Foto: Jİ
Qazaqstanda memlekettık qyzmetkerlerdı esırtkı jäne psihotroptyq zattardy qoldanu deregıne tekserudıŋ jaŋa tärtıbı küşıne endı, dep habarlaidy "Adyrna" tılşısı.
Endı qyzmetkerdıŋ mınez-qūlqynan nemese syrtqy kelbetınen kümändı belgıler baiqalsa, ony medisinalyq tekseruge jıberuge bolady. Al tekseruden bas tartqan adam jūmystan bosatyluy mümkın.
İnformbiuro deregınşe, jaŋa talapqa säikes, memlekettık organdardyŋ kadr qyzmetı mamandary qyzmetkerlerdıŋ jūmys kezındegı äreketı men mınez-qūlqyna nazar audarady. Atap aitqanda, sebepsız jūmysqa kelmeu, jiı keşıgu, orynsyz aşulanu, köŋıl küiınıŋ tūraqsyzdyǧy nemese mınezınıŋ kürt özgeruı kümän tudyruy mümkın.
Sonymen qatar közdıŋ qyzaruy, qaraşyqtyŋ ädetten tys ülkeiuı nemese kışıreiuı, söileudıŋ būzyluy jäne jürıstıŋ özgeruı de eskerıledı.
Alaida bır ǧana belgı qyzmetkerdı tekseruge jıberuge negız bolmaidy. Ol üşın kemınde üş kümändı belgı anyqtaluy kerek. Osydan keiın memlekettık organnyŋ basşysy nemese apparat jetekşısı medisinalyq tekseruden ötkızu turaly şeşım qabyldaidy. Qyzmetkerge saraptamadan ötu üşın ekı jūmys künı berıledı.
Memlekettık qyzmet ısterı agenttıgınıŋ mälımetınşe, būl talap memlekettık qūpiialarǧa qol jetkıze alatyn qyzmetkerlerge de qatysty. Tekseru turaly aldyn ala eskertılmeidı.
Eger medisinalyq saraptama qyzmetkerdıŋ esırtkı nemese psihotroptyq zat qoldanǧanyn rastasa, ol jūmystan bosatylady. Tekseruden bas tartqan nemese odan jaltarǧan jaǧdaida da qyzmetker qyzmetınen aiyryluy mümkın.
Narkolog-därıger Talşyn Mūhamedjannyŋ aituynşa, tekseru kezınde aldymen adamnyŋ zärınen synama alynady. Arnaiy test aǧzada esırtkı zatynyŋ bar-joǧyn jäne onyŋ türın anyqtauǧa kömektesedı. Eger adam därıgerdıŋ reseptımen qūramynda esırtkılık zattary bar därı qabyldasa, qosymşa tekseru jürgızıledı.
Memlekettık qyzmetkerler medisinalyq tekseru nätijesımen tanysuǧa qūqyly. Qorytyndymen kelıspegen jaǧdaida şaǧym tüsıre alady.
