ەسكەندىر اعامەن تۇتاس ءبىر ءداۋىر كوشىپ بارادى. شىنىندا دا ەسكەندىر حاسانعاليەۆ XX عاسىردىڭ ەكىنشى جارتىسىندا قازاق مۋزىكا ونەرىندەگى زور قۇبىلىسقا اينالعان ۇلى كومپوزيتور ەدى.
ءاسىلى، بۇل ءداۋىر ءابىلاحات ەسپاەۆپەن باستالادى، سوسىن ءشامشى قالداياقوۆ، سىدىق مۇحامەدجانوۆ، اسەت بەيسەۋوۆ، نۇرعيسا تىلەنديەۆ، جاقسىكەلدى سەيىلوۆ، ءىليا جاقانوۆپەن جالعاسىپ، ەسكەندىر حاسانعاليەۆپەن تۇيىندەلمەك ەدى... ەسكەندىر اعا جاسى جاعىنان وسى الىپتار توبىنىڭ سوڭى ەدى. قازىر وسى الىپتار شوعىرىنان جالعىز ءىليا اعا عانا قالدى. قانداي اۋىر...
وتكەن عاسىردىڭ جەتپىسىنشى جىلدارىنىڭ سوڭى. ول تۇس – ءار اۋىلدا سەنبى سايىن توي بولىپ جاتاتىن، ۋايىم قايعى جوق، قوي ۇستىندە بوزتورعاي جۇمىرتقالاعان زامان ەدى. بىزدەي قاراسيراقتارعا بۇل ءبىر قىزىقتى ەرمەك – بالا بىتكەن تاڭ اتقانشا توي كورۋگە بارامىز. مۇندايدا پالاتكانىڭ تۇبىندە وتىرىپ ءان تىڭداۋ – دۇنيەنىڭ راحاتى ەدى مەن ءۇشىن. اۋەلى كەزەك دومبىراعا كەلەدى. ول ۋاقىتتىڭ انشىلەرى قانداي شىركىن! بيىك شىرقاعان اسقاق ۇندەرى تۇنگى اۋىلدىڭ جۇلدىزدى اسپانىن جارىپ جىبەرە جازدايتىن. ءمۇنداي اندەردى تىڭداعاندا بار دۇنيەنى ۇمىتىپ، ءبىر الەمەت كۇي كەشەسىڭ. ەل ءىشىنىڭ وسىنداي تۋما تالانت ونەرپازدارى وسىلايشا ءان-كۇيگە قۇشتار ەتتى، ونەردى سۇيۋگە باۋلىدى...
ءۇش-ءتورت ساعاتتان كەيىن ء"بىرىنشى ستول" ءبىتىپ، تويشىل قاۋىم ۇزىلىسكە شىعادى. بىردەن بي باستالادى. ول كەزدە ءار اۋىلدا ۆيا دەگەن بولادى. ءۇزىلىس باستالعاندا كەزەك ۆيا-عا تيەدى. وسى ءساتتى باعانادان بەرى تاعاتسىز كۇتىپ تۇرعان ۆيا-نىڭ ونەرپازدارى سول زاماننىڭ نەبىر حيت اندەرىن بىرىنەن سوڭ ءبىرىن قۇيقىلجىتا شىرقاپ، ءبيدىڭ كورىگىن بىردەن قىزدىرا جونەلەدى. ءبىز سياقتى جۇگىرمەكتەر ۆيا-نىڭ الدىنا ءتىز قاتار وتىرا قالىپ ءانشى اعالاردىڭ ونەرىن تاماشالايمىز. ءالى ەسىمدە مەيىرمان زەتوۆ ۇمىتپاسام سولو گيتارادا، امانگەلدى (فاميلياسىن ۇمىتتىم) باس گيتارادا، قونىسباي كۇلماعانبەتوۆ "ۋدارنيكتە" وينايدى، كەيدە بۇل توپقا، كەيىنىرەك 1990 جىلى "ازيا داۋسىنىڭ" باس بايگەسىن جەڭىپ العان "روكساناكي" توبىنىڭ ءسوليسى سەرىك كوشكىنباەۆ اعام قوسىلادى. ول زاماننىڭ ەستراداسىنا دەيىن ەستى ەدى عوي، شىركىن! سوندا امانگەلدى ءانشى ايتاتىن ءبىر ءان كوز الدىم مەن قۇلاعىمنان وسى كۇنگە شەيىن كەتپەيدى. امانگەلدى – ەڭگەزەردەي، بويشاڭ، بۇيراباس قارا جىگىت بولاتىن، سوعان ساي ءۇنى دە كورىكتەي كەۋدەسىنەن كۇندەي كۇركىرەپ شىعىپ، كۇمبىرلەپ ەستىلەتىن. سول الاپات كۇشتى داۋسىمەن:
ومىردە تاعدىر ايداپ،
كەزدەستىم وزىڭمەن.
كەزىم بۇل بال-بۇل جايناپ،
قايعى مۇڭ سەزىلمەگەن.
تۇڭعيىق كەزىندەگى،
بولەندىم شاپاعاتقا.
بۇل نازىك سەزىم بە ەدى،
بۇل الدە ماحابات پا؟!
كەلەدى قۇشاقتاعىم،
كەلەدى ەركەلەگىم.
ەشكىمگە ۇقساتپادىم،
نە دەگەن كوركەم ەدىڭ. –
دەپ كۇركىرەتە سالعاندا دۇنيەنى كوشىرىپ جىبەرۋشى ەدى. سوندا ماعان الەمدە امانگەلدىدەن اسقان گيتاريست ءانشى جوقتاي ەدى، ءتىپتى سول زاماننىڭ اتاقتى ءانشىسى دين ءريدتىڭ ءوزى امانگەلدىگە استار بولۋعا جارامايتىنداي كورىنەتىن... ايتەۋىر مەنىڭ بالا كوڭىلىم الگى اننەن قاتتى اسەرلەنەتىن. قازىر ويلايمىن، قانشا جەردەن كۇركىرەتە سالسا دا، امانگەلدى ءانشىنىڭ داۋسىندا مۇڭ ارالاس ءبىر بوزاڭ سارىن، بۇل دۇنيەلىك ەمەس ءبىر ەرەكشە اياۋلى ءۇن بولاتىن. سوعان كورىندى مە، ومىردەن ەرتە كەتتى. اتىلىپ قالدى، قاپىلىستا...
كەيىن ەسەيە كەلە بۇل ءاننىڭ ەسكەندىر حاسانعاليەۆتىڭ ءانى ەكەنىن، ءسوزىن جازعان باكىر تاجىباەۆ ەكەنىن بىلدىك. وسى كۇنگە شەيىن ءسوزى مەن ءانى قاتار جاراسىم تاپقان وسىناۋ تەبىرەنىستى ءاننىڭ قالاي تۋعانىنا ءالى دە قايران قالامىن. اپىر-اي، ءتىپتى ءبىر قولدان شىققانداي عوي! سويتكەن باكىر اقىندى ءھام كومپوزيتوردى ومىردە بولماعان سەگىز سەرىنىڭ "اقبۇلاق" دەگەن ءانىن ۇرلاپ الدى دەگەن قىپ-قىزىل جالا جاۋىپ، قۇسا قىلىپ ولتىردىك. تالانتتارىن وسىلايشا تاعدىردىڭ تالكەگىنە شىمىرىكپەي تاستاي سالاتىن، قۇرباندىققا قينالماي شالىپ جىبەرەتىن سۇمدىق قاتىگەز جۇرتپىز عوي، نەگىزى. كەيىن كۋا بولدىق– سول اياۋلى "گۇلسەزىمدى" ەسكەندىر اعامىزدىڭ ءوزى دە عاجاپ سالادى ەكەن، بىراق مەنىڭ اۋىلىمداعى امانگەلدى ءانشى اۆتوردان دا الدەقايدا ارتىق شىرقادى-اۋ دەيمىن، ايتەۋىر وسى ءاندى ايتقاندا جانى جىلاپ تۇرۋشى ەدى، باقسىز ءانشىنىڭ...
ارادا ءبىر مۇشەلدەي ۋاقىت ءوتتى، كوپ ۇزاماي تاۋەلسىزدىك الدىق، قازاقتىڭ استى-,ءۇستى بايلىعىن سۇلىكتەي سورعان جەمقورلاردىڭ تاتىمسىز تالعامىنا ساي – تارتىمسىز فانەرششيكتەر زامانى جەتتى جىلميىپ. جاي كەلمەدى جولىنداعى ونەردىڭ نەبىر سايىپقاران شەبەرلەرى سان عاسىر سوققان ءان-كۇيدىڭ التىن سارايلارىن اياۋسىز قيراتا، كۇيرەتە كەلدى. جەمقورلاردىڭ تويىندا اۋىز جىبىرلاتىپ كۇن كورەتىن سونداي جويىمپازدار حاسانعاليەۆ اندەرىنە دە اۋىز سالدى. سونىڭ دالەلىندەي "گۇلسەزىمگە" دە داۋسىن كومپيۋتەرمەن جاساپ العان، ارلەپ العان اركىمدەر قوجا بولدى، ارۋ ءاندى، مەيلىنشە سۇلۋ ءاندى الگىلەر ءجۇنىن جالعان تاۋىقتاي قىلدى. قور بولدى ەسىل ءان. "گۇلسەزىمدى" اۆتوردىڭ وزىندەي نەمەسە مەنىڭ اۋىلىمنىڭ امانگەلدىسىندەي اڭقىتىپ سالۋعا بۇل زامان انشىلەرىنىڭ دارمەنى – ىشكى قۋاتى جەتپەگەنى، قوراش كوسموسى – تار عارىشى الاسالىق ەتكەنى راس. سوندا مەن ويلاۋشى ەدىم، اۆتور الگى انشىسىماقتارعا نەگە تىيىم سالمايدى دەپ. بىراق ويتكەن جوق، سوعان قاراعاندا ەسكەندىر اعا ومىردە مومىن كىسى بولدى-اۋ دەپ ويلايمىن.
سودان كەيىنگى ءبىر عاجاپ ءانى "ساعىندىم سەنى" ەدى. ونى ومىردەن ەرتە وزعان قۇرماناي وماروۆا قانداي اسقاق، كوركەم شىرقاۋشى ەدى شىركىن! بۇل ءاندى دە كۇنى بۇگىنگە شەيىن قۇرماناي انشىدەن ەشكىم وزدىرا العان جوق.
ال "اتامەكەن" شە؟! كەڭەس زامانىنداعى قازاقتىڭ حالىقتىق گيمنە اينالعان بۇل ءان سول داۋىردە ۇلتىمىزدىڭ ءورشىل رۋحىن ەل ىشىندە اسقاقتاتىپ تۇرعان ساناۋلى اندەردىڭ ءبىرى بولدى. ەستۋىمشە، ەسكەندىر اعا بۇل ءاندى ءوزىنىڭ تۋعان جەرى – ورالعا ارناپ شىعارىپ، ءسوزىن قادىر مىرزاليەۆكە جازدىرىپتى. ءسوزىن قولىنا العان كومپوزيتور: "قادىر اعا-اۋ، مىنانىڭ ىشىندە ورال دەگەن ءبىر اۋىز ءسوز جوق قوي، – دەپ داعدارعاندا: – ورال دەسەڭ ءارى كەتسە باتىس ءوڭىرى عانا ايتار ەدى، مەن ساعان كۇللى قازاق شىرقايتىن ءاننىڭ ءسوزىن جازىپ بەردىم", – دەگەن ەكەن. سويتكەن 'اتامەكەننىڭ" سول ءسوزى قانداي شىركىن:
قايدا جۇرسەم اتامەكەن،كوكەيىڭدە جاتادى ەكەن!
تۋعان جەردىڭ بار قادىر-قاسيەتىن ەكى-اق جولعا سىيدىرعان قادىردىڭ ۇلىلىعىندا شەك جوق-اۋ، ءسىرا؟! ۇلىلىق – وسىنداي قاراپايىمدىلىقپەن، بىراق ادال سوققان جۇرەكتىڭ شەكسىز ماحابباتىمەن ولشەنسە كەرەك!
"ادەمى-اۋ"-ى قانداي-دى!. بۇل – ءبىزدىڭ داريكو اپامىزعا ارنالعان ءان كورىنەدى. كومپوزيتورمەن جاستىق شاعىندا دوس-جار بولعان ءبىر اعامىز ايتىپ ەدى: "داريكونى وسى "ادەمى-اۋ"-مەن قىر سوڭىنان قالماي ءجۇرىپ الدى", – دەپ. وسى اننەن كەيىن ىلە دۇنيەگە كەلگەن "ەلىگىم ەركەم" شە؟! ىنتىزار جۇرەكتىڭ ىڭكار ءلۇپىلى دىرىلدەي سوققان ءموپ-ءمولدىر ماحاببات بايانى ەمەس پە بۇل ءان!
تاعى ءبىر قاراعاندىلىق كىسى ايتىپ ەدى: "بىردە ەكى دوس ەسكەندىردى ۇيگە شاقىرىپ قوناق قىلدىق. ەرتەڭىنە اكەم بىزگە "سەن ەكەۋىڭنەن تۇك شىقپايدى، اناۋ ەسكەندىر ادام بولادى ەكەن", – دەدى. ءبىز "نەگە؟" – دەگەندە – سەندەر تۇنىمەن اراق ىشتىڭدەر، ەسكەندىر ىشكەن جوق", – دەپتى. راسىندا اكەم ايتقانداي بولدى", – دەپ كۇلىپ ەدى الگى كىسى.
اقساقالدىڭ اۋزى دۋالى ەكەن، جىلدار جىلجىپ وتە كەلە ەسكەندىر حاسانعاليەۆ حالقىمىزدىڭ سۇيىكتى ونەرپازىنا اينالدى. تولاعاي تالانتىنىڭ تاۋ قوپارار قۋاتى ءوز الدىنا، ول بۇل بيىگىنە قاجىرلى ەڭبەگىنىڭ قايرات كۇشىمەن جەتتى. توماس ەديسوننىڭ ءبىر ءسوزى بار ەدى عوي: "تالانت 1%، قالعان 99% اششى تەر" دەگەن. ەسكەندىر اعا ءومىر مەن ونەردەگى بار بيىگىن قۇداي بەرگەن تالانتىن تىنىمسىز ۇشتاۋمەن بولعان قاجىرلى ەڭبەگىنىڭ كۇشىمەن باعىندىردى.
ەڭبەك دەمەكشى، ۇمىتپاسام 2012 الدە 13-ءىنشى جىلى "قازاقستان" ۇلتتىق ارناسىنىڭ "كوڭىلاشار" باعدارلاماسىنا ستسەناري جازۋعا شاقىرىلدىم. جەدەلدەتىپ ءشامشى، مۇقاعالي باستاعان ۇلىلارىمىزعا ارنالعان بىرنەشە ستسەناري جازىلىپ، ءتۇسىرىلىم جۇمىستارى دا دەرەۋ باستالىپ كەتتى. ستسەناريدىڭ اۆتورى رەتىندە ءتۇسىرىلىمنىڭ ىشىندە جۇرەمىن. ءبىر كۇنى كەزەك ەسكەندىر اعاعا كەلىپ، ستۋدياعا كومپوزيتوردىڭ ءوزى شاقىرىلىپ، باستان اياق ونەر كورسەتتى. ادەتتە، ءبىر ساعاتتىق مۇنداي ۇلكەن شوۋ باعدارمالاردى تۇسىرگەنگە تولىق ءبىر كۇن ۋاقىت جۇمسالادى... ءتۇسىرىلىمنىڭ بار جۇگىن ءبىر ءوزى كوتەرگەن ەسكەندىر اعا، بايقايمىن، كەشكە قاراي شارشاي باستادى. شارشاعانى سونداي ءتۇسىرىلىم جۇمىستارى ءبىر تولاس تاپقان ساتتە كادىمگىدەي فورتەپيانونىڭ الدىندا باسىن تومەن سالىپ، تولىقشا ءجۇزى قان-ءسولسىز قابارىپ وتىرىپ قالادى. جەتپىستەن مول اسقان جاس وڭاي ما – اياقتارى سىزداپ، بەلى سىرقىراپ اۋىراتىن سياقتى اعانىڭ، قان قىسىمى دا كوتەرىلەتىن ءتارىزدى. الايدا بۇل كوڭىلسىز ءسات كوپكە سوزىلمايدى، باعدارلاما رەجيسسەرى عاليا بايبوسىنوۆانىڭ "باستايمىز!" دەگەن جارقىن داۋسى ەستىلگەندە ەسكەندىر اعا بيىككە سامعار ساتىندە قوس قاناتىن سەرپي قومداعان اقيىق قىرانداي ءدۇر سىلكىنەدى، ءجۇزىن تورىعان جاڭاعى شارشاۋدىڭ ءىزى دە قالمايدى، تاس ءتۇيىن بەكىنىپ، الدىنداعى فورتەپيانوعا قىزىلعا تۇسكەن بۇركىتتەي قايىرا قونجيادى، سودان كەلەسى ۇزىلىسكە دەيىن ەش سىر الدىرماي، شالدىقپاي شاباتىن بەلى بەرىك كارى بوزداي ۇزاققا سىلتەيدى. ابزالى، كارى بوز ەمەس، تارلانبوز دەگەن دۇرىس شىعار مۇنداي اعانى...
سول جولى قينالسا دا ءۇنسىز ءتوزىپ العان بەتىنەن قايتپايتىن كونتەرلىلىگىن كورگەن مەن نە دەگەن تاباندى ادام دەپ تاڭىرقاعان ەدىم. شىنىندا دا، سول جولى بايقاعانىمداي، بۇل كىسىنىڭ بويىنداعى باستى قاسيەتى تاباندىلىق ەكەن. ءاسىلى ءوز تاعدىرىنىڭ باقىتى ءۇشىن تاباندىلىقپەن كۇرەسە ءبىلۋ – استە زور قاسيەت. اسىرەسە تالانتتى جان ءۇشىن بۇل تاپتىرمايتىن مىنەز. بىردە پۋشكيننىڭ دۋەلدە ولگەنىن ەستىگەن يران شاحى گريبوەدوۆكە: "ورىستا تالانت كوپ قوي، قۇنسىز بولعان سوڭ ولتىرەدى دە" دەگەن ەكەن. سول ايتقانداي قازاقتا دا قادىرىن بىلگەن-بىلمەگەن، باعاسىن بەرگەن-بەرمەگەن تالانت مول عوي، بىراق كوپ جاعدايدا سول تالانتتارىمىزعا تاباندىلىق جەتىسپەي جاتادى.
ء"بىر ءىسىم بار باستالعان،
باستالا سالىپ تاستالعان", –
دەيدى ۇلى مۇقاعالي. مىنەكي، قازاقى تالانتتاردىڭ ءبىر ءمىنى، بالكىم باستى كەمشىنى – وسى "باستالا سالىپ تاستالعاندىق" پا دەيمىن. كەيدە بۇل قازاقتىڭ ۇلتتىق مىنەزىنىڭ ءبىرى مە دەپ تە قالامىن. ويتكەنى باستاي سالىپ ورتا جولدا تاستاپ كەتكەن، اياقسىز قالعان تالاي ىستەرىمىزدىڭ كۋاسى بولىپ كەلە جاتقان جوقپىز با – وسى وتىز جىلدا....
ءيا، ەسكەندىر حاسانعاليەۆ ءوز باقىتى ءۇشىن، دالىرەك ايتقاندا ءوز ونەرىنىڭ باعى ءۇشىن جوعارىدا ايتقانىمىزداي تاباندىلىقپەن كۇرەستى. سول باقىتىنىڭ ءبىرى – اياۋلى جارى داريكو اپامىز دەسەك، ارتىق ايتپاعانىمىز. كوپ تالانتتار ءوز ۇيىنەن باق تابا الماي، ءوز شاڭىراعىنا ءوزى وگەي كۇي كەشەتىنى – دارا دارىنىڭ باسىندا ءجيى كەزدەسەتىن كوپ كەلەڭسىزدىكتىڭ ءبىرى، بالكىم، ەڭ اۋىرى. ونەرى ءتارىزدى وتباسى باقىتى جونىنەن دە قۇداي ەسكەندىر اعامىزدىڭ باعىن زور قىلدى. ول – داريكو سۇلۋ ارقىلى ايەلدىڭ ايالى الاقانىن سەزىنىپ، اياۋلى ماحابباتىنا بولەندى. داريكو ارۋ – ونىڭ ماڭگىلىك مۋزاسىنا، شىعارماشىلىعىنىڭ تاۋسىلماس قاينارىنا، بۇلاق باستاۋىنا اينالدى. سوعان قاراعاندا قاراعاندىنىڭ ارۋ قىزى – داريكو سۇلۋ كومپوزيتورعا سارقىلماس شابىت سىيلاي بىلگەن سەكىلدى. ۇلى ونەر قاشاندا عاشىق جۇرەكتەن، سارعايعان ساعىنىشتان تۋادى. عاشىق بولا المايتىن سەزىمسىز، قارادۇرسىن ادامنان ەشقاشان ونەر تۋماق ەمەس. وكىنىشتىسى، قازىر ءبىزدىڭ كومپوزيتور دەپ جۇرگەن سازگەرسىماقتارىمىز ومىرىندە ءبىر ارۋدى ىستىق جۇرەكتەن ايالاي ءسۇيىپ كورمەگەن اۋدانسىز، تار كوڭىل وڭشەڭ توعىشار جاندار ەكەندىگى سەزىلەدى. ەگەر ولاردا سۇيە بىلەتىن، كۇيە بىلەتىن ىستىق جۇرەك بولسا، ەڭ باستىسى تالانت بولسا – اينالامىزدى قازىرگىدەي جىن-ويناق جايلاماس ەدى، مىنانداي دۇنيەجۇزىلىك شوۋبيزنەستەن ۇرلانعان ەسىرىك انسىماقتار باسىپ كەتپەس ەدى ءۇستىمىزدى.
ال ەسكەندىر اعامىز ءوزىنىڭ سىرشىل جۇرەگىمەن داريكوداي ءسۇلۋدى ايالاي ءسۇيدى، ونىڭ كەيبىر اندەرىنەن ("ساعىندىم سەنى") باسقا دا ءبىر ارۋعا ىڭكار بولعاندىعى اڭعارىلادى. دەگەنمەن كومپوزيتور ءبىر سۇحباتىندا اعىنان جارىلعانداي، بارلىق اندەرىن سۇيىكتى جارى داريكوعا ارنادى. ءبىر عاجابى – داريكو ارقىلى ول قاراعاندىداي قابىرعالى جۇرتتىڭ قادىرلىسى بولا ءبىلدى. ەر باقىتىنىڭ ءبىر بەلگىسى – ءۇش جۇرتىنىڭ تولىق بولماعى، تۇگەل كەلۋى. سونىڭ ءبىرى قايىن جۇرتتىڭ تەگەۋىرىن كۇشى...
باياعىنىڭ كورەگەن حاندارى دا بيلىككە جەتۋ ءۇشىن اۋەلى قايىن جۇرتىن قامداعان. ەسكەندىر اعانىڭ قايىن جۇرتى ارقاداعى ءدۇمدى تۇقىم – اتاقتى اشلياەۆتار اۋلەتى-تۇعىن. ايباتتى اعالارىنىڭ بار تىلەۋى – جالعىز قارىنداستارى داريكونىڭ ۇستىندە بولعانى انىق.
ەسكەندىر اعانىڭ ءوز جۇرتى جايلى ەشتەڭە بىلە قويمايمىن، بىراق تۋعان توپىراعى ۇلى كومپوزيتور مۇحيت ءانشى جارالعان باتىس الاشوردا بەسىگى ورالدىڭ جىمپيتىسى – قاراتوبە ەكەنىن بىلەمىن. ۇمىتپاسام، سولاي. توپىراعىنىڭ تەكتى ەكەنى – ەسكەندىر اعانىڭ ەشكىمگە ۇقسامايتىن ءورشىل ءارى سىرشىل، رۋحتى اندەرىنەن كورىنەدى. كومپوزيتوردىڭ تاعى ءبىر باقىتى – ءتاڭىرى وعان ءوزى شىعارعان اندەرىن ءوزى كەلىستىرە، شەبەر شىرقايتىن اسقاق ءارى قۋاتتى جويقىن داۋىس بەردى. بۇل جونىنەن ول ءوزى كومپوزيتور، ءوزى ءانشى مۇحيت باباسىنا ۇقسايدى. كەزىندە قادىر مەن باكىردەي جەرلەس اعالارى جاس كومپوزيتوردى تاماشا اندەرىنە ءسوزى ساي اسەرلى ولەڭدەردەن كەمدىك كورگىزبەدى. بۇل دا ونىڭ تاعى ءبىر كەزەكتى باقىتى. بارىنەن دە ونىڭ ەڭ ۇلى باقىتى – تۋعان حالقىنىڭ شەكسىز سۇيىسپەنشىلىگىنە بولەنگەنى.
"ۋاقىتسىز تۋعان ەر عارىپ" – دەيدى ءماشھۇر ءجۇسىپ. راسىندا دا كوپ جاقسىلار ۋاقىتىنان بۇرىن تۋادى، نەمەسە كەيىن تۋىپ ءوز زامانىنان اياۋسىز سوققى جەپ، ءومىردىڭ بازارىنان جىلاپ قايتىپ، وكسۋمەن قور بوپ ءوتىپ، كەيىپ ءولىپ جاتادى. ال ءوز ۋاقىتىندا تۋعان باقىتتى ەر ەسكەندىر ءوز داۋىرىنە رازى عۇمىر كەشتى. سونىڭ ايعاعىنداي ول ءوز زامانىن، ءوز ەلىن، ءوز سۇيگەنىن اسقاق جىرلادى. ءوز ءداۋىرىنىڭ ءتول پەرزەنتى، تۋعان ەلىنىڭ سۇيىكتى ۇلى بولا بىلگەن، ءتاڭىرى بار تىلەۋىن اياماي بەرگەن ەسكەندىر اعادا ارمان جوق ءسىرا؟ لايىم سولاي بولعاي!
الدىنان جارىلقاسىن باقىتتى ەردى! مەكەنى پەيىش، ارتى كەنىش بولعاي! قوش ەسكەندىر اعا، باقۇل بول ۇلى كومپوزيتور!
ەرلان تولەۋتاي،
ءانشى-كومپوزيتور، ونەرتانۋشى،
جازۋشى-ستسەناريست
