بۇگىن، 24 تامىزدا قازاقستان پرەزيدەنتى قاسىم-جومارت توقاەۆ اقوردادا حالىقارالىق ءپان وليمپيادالارىندا جەڭىمپاز اتانىپ، جۇلدەلى ورىندارعا يە بولعان وقۋشىلارمەن جانە ستۋدەنتتەرمەن كەزدەستى، دەپ حابارلايدى "ادىرنا".
سالتاناتتى ءىس-شاراعا فيزيكا، حيميا، بيولوگيا، ماتەماتيكا، ينفورماتيكا، گەوگرافيا جانە لينگۆيستيكا پاندەرى بويىنشا بەدەلدى ءبىلىم دودالارىندا توپ جارعان 21 لاۋرەات، سونداي-اق ولاردىڭ ۇستازدارى مەن تالىمگەرلەرى قاتىستى. دارىندى جاستاردىڭ التاۋى التىن، ون ءبىرى كۇمىس، تورتەۋى قولا مەدال يەلەنگەن.
مەملەكەت باسشىسى حالىقارالىق ءبىلىم سايىستارىندا ۇزدىك ناتيجە كورسەتكەن جاستاردى جەڭىسىمەن قۇتتىقتاپ، ولاردىڭ ەل ابىرويىن اسقاقتاتۋعا قوسقان ۇلەسىن جوعارى باعالادى.
"ارقايسىڭىز الەمنىڭ ەڭ زياتكەر وقۋشىلارىمەن باسەكەگە ءتۇسىپ، بەدەلدى ءبىلىم دودالارىندا توپ جاردىڭىزدار. كوك تۋىمىزدى بيىككە كوتەرىپ، ەلىمىزدىڭ ابىروي-بەدەلىن ارتتىرۋعا مول ۇلەس قوسىپ جۇرسىزدەر. ءبىز سىزدەردى ماقتان تۇتامىز. قازاقستاننىڭ جارقىن بولاشاعى – ويى ۇشقىر، ءبىلىمدى، دارىندى جاستاردىڭ قولىندا. سىزدەر ەل ماقتانىشى دەگەن اتقا لايىقسىزدار"! – دەدى قاسىم-جومارت توقاەۆ.
پرەزيدەنت ءار مەدالدىڭ ارتىندا ۇزاق دايىندىق، ۇزدىكسىز ىزدەنىس پەن تاباندى ەڭبەك تۇرعانىن اتاپ ءوتتى. وسى ورايدا مەملەكەت باسشىسى ابايدىڭ ء"ۇش-اق نارسە ادامنىڭ قاسيەتى: ىستىق قايرات، نۇرلى اقىل، جىلى جۇرەك" دەگەن وسيەتىن مىسالعا كەلتىردى.
قاسىم-جومارت توقاەۆ دارىندى جاستاردىڭ بولاشاقتا بىلىكتى ينجەنەر، كورنەكتى عالىم جانە مىقتى مامان اتانىپ، جاڭا تەحنولوگيالار مەن عىلىمي جاڭالىقتار ارقىلى قازاقستاننىڭ وركەندەۋىنە جانە الەمنىڭ دامۋىنا ۇلەس قوساتىنىنا سەنىم ءبىلدىردى.
