تۋعان جەردەن جىراققا كەتىپ، جاڭا ورتادا ءوز ورنىڭدى تابۋ – كەز كەلگەن ادامعا وڭاي سوقپايتىن قادام. اسىرەسە، الەمنىڭ ەڭ باسەكەلى نارىقتارىنىڭ بىرىندە ءوز كاسىبىڭدى قالىپتاستىرۋ ۇلكەن ەڭبەك پەن تاباندىلىقتى تالاپ ەتەدى. قازاقستاندىق انەليا ءالىمنىڭ كاسىبي جولى دا وسىنداي ىزدەنىس پەن تالپىنىسقا تولى.
جامبىل وبلىسىنداعى باۋىرجان مومىشۇلى اۋىلىندا دۇنيەگە كەلگەن وتانداسىمىز ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىن ەكونوميست ماماندىعى بويىنشا قىزىل ديپلوممەن ءتامامداپ، كەيىن زاڭ سالاسىندا ءبىلىم العان. ۋاقىت وتە كەلە ول كاسىبي جولىن beauty-يندۋستريامەن بايلانىستىرعان.
2021 جىلى اقش-قا قونىس اۋدارعان انەليا بۇگىندە مانحەتتەندە سۇلۋلىق ستۋدياسىن اشىپ، Anelya Alim Cosmetics كوسمەتيكالىق برەندىن دامىتىپ كەلەدى. «ادىرنا» ءتىلشىسى انەليا الىممەن تىلدەسىپ، ونىڭ قازاقستانداعى العاشقى قادامدارىنان باستاپ اقش-تاعى كاسىبي جەتىستىكتەرىنە دەيىنگى جولىن ءسوز ەتتى.
«مەنىڭ بۇل سالاداعى ەڭبەك جولىم 2013 جىلى استانادا العاشقى ماكياج كۋرستارىن وقۋدان باستالدى. سودان بەرى بىلىكتىلىگىمدى ۇزدىكسىز جەتىلدىرىپ كەلەمىن. 2014–2015 جىلدارى بەيجىڭدە سۇلۋلىق جانە كينويندۋستريا سالاسىندا ءبىلىم الدىم. كەيىن استانادا ءۇش سۇلۋلىق ستۋدياسىن اشىپ، كاسىبي چەمپيوناتتارعا قاتىستىم جانە سۇلۋلىق بايقاۋلاردا قازىلىق ەتتىم. حالىقارالىق تاجىريبەم پاريجدە جالعاستى. وندا جۇمىس ىستەپ، Make Up For Ever Academy ورتاسىندا كاسىبي شەبەرلىگىمدى شىڭدادىم»،–دەيدى ول.
«ەينشتەين ۆيزاسىن» العان تۇڭعىش قازاق قىزى
انەليا 3كۋرستا وقىپ جۇرگەن كەزىندە Wوrk and Travel باعدارلاماسى ارقىلى العاش رەت امەريكاعا بارىپ، ەلدىڭ مۇمكىندىكتەرى مەن دامۋ قارقىنىن ءوز كوزىمەن كورگەن. ارادا بىرنەشە جىل وتكەن سوڭ، 2021 جىلى ۇلىمەن بىرگە اقش-قا قونىس اۋدارعان. كەيىن beauty-يندۋسترياداعى كاسىبي جەتىستىكتەرىنىڭ ارقاسىندا ەرەكشە قابىلەتى بار ماماندارعا بەرىلەتىن گرين-كارتاعا يە بولعان.
«ۆيزا ساناۋلى كۇننىڭ ىشىندە ماقۇلداندى. العاشىندا قۋانىشىمدا شەك بولمادى. بىراق ارتىنشا «ەندى نە بولادى؟» دەگەن وي كەلدى. دەگەنمەن، كوپ ۇزاماي كۇمانىمدى ىسىرىپ قويىپ، وزىمە ء«وزىڭ قالاعانداي ءومىر سۇرۋگە مۇمكىندىك بەر»، - دەدىم. كوپ ۇزاماي مانحەتتەندە سۇلۋلىق ستۋدياسىن اشتىم ءارى امەريكالىق Anelya Alim Cosmetics كوسمەتيكالىق برەندىنىڭ نەگىزىن قالادىم. العاشقى توپتامامدى The Makeup Show كورمەسىندە تانىستىردىم. مەن ءۇشىن ءوز ءونىمىمدى اقش-تىڭ كاسىبي نارىعىنا شىعارىپ، الەمدىك beauty-يندۋستريا ماماندارىنىڭ ورتاسىندا تانىستىرۋ اسا ماڭىزدى بولدى. ۋاقىت وتە كەلە مەنى ءىس-شارالارعا تەك ۆيزاجيست رەتىندە عانا ەمەس، ءوزىمنىڭ makeup جانە hair-ستيليستەردەن قۇرالعان كومانداممەن بىرگە شاقىرا باستادى. ال Anelya Alim Cosmetics ءتۇرلى ءىس-شارالاردىڭ beauty-سەرىكتەسى ءارى دەمەۋشىسى رەتىندە تانىلدى»،– دەيدى ارۋ.
وتانداسىمىزدىڭ ايتۋىنشا، ونىڭ برەندى تەك كوسمەتيكالىق ءونىم شىعارۋمەن شەكتەلمەيدى.
«Anelya Alim Cosmetics – بۇل جاي عانا كوسمەتيكا ەمەس، beauty-يندۋستريادا مانساپ قۇرۋعا مۇمكىندىك بەرەتىن جوبا. ءبىز ساندىك كوسمەتيكا مەن بەت كۇتىمى باعىتىن قاتار دامىتىپ كەلەمىز. سونداي-اق برەند توڭىرەگىندە كاسىبي قاۋىمداستىق قالىپتاسۋدا. قىزمەتكەرلەر ءبىلىم الىپ، تاجىريبە جيناقتاپ، ءبىزدىڭ كوماندامەن بىرگە ءىس-شارالاردا جۇمىس ىستەپ، كوسمەتيكا ساتۋ سالاسىندا دامي الادى. ماماندارعا نيۋ-يورك پەن فلوريداداعى ءسان جانە سۇلۋلىق ءىس-شارالارىنا قاتىسۋ مۇمكىندىگىن ۇسىنامىز. مەن ءۇشىن كوسمەتيكا، ءبىلىم بەرۋ، كاسىپكەرلىك جانە كاسىبي مۇمكىندىكتەر توعىسقان ەكوجۇيە قۇرۋ ماڭىزدى»،– دەيدى انەليا.
«مۇمكىندىكتى كۇتپەي، كەرىسىنشە ونى جاساۋ كەرەك»
كاسىپكەر امەريكا نارىعىندا باسەكەلەستىك وتە جوعارى ەكەنىن اتاپ ءوتتى.
«مۇندا تەك ساپالى ءونىم جاساۋ جەتكىلىكسىز. ۇنەمى ارەكەت ەتىپ، بايلانىس ورناتىپ، جەكە برەندىڭدى دامىتىپ، مۇمكىندىكتەردى ءتيىمدى پايدالانا ءبىلۋ قاجەت. امەريكا ماعان بۇرىنعىدان دا بەلسەندى ءارى اشىق بولۋدى ۇيرەتتى. سوندىقتان مەنىڭ قاعيدام وتە قاراپايىم. ول – مۇمكىندىكتى كۇتپەي، كەرىسىنشە ونى ءوزىڭ جاساۋ. ارينە، بيزنەستى جۇرگىزۋ قابىلەتىنىڭ دە ماڭىزى زور. ساتۋ، ماركەتينگ، سەرىكتەستىك بايلانىستاردى ءتۇسىنىپ، برەندىڭدى دۇرىس پوزيتسيالاي ءبىلۋ قاجەت.
اقش – مەن ءۇشىن ۇلكەن ءومىر مەكتەبى. مەن مۇندا كۇن سايىن جاڭا نارسە ۇيرەنەمىن. امەريكادا شاحمات ويىنىنداعىداي ارقاشان سەگىز قادام العا ويلاپ، بولاشاقتى الدىن الا جوسپارلاي ءبىلۋ قاجەت»،– دەپ ءتۇسىندىردى ول.
قازاقستاندىق ارۋ ساناۋلى ۋاقىت ىشىندە بيىك بەلەستەردى باعىندىرىپ ۇلگەرگەن.
«مەن ءۇشىن ەڭ ۇلكەن جەتىستىكتەردىڭ ءبىرى – قازاقستاننىڭ شاعىن اۋىلىنان شىققان قىز قۇرعان برەندتىڭ بۇگىندە اقش نارىعىندا دامىپ، نيۋ-يورك پەن فلوريداداعى ءىرى ءىس-شارالاردا تانىستىرىلىپ جۇرگەنى. ءبىزدىڭ كوماندا New York Fashion Week, Orlando Fashion Week جانە باسقا دا fashion مەن beauty باعىتىنداعى جوبالارعا قاتىستى. قازىرگى تاڭدا Anelya Alim برەندى اقش-تا رەسمي تۇردە تاۋارلىق بەلگى رەتىندە تىركەلدى»،– دەيدى انەليا.
مار-ا-لاگودان كەلگەن كۇتپەگەن شاقىرتۋ
كاسىپكەردىڭ اقش-تاعى كاسىبي جولىندا مار-ا-لاگو كەشەنىندە وتكەن ءىس-شارانىڭ ورنى بولەك. اق ءۇي باسشىسى دونالد ترامپتىڭ پالم-بيچتەگى جەكە رەزيدەنتسياسى ءارى كلۋبى سانالاتىن بۇل الاڭدا وتكەن شاراعا ونىڭ Anelya Alim Cosmetics برەندى كوسمەتيكالىق دەمەۋشى رەتىندە قاتىسقان.
«شىنى كەرەك، ءىس-شارا ۇيىمداستىرۋشىلارى مەنى وزدەرى تاۋىپ، Instagram ارقىلى ۇسىنىس تاستادى. بۇل شاقىرتۋ اقش-تا قالىپتاستىرعان كاسىبي بەدەلىمنىڭ ناتيجەسىندە كەلدى دەپ بىلەمىن. پالم-بيچتەگى بۇل ءىس-شاراعا ءوزىمنىڭ كاسىبي كومانداممەن بىرگە قاتىستىم. ال Anelya Alim Cosmetics شارانىڭ كوسمەتيكالىق دەمەۋشىسى بولدى. ءبىزدىڭ برەندتىڭ ونىمدەرى شامامەن 200 VIP قوناققا تانىستىرىلدى. قازىر كوپتەگەن ۇسىنىس ءدال وسىلاي Instagram مەن LinkedIn ارقىلى تىكەلەي كەلىپ تۇسەدى. بۇل مەن ءۇشىن – كوپ جىلعى ەڭبەكتىڭ ناتيجەسى كورىنە باستاعانىنىڭ بەلگىسى. ياعني، ۋاقىت وتە كەلە ءسىز مۇمكىندىكتەردى ىزدەۋشى عانا ەمەس، مۇمكىندىكتەردىڭ ءوزىڭىزدى ىزدەيتىن دەڭگەيىنە جەتەسىز»،– دەدى ول.
انەليا ءوز جولىن ەندى باستاپ كەلە جاتقان جاندارعا اقىل-كەڭەسىن ايتتى.
ء«اربىر جاڭا كۇن – جاڭا مۇمكىندىك. سەنىڭ قاي جەردە دۇنيەگە كەلگەنىڭ ماڭىزدى ەمەس. ول شاعىن اۋىل، ۇلكەن قالا بولسىن، ەڭ باستىسى – الدىڭا قانداي ماقسات قويعانىڭ جانە سول ماقساتقا جەتۋ ءۇشىن كۇن سايىن نە ىستەپ جاتقانىڭ. ءار كۇنىڭدى باعالا، كوپ وقى، ءوزىڭدى دامىت جانە مۇمكىندىكتەردى پايدالانۋدان قورىقپا. بيزنەستە ادامدارمەن دۇرىس قارىم-قاتىناس جاساي ءبىلۋ، پسيحولوگيا مەن كوممۋنيكاتسيانى ءتۇسىنۋ، تىعىز بايلانىس ورناتۋ جانە قۇقىقتارىڭدى ءبىلۋ، ءوزىڭ مەن بيزنەسىڭدى زاڭ جۇزىندە قورعاۋ وتە ماڭىزدى. الايدا قانداي جەتىستىككە جەتسەڭ دە، ەڭ باستىسى – ادامدىعىڭدى جوعالتپا. مەيىرىمدى ءارى ادال بول، ءوز قۇندىلىقتارىڭنان ايىرىلما جانە بۇل جولدى قايدان باستاعانىڭدى ۇمىتپا»،- دەيدى انەليا ءالىم.
اڭگىمەلەسكەن ديانا اسان
