ەكىباستۇزدا سينتەتيكالىق ەسىرتكى وندىرەتىن زەرتحانا جويىلدى. بۇل تۋرالى بۇگىن، 20 تامىزدا ىشكى ىستەر مينيسترلىگى جازدى، دەپ حابارلايدى «ادىرنا» ءتىلشىسى.
جەدەل-تەرگەۋ ءىس-شارالارى بارىسىندا جەرگىلىكتى ەكى تۇرعىن — اعايىندى ازاماتتار ۇستالعان.
«ولار تۇرعىن ءۇيدىڭ اۋلاسىندا تىيىم سالىنعان زاتتاردى سينتەزدەۋگە جابدىقتالعان گاراجدا «سينتەتيكانى»ىرى كولەمدە ءوندىرۋدى جولعا قويعان. ءتىنتۋ بارىسىندا 10 كەلىدەن استام «الفا-PVP» پسيحوتروپتىق زاتى، 860 ليتر حيميالىق سۇيىقتىق، ونىڭ ىشىندە 300 ليترلىك رەاكتور-سىيىمدىلىق، زەرتحانالىق ىدىستار، تارازىلار جانە جەكە قورعانىس قۇرالدارى تاركىلەندى»،– دەلىنگەن حابارلامادا.
تەرگەۋ بارىسىندا كۇدىكتىلەردىڭ ارەكەتىن «Signal» مەسسەندجەرى ارقىلى كۋراتور ۇيلەستىرىپ وتىرعانى انىقتالعان. ول ەسىرتكى ءوندىرۋدىڭ بارلىق كەزەڭىن باقىلاپ، پرەكۋرسورلار سالىنعان جاسىرىن ورىنداردى قالدىرىپ وتىرعان.
مينيسترلىك ەسىرتكى ءوندىرىسىن ۇيىمداستىرۋ فاكتىسى بويىنشا قىلمىستىق كودەكستىڭ 297-1-بابى نەگىزىندە سوتقا دەيىنگى تەرگەپ-تەكسەرۋ باستالعانىن جەتكىزدى. بۇل باپ بويىنشا كىنالى تۇلعالارعا ءومىر بويىنا باس بوستاندىعىنان ايىرۋعا دەيىنگى جازا قاراستىرىلعان.
كۇدىكتىلەر ۋاقىتشا ۇستاۋ يزولياتورىنا قامالعان. قازىر پرەكۋرسورلاردى جەتكىزۋ ارنالارى مەن ەسىرتكى بيزنەسىن ۇيىمداستىرۋعا قاتىسى بار باسقا دا تۇلعالاردى انىقتاۋ بويىنشا تەرگەۋ امالدارى جالعاسىپ جاتىر.
