جامبىلدا اناسى قايتىس بولعاننان مۇگەدەكتىگى بار ەر ادام اسىراۋشىسىنان ايىرىلۋ جاعدايى بويىنشا جاردەماقى تاعايىنداۋدان باس تارتۋعا قاتىستى سوتقا جۇگىندى، دەپ حابارلايدى “ادىرنا” ءتىلشىسى.
34 جىلدان كەيىن قوزعالعان داۋدى مەدياتسيا تارتىبىمەن رەتتەدى.
جامبىل وبلىستىق سوتتارىنىڭ رەسمي Telegram-ارناسىنىڭ مالىمەتىنشە، بالا كەزىنەن III توپتاعى مۇگەدەكتىگى بار ەر ادام الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتى دەپارتامەنتىنە تالاپ ارىز بەرگەن.
تالاپكەردىڭ اناسى 1992 جىلى، ول كامەلەتكە تولماعان كەزدە قايتىس بولعان. ەر ادام اناسىنىڭ قولىندا تۇرىپ، تولىقتاي ونىڭ اسىراۋىندا بولعان. 1994 جىلى وعان بالا كەزىنەن III توپتاعى مۇگەدەكتىك رەسمي تۇردە بەلگىلەنگەن.
كەيىن تالاپكەر اسىراۋشىسىنان ايىرىلۋ جاعدايى بويىنشا جاردەماقى تاعايىنداۋ تۋرالى دەپارتامەنتكە ءوتىنىش بەرگەن. الايدا ۆەدومستۆو ءوتىنىشتى قاناعاتتاندىرۋدان باس تارتقان. نەگىزگى سەبەپتەردىڭ ءبىرى – اناسى قايتىس بولعان كەزدە ونىڭ اسىراۋىندا بولعانىن راستايتىن قۇجاتتاردىڭ بولماۋى جانە مۇگەدەكتىكتىڭ قايتىس بولعاننان كەيىن بەلگىلەنۋى.
تالاپكەر بۇل شەشىممەن كەلىسپەي، سوتقا جۇگىندى. ول اناسى قايتىس بولعان كەزدە كامەلەتكە تولماعانىن جانە وزدىگىنەن كۇن كورۋگە مۇمكىندىگى بولماعانىن، ال مۇگەدەكتىگى بالا كەزىنەن بەلگىلەنگەنىن العا تارتتى.
سوتتا تاتۋلاستىرۋ راسىمدەرىن قولدانۋ ناتيجەسىندە تاراپتار داۋدى بەيبىت جولمەن شەشۋگە كەلىستى. ولار مەدياتيۆتىك كەلىسىم جاساستى.
كەلىسىمگە سايكەس، تالاپكەر جاردەماقى تاعايىنداۋ تۋرالى دەپارتامەنتكە قايتا ءوتىنىش بەرۋگە مىندەتتەندى. ال ۆەدومستۆو ءوتىنىشتى زاڭ تالاپتارىنا سايكەس قاراپ، ءتيىستى شەشىم قابىلداۋعا مىندەتتەلدى.
مەدياتيۆتىك كەلىسىمدى سوت بەكىتتى. تالاپكەرگە بۇرىن تولەگەن مەملەكەتتىك باج سالىعى قايتارىلدى.
