىن ءمان-جاي رەتىندە سوتتالۋشىنىڭ كىناسىن مويىنداپ، جاساعان ىسىنە وكىنگەنىن ەسكەردى. ال قىلمىستىڭ ادامدار توبىمەن الدىن الا ءسوز بايلاسۋ ارقىلى جاسالۋى جازانى اۋىرلاتاتىن ءمان-جاي رەتىندە تانىلدى.
قىلمىستىق كودەكستىڭ 110-بابىنىڭ 2-بولىگى بويىنشا مۇنداي قىلمىس ءۇشىن ءتورت جىلدان جەتى جىلعا دەيىن باس بوستاندىعىنان ايىرۋ جازاسى قاراستىرىلعان.
سوت ۇكىمىمەن ەر ادام ءتورت جىلعا باس بوستاندىعىنان ايىرىلىپ، جازاسىن قاۋىپسىزدىگى ورتاشا قىلمىستىق-اتقارۋ جۇيەسى مەكەمەسىندە وتەيتىن بولدى.
ۇكىم زاڭدى كۇشىنە ءالى ەنگەن جوق.
