قازاقستاندا مەملەكەتتىك قىزمەتكەرلەردى ەسىرتكىگە تەكسەرۋدىڭ جاڭا ءتارتىبى ەنگىزىلدى

170
Adyrna.kz Telegram
https://www.adyrna.kz/storage/uploads/vajWkRwE97v2bGEwTID87T4ECMUpQvtLvY0cRdgT.jpg

فوتو: جي

قازاقستاندا مەملەكەتتىك قىزمەتكەرلەردى ەسىرتكى جانە پسيحوتروپتىق زاتتاردى قولدانۋ دەرەگىنە تەكسەرۋدىڭ جاڭا ءتارتىبى كۇشىنە ەندى، دەپ حابارلايدى "ادىرنا" ءتىلشىسى. 

ەندى قىزمەتكەردىڭ مىنەز-قۇلقىنان نەمەسە سىرتقى كەلبەتىنەن كۇماندى بەلگىلەر بايقالسا، ونى مەديتسينالىق تەكسەرۋگە جىبەرۋگە بولادى. ال تەكسەرۋدەن باس تارتقان ادام جۇمىستان بوساتىلۋى مۇمكىن.

ينفورمبيۋرو دەرەگىنشە، جاڭا تالاپقا سايكەس، مەملەكەتتىك ورگانداردىڭ كادر قىزمەتى ماماندارى قىزمەتكەرلەردىڭ جۇمىس كەزىندەگى ارەكەتى مەن مىنەز-قۇلقىنا نازار اۋدارادى. اتاپ ايتقاندا، سەبەپسىز جۇمىسقا كەلمەۋ، ءجيى كەشىگۋ، ورىنسىز اشۋلانۋ، كوڭىل كۇيىنىڭ تۇراقسىزدىعى نەمەسە مىنەزىنىڭ كۇرت وزگەرۋى كۇمان تۋدىرۋى مۇمكىن.

سونىمەن قاتار كوزدىڭ قىزارۋى، قاراشىقتىڭ ادەتتەن تىس ۇلكەيۋى نەمەسە كىشىرەيۋى، سويلەۋدىڭ بۇزىلۋى جانە ءجۇرىستىڭ وزگەرۋى دە ەسكەرىلەدى.

الايدا ءبىر عانا بەلگى قىزمەتكەردى تەكسەرۋگە جىبەرۋگە نەگىز بولمايدى. ول ءۇشىن كەمىندە ءۇش كۇماندى بەلگى انىقتالۋى كەرەك. وسىدان كەيىن مەملەكەتتىك ورگاننىڭ باسشىسى نەمەسە اپپارات جەتەكشىسى مەديتسينالىق تەكسەرۋدەن وتكىزۋ تۋرالى شەشىم قابىلدايدى. قىزمەتكەرگە ساراپتامادان ءوتۋ ءۇشىن ەكى جۇمىس كۇنى بەرىلەدى.

مەملەكەتتىك قىزمەت ىستەرى اگەنتتىگىنىڭ مالىمەتىنشە، بۇل تالاپ مەملەكەتتىك قۇپيالارعا قول جەتكىزە الاتىن قىزمەتكەرلەرگە دە قاتىستى. تەكسەرۋ تۋرالى الدىن الا ەسكەرتىلمەيدى.

ەگەر مەديتسينالىق ساراپتاما قىزمەتكەردىڭ ەسىرتكى نەمەسە پسيحوتروپتىق زات قولدانعانىن راستاسا، ول جۇمىستان بوساتىلادى. تەكسەرۋدەن باس تارتقان نەمەسە ودان جالتارعان جاعدايدا دا قىزمەتكەر قىزمەتىنەن ايىرىلۋى مۇمكىن.

ناركولوگ-دارىگەر تالشىن مۇحامەدجاننىڭ ايتۋىنشا، تەكسەرۋ كەزىندە الدىمەن ادامنىڭ زارىنەن سىناما الىنادى. ارنايى تەست اعزادا ەسىرتكى زاتىنىڭ بار-جوعىن جانە ونىڭ ءتۇرىن انىقتاۋعا كومەكتەسەدى. ەگەر ادام دارىگەردىڭ رەتسەپتىمەن قۇرامىندا ەسىرتكىلىك زاتتارى بار ءدارى قابىلداسا، قوسىمشا تەكسەرۋ جۇرگىزىلەدى.

مەملەكەتتىك قىزمەتكەرلەر مەديتسينالىق تەكسەرۋ ناتيجەسىمەن تانىسۋعا قۇقىلى. قورىتىندىمەن كەلىسپەگەن جاعدايدا شاعىم تۇسىرە الادى.

پىكىرلەر