دانيانىڭ ورحۋس قالاسىنداعى ساياباقتا جەرگىلىكتى Radio4 راديوستانتسياسىنىڭ جارنامالىق ناۋقانى اياسىندا ورناتىلعان رەسەي پرەزيدەنتى ۆلاديمير ءپۋتيننىڭ ءبيۋستى قويىلعاننان كەيىن بىرنەشە ساعات وتپەي جاتىپ بۇلىنگەن. بۇل تۋرالى ەلدىڭ TV2 تەلەارناسى ايتتى، دەپ حابارلايدى «ادىرنا» ءتىلشىسى.
بيىكتىگى شامامەن ەكى مەتر بولاتىن ءمۇسىن اپتا باسىندا قالالىق ساياباققا قويىلعان. الايدا ورناتىلعاننان كەيىن شامامەن التى ساعات وتكەن سوڭ ءبيۋستىڭ باسى جوق ەكەنى انىقتالعان. بەلگىسىز ادامدار ءمۇسىننىڭ باسىن كەسىپ الىپ، وزدەرىمەن بىرگە الىپ كەتكەن.
كەيىن ءمۇسىننىڭ قالعان بولىگى مەن تۇعىرىن ورحۋس مۋنيتسيپاليتەتىنىڭ قىزمەتكەرى تاۋىپ، راديوستانتسيا وكىلدەرىنە تاپسىرعان.
Radio4 راديوستانتسياسى جوعالعان بولىكتىڭ قايدا ەكەنىن انىقتاۋعا تىرىسىپ جاتقانىن مالىمدەپ، وقيعاعا قاتىستى قانداي دا ءبىر اقپارات بىلەتىن تۇرعىنداردى حابارلاسۋعا شاقىردى.
ۇيىمداستىرۋشىلاردىڭ پىكىرىنشە، پۋتين ءبيۋستى الەمدەگى ەڭ ىقپالدى ءارى ەڭ كوپ تالقىلاناتىن تۇلعالارعا ارنالعان جوبا اياسىندا قويىلعان.
