تۇركيا قازاعى، ءانشى، اقىن، كومپوزيتور، بەشىر احمەت كوسە ومىردەن وزدى. قارالى حاباردى جۋرناليست ەرجان تولەك جەتكىزدى، دەپ حابارلايدى «ادىرنا» ءتىلشىسى.
ء«باشىر اعامىز تۇركياداعى قازاقتاردىڭ جارقىن وكىلىنىڭ ءبىرى ەدى. جۇرەگى كەڭ، بالاداي اڭقىلداعان تازا ادام بولاتىن. تۇركى الەمىنە قازاق مادەنيەتىنىڭ دارىپتەلۋىنە تەڭدەسسىز ۇلەس قوستى.
ىستانبۇلعا جولى تۇسكەن قازاقستاندىق ونەر مايتالماندارى ءباشىر اعامىزعا سالەم بەرمەي كەتپەيتىن. سوندا وقىپ جۇرگەن قازاق جاستارىن ەرەكشە قولدايتىن. جەڭگەمىز مارقۇمنىڭ قولىنان كۇرەڭ ءشايىن ءىشىپ وتىرىپ اعامىزدىڭ تالاي اڭگىمەسى مەن ءانىن تىڭداپ ەدىك...
ءومىرىن ونەرگە اينالدىرعان ءباشىر اعا دا بۇ دۇنيەنى تارك ەتىپتى. ءسىز سالعان اندەر مەن جارقىن بەينەڭىز ماڭگى جۇرەگىمىزدە. تۇركياداعى قازاق جۇرتىنا، اعانىڭ اۋلەتىنە قايعىرا كوڭىل ايتامىن»،– دەلىنگەن حابارلامادا.
ايتا كەتەيىك، بەشىر احمەت كوسە 1955 جىلى تۇركيانىڭ ساليحلي قالاسىندا تۋعان. ونىڭ «التاي تاۋىم»، «كوكتەم»، ، «جالعىز كوڭىلىم» سىندى اندەرى بار.
