استانا قالاسىنىڭ قىلمىستىق ىستەر جونىندەگى اۋدانارالىق سوتىندا جەدەل جاردەم فەلدشەرى ۇلدانا مىرزۋاننىڭ قازاسى تۋرالى ءىس بويىنشا باستى سوت تالقىلاۋى ءوتىپ جاتىر، دەپ حابارلايدى «ادىرنا» ءتىلشىسى.
بۇگىن سوتتالۋشى ساۋلە جۇبانيازوۆانىڭ جاڭادان قوسىلعان ادۆوكاتى اسحات ءالىموۆ سۋديادان باس تارتۋدى سۇرادى. الايدا سوت ادۆوكاتتىڭ سۋديانى ىستەن شەتتەتۋ تۋرالى ءوتىنىشىن قاناعاتتاندىرمادى.
«نەگىزگى سوت تالقىلاۋى بارىسىندا سوتتالۋشى ج.-نىڭ قورعاۋشىسى، ادۆوكات ءالىموۆ سوتتالۋشى ج.-عا قاتىستى قىلمىستىق ءىستى قاراۋ كەزىندە سۋديا اباەۆاعا قارسىلىق ءبىلدىرۋ تۋرالى ءوتىنىشحات بەردى. ءوتىنىشحاتتىڭ نەگىزىنە سۋديا اباەۆانىڭ ءوزى بەرگەن سوت وتىرىسىن كەيىنگە قالدىرۋ جانە قىلمىستىق ءىس ماتەريالدارىمەن تانىسۋعا ۋاقىت بەرۋ تۋرالى ءوتىنىشىن قاناعاتتاندىرۋدان باس تارتقانى سەبەپ بولعان. ادۆوكات ىسكە كەلىسىم بويىنشا تەك 20 تامىزدا كىرىسكەنىن كورسەتەدى. ونىڭ پىكىرىنشە، بۇل ونىڭ قورعاۋىنداعى ادامنىڭ كونستيتۋتسيامەن كەپىلدىك بەرىلگەن قورعانۋ قۇقىعىن بۇزادى، سونداي-اق ادۆوكات رەتىندەگى قۇقىقتارىنا نۇقسان كەلتىرەدى»، – دەپ سۋديا سەمباەۆ ءوتىنىشتىڭ مازمۇنىن وقىپ بەردى.
ونىڭ ايتۋىنشا، بۇل جاعدايدا سۋدياعا قارسىلىق بىلدىرۋگە نەگىز رەتىندە ادۆوكاتتىڭ ءوتىنىشىن قاناعاتتاندىرۋدان باس تارتۋ تۇرىندەگى پروتسەستىك شەشىم قابىلدانعان. الايدا مۇنى سۋديانىڭ ءىستىڭ ناتيجەسىنە جەكە مۇددەلىلىگى دەپ باعالاۋعا بولمايدى.
«مۇنداي جاعدايدا قورعاۋشىنىڭ پىكىرى بويىنشا سۋديا اباەۆانى قىلمىستىق ءىستى قاراۋعا قاتىسۋدان شەتتەتۋگە نەگىز بولاتىن ءمان-جايلار نەگىزسىز دەپ تانىلادى. سەبەبى سۋديانىڭ ءىستىڭ ناتيجەسىنە جەكە مۇددەلى ەكەنىن كورسەتەتىن جەتكىلىكتى دالەلدەر ۇسىنىلماعان. قورعاۋ تاراپىنىڭ سۋديانىڭ ىسكە مۇددەلىلىگى تۋرالى ۋاجدەرى ادۆوكاتتىڭ سۋبەكتيۆتى پىكىرى عانا»، – دەدى سۋديا.
