«اۋىل» پارتياسىنىڭ سايلاۋالدى باعدارلاماسىنىڭ باستى ۇستانىمى - اۋىل مەن قالانى بولەك قاراماي، ءبىر-ءبىرىن تولىقتىراتىن تۇتاس ەكونوميكالىق جانە الەۋمەتتىك كەڭىستىك رەتىندە دامىتۋ. ويتكەنى، اۋىلدىڭ ماسەلەسىن قالادان، ال قالانىڭ بولاشاعىن وڭىرلەردەن ءبولىپ قاراۋ مۇمكىن ەمەس.
قالاداعى ازىق-تۇلىك باعاسىنان باستاپ مەگاپوليستەردەگى كولىك كەپتەلىسىنە دەيىنگى كوپتەگەن ماسەلەنىڭ ءتۇپ-توركىنى وڭىرلەردىڭ دامۋىمەن ساباقتاس. اۋىل السىرەسە – قالاعا كوشى-قون كۇشەيەدى. ءوندىرىس پەن لوگيستيكا جولعا قويىلماسا – دۇكەندەگى باعا وسەدى. شاعىن قالالار مەن اۋدانداردا جۇمىس بولماسا – جاستار ۇلكەن قالالارعا اعىلىپ، ونداعى مەكتەپكە، اۋرۋحاناعا، تۇرعىن ءۇي مەن ينجەنەرلىك جەلىلەرگە تۇسەتىن سالماق ارتادى.
سوندىقتان «اۋىل» پارتياسىنىڭ سايلاۋالدى باعدارلاماسىنداعى نەگىزگى ۇستانىمداردىڭ ءبىرى – «قۋاتتى وڭىرلەر – قۋاتتى ورتالىق». بۇل قاعيدا اۋىلدى قالاعا قارسى قويۋدى ەمەس، ەكەۋىنىڭ دامۋىن ءبىر ارناعا توعىستىرۋدى كوزدەيدى.
اۋىل مەن قالانىڭ بايلانىسى، ەڭ الدىمەن، كۇندەلىكتى داستارقاننان كورىنەدى. نان، ءسۇت، ەت، كوكونىس پەن باسقا دا ازىق-تۇلىكتىڭ ارتىندا اۋىلداعى ەڭبەك تۇر. بىراق ءونىم وندىرۋشىدەن تۇتىنۋشىعا جەتكەنشە بىرنەشە دەلدالدىڭ قولىنان ءوتىپ، تاسىمالداۋ مەن ساقتاۋ شىعىندارى قوسىلعان سايىن ونىڭ باعاسى دا وسەدى.
«اۋىل» پارتياسى وسى ارالىقتى قىسقارتۋدى ۇسىنادى. باعدارلامادا قالالاردا وتاندىق وندىرۋشىلەردىڭ ءونىمىن تىكەلەي ساتاتىن كووپەراتيۆتىك دۇكەندەر جەلىسىن دامىتۋ قاراستىرىلعان. مۇنداي تەتىك قوس تاراپقا دا ءتيىمدى: فەرمەر تۇراقتى وتكىزۋ نارىعىنا يە بولادى، ال قالا تۇرعىنى ساپالى ءونىمدى قولجەتىمدى باعامەن ساتىپ الادى. وسى ماقساتپەن ءىرى قالالار مەن وبلىس ورتالىقتارىنىڭ اينالاسىندا ازىق-تۇلىك بەلدەۋلەرىن قالىپتاستىرۋ ماسەلەسىنە دە باسىمدىق بەرىلگەن. ءونىمدى وسىرەتىن شارۋاشىلىق، ونى ساقتايتىن قويما، تاراتۋ ورتالىعى جانە ساۋدا نۇكتەسى ءبىر جۇيەگە بىرىكتىرىلسە، تاسىمال شىعىنى ازايىپ، ماۋسىمدىق تاپشىلىقتىڭ الدىن الۋعا مۇمكىندىك تۋادى.
قازاقستانداعى ءىرى قالالار سوڭعى جىلدارى ىشكى كوشى-قوننىڭ قىسىمىن انىق سەزىنىپ وتىر. ادامدار جۇمىس، ءبىلىم، مەديتسينا جانە جاقسى تۇرمىس ىزدەپ مەگاپوليستەرگە كوشەدى. ناتيجەسىندە قالالاردا تۇرعىن ۇيگە سۇرانىس ارتادى، مەكتەپ پەن بالاباقشا جەتىسپەيدى، جولداعى كولىك كوبەيەدى، كوممۋنالدىق جانە ينجەنەرلىك جەلىلەردىڭ جۇكتەمەسى ۇلعايادى.
بۇل ماسەلەنى تەك جاڭا مەكتەپ، جول نەمەسە تۇرعىن ءۇي سالۋمەن شەشۋ جەتكىلىكسىز. ونىڭ سەبەبىنە ءۇڭىلۋ كەرەك. «اۋىل» پارتياسىنىڭ ۇستانىمى وسىعان سايادى: ازامات تۋعان جەرىنەن جاقسى ءومىر ىزدەپ كەتۋگە ءماجبۇر بولماۋى ءتيىس. ەگەر اۋدان مەن شاعىن قالادا تۇراقتى جۇمىس، ساپالى مەكتەپ، قولجەتىمدى مەديتسينا، ينتەرنەت، جاقسى جول جانە كاسىپ باستاۋعا مۇمكىندىك بولسا، ادامنىڭ تاڭداۋ اياسى دا كەڭەيەدى. ول اۋىلدا قالۋدى دا، قالاعا كوشۋدى دە قاجەتتىلىكتەن ەمەس، ءوز قالاۋىمەن شەشەدى. سوندىقتان، «اۋىل» پارتياسىنىڭ باعدارلاماسىندا وڭىرلىك ينفراقۇرىلىمعا بولىنەتىن قارجىنى ارتتىرۋ، اۆتوموبيل جولدارىن ساپالى كۇتىپ ۇستاۋ، ينجەنەرلىك جەلىلەردى جاڭعىرتۋ جانە تسيفرلىق قىزمەتتەردى كەڭەيتۋ قاراستىرىلعان.
سونىمەن بىرگە پارتيا قالاعا قونىس اۋدارعان ازاماتتاردى قوعامنان شەت قالدىرماۋ قاجەت دەپ سانايدى. باعدارلامادا جاڭا ورتاعا بەيىمدەلۋ، جۇمىسقا ورنالاسۋ، مەملەكەتتىك قىزمەتتەرگە قول جەتكىزۋ جانە قالا ومىرىنە تولىققاندى ارالاسۋ ماسەلەلەرى دە قامتىلعان. پارتيا قالالاردا تسيفرلىق حابتار مەن كوۆوركينگتەردى دامىتۋعا، مەملەكەتتىك قىزمەتتەردى بارىنشا قولجەتىمدى ەتۋگە دە نازار اۋدارادى.
وڭىرلەردەن جاستاردىڭ كەتۋىنىڭ ءبىر سەبەبى – ساپالى ءبىلىم مەن جاقسى جۇمىستى تەك ءىرى قالادان تابۋعا بولادى دەگەن تۇسىنىك. مۇنى وزگەرتۋ ءۇشىن ءبىلىم بەرۋ جۇيەسىن ەڭبەك نارىعىمەن جاقىنداستىرۋ قاجەت.
«اۋىل» پارتياسى مەكتەپتەردە جۇمىس بەرۋشىلەرمەن بىرلەسكەن بەيىندىك سىنىپتار مەن وقۋ-وندىرىستىك باعىتتاردى دامىتۋدى ۇسىنادى. بۇل جاسوسپىرىمگە ماماندىقتى تەك ديپلوم الار كەزدە ەمەس، مەكتەپ قابىرعاسىنان باستاپ سانالى تاڭداۋعا مۇمكىندىك بەرەدى. ستۋدەنت جاستارعا ەڭبەك تاجىريبەسىن جيناۋعا جاعداي جاساۋ، ەلدى-مەكەندەر مەن قالالاردا سپورتتىق جانە شىعارماشىلىق كەڭىستىكتەر اشۋ دا وسى ساياساتتىڭ ءبىر بولىگى.
ماسەلە جاستارمەن عانا شەكتەلمەيدى. تسيفرلاندىرۋ جەدەل ءجۇرىپ جاتقان كەزەڭدە ەگدە جاستاعى ازاماتتار دا جاڭا قىزمەتتەردەن تىس قالماۋى كەرەك. سوندىقتان ولاردىڭ تسيفرلىق ساۋاتىن كوتەرۋ – مەملەكەتتىك قىزمەتتى پايدالانۋ عانا ەمەس، ينتەرنەت الاياقتارىنان قورعانۋدىڭ دا ماڭىزدى جولى.
قاي وڭىردە تۇرسا دا، جاس وتباسىنىڭ الدىندا ۇقساس ماسەلەلەر بار: باسپانا، تۇراقتى تابىس، بالانىڭ ءبىلىمى مەن قاۋىپسىزدىگى. سوندىقتان، پارتيا جاس وتباسىلارعا، جاس ماماندار مەن الەۋمەتتىك سالا قىزمەتكەرلەرىنە ارنالعان قولجەتىمدى تۇرعىن ءۇي تەتىكتەرىن كەڭەيتۋدى ماڭىزدى دەپ سانايدى.
ايەلدەر كاسىپكەرلىگىن قولداۋ، جاستاردىڭ ەڭبەككە ارالاسۋىنا جاعداي جاساۋ، ايەلدەر مەن بالالارعا قاتىستى زورلىق-زومبىلىققا توزبەۋشىلىك تە باعدارلامانىڭ الەۋمەتتىك باعىتتارىنىڭ قاتارىندا.
اۋىل وندىرگەن ءونىم قالاعا كەرەك. قالاداعى عىلىم، تەحنولوگيا، قارجى مەن نارىق اۋىلدىڭ دامۋىنا قاجەت. وڭىردەگى جۇمىس ورنى مەگاپوليستەگى كوشى-قون قىسىمىن ازايتسا، دامىعان قالا بۇكىل ەل ەكونوميكاسىن العا سۇيرەيدى.
سوندىقتان، «اۋىل» پارتياسىنىڭ جاڭا باعدارلاماسى تەك اۋىل شارۋاشىلىعىنا ارنالعان قۇجات ەمەس. وندا ازىق-تۇلىك باعاسىنان تۇرعىن ۇيگە، جولدان تسيفرلاندىرۋعا، جاستار ساياساتىنان ەكولوگياعا دەيىن ازاماتتاردىڭ كۇندەلىكتى ومىرىنە اسەر ەتەتىن ماسەلەلەر قامتىلعان. پارتيانىڭ ۇستانىمى قاراپايىم: ادامنىڭ مۇمكىندىگى ونىڭ اۋىلدا نەمەسە قالادا تۇرۋىنا بايلانىستى بولماۋى كەرەك.
«اۋىل» پارتياسى ءۇشىن اۋىل مەن قالا – مەملەكەتتىڭ ءبىرىن-ءبىرى تولىقتىراتىن قوس تىرەگى.
شىعارعان ۇيىم: «اۋىل» پارتياسى» رەسپۋبليكالىق قوعامدىق بىرلەستىگى
تاپسىرىس بەرۋشى: «اۋىل» پارتياسى» رەسپۋبليكالىق قوعامدىق بىرلەستىگى
تولەندى: «اۋىل» پارتياسى» رەسپۋبليكالىق قوعامدىق بىرلەستىگىنىڭ سايلاۋ قورىنىڭ قاراجاتى ەسەبىنەن.
