قازاقستان مەن اۆستريا كاسپي قۇبىر كونسورتسيۋمى ارقىلى قازاقستاندىق مۇنايدى ەۋروپا نارىعىنا تۇراقتى جەتكىزۋدى قامتاماسىز ەتۋ ماسەلەسىن تالقىلادى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان رەسپۋبليكاسى سىرتقى ىستەر مينيسترلىگى حابارلادى.
قازاقستاننىڭ سىرتقى ىستەر ءمينيسترى ەرمەك كوشەرباەۆ اۆستريانىڭ ەۋروپالىق جانە حالىقارالىق ىستەر جونىندەگى فەدەرالدىق ءمينيسترى بەاتە ماينل-رايزينگەرمەن تەلەفون ارقىلى سويلەستى.
تاراپتار حالىقارالىق تەڭىز قاتىناسىنىڭ قاۋىپسىزدىگىنە، كقك-نىڭ ۇزدىكسىز جۇمىس ىستەۋىنە قاتىستى ماسەلەلەردى تالقىلادى. كەزدەسۋدە كونسورتسيۋم توڭىرەگىندەگى احۋالعا ەرەكشە نازار اۋدارىلدى.
قازاقستان ءسىم مالىمەتىنشە، كقك باعىتى ارقىلى اۆسترياعا قازاقستاندىق مۇنايدىڭ ەداۋىر بولىگى جەتكىزىلەدى. قازاقستان اۆستريانىڭ شيكى مۇناي يمپورتىنىڭ شامامەن 56 پايىزىن قامتاماسىز ەتەدى.
سونىمەن قاتار تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا پىكىر الماستى.
كەزدەسۋ قورىتىندىسىندا قازاقستان مەن اۆستريا اراسىنداعى پراكتيكالىق ىنتىماقتاستىقتى ودان ءارى جالعاستىرۋعا دايىن ەكەندەرى راستالدى.
