الماتى قالاسى اكىمدىگىنىڭ قولداۋىمەن «الاتاۋ» ءداستۇرلى ونەر تەاترىنىڭ الاڭىندا جاز ايلارىندا ءار سەنبى سايىن اشىق اسپان استىندا وتەتىن ALMATY SUMMER FEST جوباسى جالعاسىپ جاتىر. فەستيۆالدىڭ ءار كەشى بەلگىلى ءبىر تاقىرىپقا ارنالىپ، قالا تۇرعىندارى مەن قوناقتارىنا ءتۇرلى مۋزىكالىق باعدارلامالار ۇسىنادى.
وسى سەنبىدە وتكەن مۋزىكالىق كەش قازاق ءۆالسىنىڭ كورولى، كورنەكتى كومپوزيتور، قازاقستاننىڭ حالىق ءارتيسى ءشامشى قالداياقوۆتىڭ تۋعان كۇنىنە ارنالدى.
ءشامشى قالداياقوۆ – قازاق مۋزىكا ونەرىندە وشپەس ءىز قالدىرىپ، ۇلتتىق ءان مادەنيەتىنىڭ دامۋىنا ولشەۋسىز ۇلەس قوسقان بىرەگەي تۇلعا. ونىڭ جۇرەككە جاقىن اۋەندەرى مەن سىرلى اندەرى بىرنەشە بۋىننىڭ رۋحاني مۇراسىنا اينالىپ، كۇنى بۇگىنگە دەيىن حالىقتىڭ ىستىق ىقىلاسىنا بولەنىپ كەلەدى.
كەش بارىسىندا كومپوزيتوردىڭ كەڭىنەن تانىمال شىعارمالارى شىرقالدى. كورەرمەندەر ارتيستەرمەن بىرگە سۇيىكتى اندەرىن ورىنداپ، ءشامشى قالداياقوۆتىڭ مۋزىكالىق مۇراسىنىڭ وشپەس قۇندىلىعىن تاعى ءبىر مارتە سەزىندى.
فەستيۆال ساحناسىندا قۇدايبەرگەن بەكىش، بەيبىت قورعان، ادىلەت جاۋعاشار، ADAM, الىشەر قونىسباي، ءمادي احمەتقوجا، رۇستەم نۇرجىگىت، ەلنۇر ناۋرىزبەك، IGIGAI, RAY, جاسقايرات ۆاليۋلليەۆ، dj Akhmetoff, «بايتەرەك»، «ILIGAI»، «WinL» توپتارى، سونداي-اق ەلدار وتارباەۆ، بالاۋسا ەرعالينا جانە ناۋرىزباي اۋدانىنىڭ ونەرپازدارى ونەر كورسەتتى.
كەشتىڭ ەڭ اسەرلى ساتتەرىنىڭ ءبىرى – ءشامشى قالداياقوۆتىڭ ايگىلى «انا تۋرالى جىر» جانە «كەشىكپەي كەلەم دەپ ەڭ» اندەرىن ارتيستەر مەن كورەرمەندەردىڭ بىرگە ورىنداۋى بولدى. بۇل شىعارمالار كەشتىڭ مازمۇنىن اشا ءتۇسىپ، كومپوزيتور شىعارماشىلىعىنىڭ حالىق جۇرەگىندە ءالى دە ايرىقشا ورىن الاتىنىن تاعى ءبىر مارتە كورسەتتى.
مۋزىكالىق كەش كورەرمەندەرگە كوتەرىڭكى كوڭىل كۇي سىيلاپ قانا قويماي، ۇلتتىق مۋزىكا ونەرىن دارىپتەۋگە جانە جاس ۇرپاقتى رۋحاني مۇراعا جاقىنداتۋعا باعىتتالعان ماڭىزدى مادەني وقيعاعا اينالدى.
ALMATY SUMMER FEST الداعى ەكى سەنبىدە دە جالعاسىپ، الماتىلىقتار مەن قالا قوناقتارىنا مازمۇندى مۋزىكالىق باعدارلاما ۇسىنادى.
