بۇگىن، 14 تامىزدا الماتى مەن الماتى وبلىسىندا ەلەكتر ەنەرگياسىن بەرۋدە جاپپاي ىركىلىستەر بولىپ، جارىق ءسونىپ قالدى. بۇل تۋرالى "الاتاۋ جارىق كومپانياسى" اق ءباسپاسوز قىزمەتى مالىمدەدى، دەپ حابارلايدى "ادىرەا".
"14 تامىزدا ساعات 14:38-دە KEGOC اق-عا تيەسىلى كەرنەۋى 500 كۆ ل-5400, ل-5300 جانە ل-5320 اۋە ەلەكتر بەرۋ جەلىلەرىنىڭ اپات سالدارىنان اجىراتىلۋىنا بايلانىستى "الاتاۋ جارىق كومپانياسى" اق جەلىلەرىندە اپاتقا قارسى اۆتوماتيكا ىسكە قوسىلدى. سونىڭ سالدارىنان الماتى قالاسى مەن الماتى وبلىسىنداعى تۇتىنۋشىلار ەلەكتر ەنەرگياسىنان اجىراتىلدى", – دەلىنگەن تۇسىنىكتەمەدە.
اپاتقا قارسى اۆتوماتيكانىڭ ىسكە قوسىلۋى سالدارىنان اجىراتىلعان جۇكتەمە كولەمى 300 مۆت بولدى.
الماتى وبلىسىندا مىنا اۋدانداردا ەلەكتر ەنەرگياسى ءوشتى:
- جامبىل اۋدانى;
- بالقاش اۋدانى;
- ەسىك اۋدانى;
- قاراساي اۋدانى;
- شەلەك اۋدانى;
- رايىمبەك اۋدانى;
- ۇيعىر اۋدانى;
- ىلە اۋدانى;
- كەگەن اۋدانى;
- تالعار اۋدانى.
الماتى قالاسىندا مىنا اۋداندار ەلەكتر ەنەرگياسىنان اجىراتىلدى:
- بوستاندىق اۋدانى;
- ناۋرىزباي اۋدانى;
- اۋەزوۆ اۋدانى;
- الاتاۋ اۋدانى.
قازىرگى ۋاقىتتا "الاتاۋ جارىق كومپانياسى" اق ماماندارى تۇتىنۋشىلارعا ەلەكتر ەنەرگياسىن بەرۋدى قالپىنا كەلتىرۋ بويىنشا قاجەتتى جۇمىستاردى جۇرگىزىپ جاتىر.
