«10 تامىز – اباي كۇنى» اياسىندا شىمسيتي پاركىندە «ادامزاتتىڭ پەرزەنتى – ۇلى اباي» اتتى كونتسەرتتىك كەش ءوتتى. شىمكەنت قالاسىنىڭ ونەر ۇجىمدارى مەن تانىمال ورىنداۋشىلارى قالا تۇرعىندارى مەن قوناقتارىنا ابايدىڭ حالىق ءسۇيىپ تىڭدايتىن مۋزىكالىق تۋىندىلارىن شىرقاپ، ارنايى دايىندالعان كونتسەرتتىك باعدارلاما ۇسىندى.
ءىس-شارانىڭ ماقساتى - حاكىمنىڭ شىعارماشىلىعىن كەڭىنەن ناسيحاتتاۋ، كوركەم ادەبيەتتى، پوەزيانى، اندەرىن ءسۇيىپ تىڭدايتىن قالا تۇرعىندارىنىڭ رۋحاني تانىمىن كەڭەيتۋ، تەاتر قۇندىلىقتارىن كورسەتە وتىرىپ كورەرمەندەر قاتارىن ارتتىرۋ.
كەش بارىسىندا قازاقتىڭ ۇلى اقىنى، ويشىلى اباي قۇنانبايۇلىنىڭ شىعارماشىلىعىنان اندەر ورىندالدى.
اتاپ ايتقاندا، شىمكەنت قالالىق ج.شانين اتىنداعى قازاق داراما تەاترىنىڭ ارتىستەرى «اباي اۋىلى» پرولوگىن كوركەم تۇردە كورسەتىپ، “شىمكەنت كونتسەرت” كونتسەرتتىك ۇيىمى جانە شىمكەنت قالالىق وپەرا جانە بالەت تەاترىنىڭ انشىلەرىنىڭ ورىنداۋىندا ل.حاميدي، ا.جۇبانوۆتىڭ «اباي» وپەراسىنان «تويباستار»، حور ارتىستەرىنىڭ ورىنداۋىندا «قارلىعاش» جانە ابايدىڭ «ايتتىم سالەم قالامقاس»، «جەلسىز تۇندە جارىق اي»، «كوزىمنىڭ قاراسى» ت.ب. اندەرى شىرقالدى.
ءىس-شارادا قالا تۇرعىندار مەن قوناقتارى حاكىمنىڭ قارا سوزدەرى مەن پوەزياسىنان قۋات الىپ، كەرەمەت اسەرگە بولەندى.
اباي مۇراسى - وشپەس قازىنا. بۇگىن شاھاردا ۇلى اقىن، ويشىل، اباي قۇنانبايۇلىنىڭ باي رۋحاني مۇراسىن دارىپتەۋگە باعىتتالعان بىرقاتار ءىس-شارالار وتكىزىلىپ، مەرەكە كەڭ كولەمدە اتالىپ ءوتتى.
