بەلگيادا ەسكى ءۇيدى جوندەپ جاتقان جۇمىسشىلار قۇنى شامامەن 9 ميلليون ەۋروعا دەيىن جەتۋى مۇمكىن التىن قۇيمالار مەن مونەتالاردان تۇراتىن قازىنانى تاۋىپ الدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
قازىنا ءۇيدىڭ ىرگەتاسىمەن جۇمىس ىستەۋ كەزىندە تابىلعان. قۇرىلىسشىلاردىڭ اراسىندا جازعى دەمالىستا قوسىمشا جۇمىس ىستەپ جۇرگەن 18 جاستاعى جىگىت تە بولعان.
«الدىمەن بۇل ءبىر ەۋرولىق تيىندار شىعار دەپ ويلادىم. بىراق كەيىن جانىندا التىن قۇيمانىڭ جاتقانىن كوردىم. سول كەزدە ءبىز الدەقايدا قۇندى نارسە تاۋىپ العانىمىزدى تۇسىندىك»، – دەدى كوبە ەسىمدى ستۋدەنت.
ول ولجانى تاپقاننان كەيىن پوليتسياعا حابارلاپ، اقشانى وزدەرىنە قالدىرۋدى ويلاماعاندارىن جەتكىزدى.
بەلگيا زاڭناماسىنا سايكەس، قازىنانىڭ يەسى ءوز قۇقىعىن مالىمدەۋ ءۇشىن بەس جىل ىشىندە ءوتىنىش بەرە الادى. الايدا جەرگىلىكتى پروكۋراتۋرا ازىرگە ونىڭ ناقتى كىم بولۋى مۇمكىن ەكەنىن انىقتاي الماي وتىر.
ەگەر قازىنانىڭ يەسى تابىلماسا، ازاماتتىق زاڭناماعا سايكەس، تابىلعان اقشا ونى تاپقان ادام مەن قازىنا ورنالاسقان جەردىڭ يەسى اراسىندا بولىنەدى.
