777 شەتەلدىك بايقاۋشى قۇرىلتاي سايلاۋىن حالىقارالىق بايقاۋعا قاتىسادى. ولار 42 شەت مەملەكەت پەن 13 حالىقارالىق ۇيىمنىڭ وكىلدەرى. سونداي-اق بايقاۋشىلار قاتارىندا 41 ەلدىڭ پارلامەنتتەرىنەن 138 دەپۋتات بار.
بۇل تۋرالى بۇگىن ورتالىق سايلاۋ كوميسسياسىنىڭ وتىرىسىندا ايتىلدى. وسك حاتشىسى مۇحتار ەرمان اككرەديتتەۋگە ءوتىنىم قابىلداۋ جۇمىستارى جۋىردا اياقتالعانىن اتاپ ءوتتى.
«ورتالىق سايلاۋ كوميسسياسىنا سىرتقى ىستەر مينيسترلىگىنەن 18 شەت مەملەكەت پەن 5 حالىقارالىق ۇيىمنان 121 بايقاۋشىنىڭ كانديداتۋراسى اككرەديتتەۋگە ۇسىنىلدى. ونىڭ ىشىندە تمد بايقاۋشىلار ميسسياسىنان - 8, تمد پارلامەنتارالىق اسسامبلەياسى - 4, ەقىۇ دياقب بايقاۋشىلار ميسسياسىنان - 7, شىۇ ميسسياسىنان - 6, تۇركى اكادەمياسىنان - 3 بايقاۋشى بار. سونداي-اق قىتاي، اقش، تايلاند، ۇلىبريتانيا، تۇركيا، موڭعوليا، ءۇندىستان، يندونەزيا، فرانتسيا، يراك، سلوۆاكيا، وزبەكستان، فيليپپين، جاپونيا، بەلگيا، يوردانيا، سەربيا جانە تۇرىكمەنستان ەلدەرىنەن 93 بايقاۋشى ۇسىنىلدى»، - دەپ حابارلادى مۇحتار ەرمان.
وتىرىس بارىسىندا شەتەلدىك بايقاۋشىلار سانىنىڭ كوپ بولۋى قازاقستاندا ءوتىپ جاتقان تاريحي قۇرىلتاي سايلاۋىنا حالىقارالىق قوعامداستىقتىڭ جوعارى قىزىعۋشىلىعىن كورسەتەتىنى اتاپ ءوتىلدى.
«حالىقارالىق بايقاۋشىلاردىڭ سانى قۇرىلتاي سايلاۋىنا حالىقارالىق قىزىعۋشىلىقتىڭ جوعارى ەكەنىن كورسەتەدى. ولاردىڭ قاتىسۋى سايلاۋ ناۋقانىنىڭ اشىقتىعى مەن جاريالىلىعىنا ىقپال ەتەدى. بۇل - ءبىزدىڭ حالىقارالىق مىندەتتەمەلەردى ۇستانۋىمىزدىڭ، سونداي-اق ەلەكتورالدىق سالادا حالىقارالىق ۇيىمدار جانە شەت مەملەكەتتەرمەن تىعىز ىنتىماقتاستىقتى جالعاستىرىپ كەلە جاتقانىمىزدىڭ دالەلى. سونداي-اق باسقا ەلدەردىڭ ورتالىق سايلاۋ ورگاندارىنداعى ارىپتەستەرىمىزدىڭ قاتىساتىندىعىن اتاپ وتكىم كەلەدى. ولاردىڭ قازاقستاندا وتكىزىلەتىن سايلاۋ ناۋقاندارىنا تۇراقتى قىزىعۋشىلىق تانىتىپ كەلە جاتقانى ءۇشىن العىسىمدى بىلدىرەمىن. قۇرىلتاي سايلاۋىن بايقاۋعا 22 مەملەكەتتىڭ ورتالىق سايلاۋ ورگاندارىنىڭ وكىلدەرى، ونىڭ ىشىندە 11 سايلاۋ كوميسسياسىنىڭ توراعالارى قاتىسادى»، - دەپ قورىتىندىلادى نۇرلان ءابدىروۆ.
