كاليفورنيا شتاتىنىڭ سەناتورى، دەموكراتيالىق پارتيانىڭ وكىلى ايشا ۆاحاب اقش كونگرەسىنىڭ وكىلدەر پالاتاسىنا وتكەن ارنايى سايلاۋدا جەڭىسكە جەتتى، دەپ حابارلايدى “ادىرنا” ۇلتتىق پورتالى.
فەرعانا مالىمەتىنشە، ول اقش تاريحىندا كونگرەسكە سايلانعان العاشقى اۋعان تەكتى ساياساتكەر اتاندى.
ۆاحاب كاليفورنيانىڭ 14-ءشى سايلاۋ وكرۋگىندە دەموكراتيالىق پارتيا اتىنان مەليسسا ەرناندەسپەن باسەكەگە ءتۇستى. داۋىس بەرۋدىڭ 95 پايىزى ەسەپتەلگەننەن كەيىن ايشا ۆاحاب 53 پايىزدان استام داۋىس جيناپ، قارسىلاسىن باسىپ وزدى.
ول 2026 جىلعى ساۋىردە قىزمەتىنەن كەتكەن بۇرىنعى كونگرەسسمەن ەريك سۋولۋەللدىڭ ورنىن يەلەنەدى. ۆاحابتىڭ قازىرگى وكىلەتتىك مەرزىمى 2027 جىلعى قاڭتارعا دەيىن جالعاسادى. ال 2026 جىلعى قاراشادا ول مەليسسا ەرناندەسپەن كونگرەسستەگى تولىق ەكى جىلدىق مەرزىم ءۇشىن قايتا سايلاۋعا تۇسەدى.
ايشا ۆاحاب 1987 جىلى نيۋ-يوركتە اۋعانستاننان اقش-قا قونىس اۋدارعان وتباسىندا دۇنيەگە كەلگەن. اتا-اناسىنان ەرتە ايىرىلعاندىقتان ۆاحاب پەن ونىڭ اپكەسى قامقورلىق وتباسىندا تاربيەلەنىپ، كەيىن فريمونت قالاسىندا تۇراتىن اۋعان تەكتى امەريكالىق وتباسى ولاردى اسىراپ العان.
ساياساتكەر 2018 جىلى حەيۋورد قالالىق كەڭەسىنە سايلانىپ، اقش-تا مەملەكەتتىك قىزمەتكە سايلانعان العاشقى اۋعان تەكتى امەريكالىق ايەل اتاندى. ال 2022 جىلى كاليفورنيا سەناتىنا سايلانعان العاشقى اۋعان تەكتى امەريكالىق جانە العاشقى مۇسىلمان ايەل رەتىندە تاريحتا قالدى.
ۆاحاب بۇعان دەيىن تەحنولوگيا سالاسىندا جانە كوممەرتسيالىق ەمەس ۇيىمداردا جۇمىس ىستەگەن. ول سان-حوسە مەملەكەتتىك ۋنيۆەرسيتەتىندە ساياساتتانۋ بويىنشا ءبىلىم الىپ، كاليفورنيا مەملەكەتتىك ۋنيۆەرسيتەتىنىڭ يست-بەي كامپۋسىندا ىسكەرلىك باسقارۋ ماگيسترى دارەجەسىن، وڭتۇستىك كاليفورنيا ۋنيۆەرسيتەتىندە الەۋمەتتىك جۇمىس بويىنشا دوكتورلىق دارەجەسىن العان.
