قۇرىلتاي سايلاۋىنا قاتىستى توقاەۆ شەتەلدىك ارىپتەستەرىنە العىس ايتتى

توقاەۆ شەت مەملەكەتتەردىڭ باسشىلارىنا العىس ءبىلدىردى

پرەزيدەنت قاسىم-جومارت توقاەۆ قازاقستانداعى قۇرىلتاي دەپۋتاتتارىنىڭ العاشقى ءبىر پالاتالى سايلاۋىنىڭ وتۋىنە بايلانىستى جىلى لەبىزىن بىلدىرگەن شەت مەملەكەتتەردىڭ باسشىلارىنا ريزاشىلىعىن جەتكىزدى. بۇل تۋرالى اقوردا جازدى، دەپ حابارلايدى "ادىرنا".

مەملەكەت باسشىسى رەسەي پرەزيدەنتى ۆلاديمير پۋتينگە، قىرعىزستان پرەزيدەنتى سادىر جاپاروۆقا، ازەربايجان پرەزيدەنتى يلحام اليەۆكە، وزبەكستان پرەزيدەنتى شاۆكات ميرزيوەۆكە جانە تاجىكستان پرەزيدەنتى ەمومالي راحمونعا العىس ايتتى.

توقاەۆتىڭ پىكىرىنشە، وتكەن پارلامەنتتىك سايلاۋ قازاقستان ازاماتتارىنىڭ بىرلىگىن كورسەتىپ، حالىقتىڭ، اسىرەسە جاستاردىڭ ەلدىڭ بولاشاعىنا جاۋاپكەرشىلىكپەن قارايتىنىن اڭعارتتى. پرەزيدەنت بۇل ۇدەرىستى وتانشىلدىقتىڭ كورىنىسى رەتىندە باعالادى.

مەملەكەت باسشىسى قازاقستانداعى ساياسي جانە ەكونوميكالىق رەفورمالار مەن جان-جاقتى جاڭعىرۋ جۇمىستارى تۇراقتى تۇردە جالعاسىپ كەلە جاتقانىن اتاپ ءوتتى. ونىڭ ايتۋىنشا، قۇرىلتاي سايلاۋىنىڭ ناتيجەلەرى ازاماتتاردىڭ باسىم بولىگى ەلدىڭ قازىرگى دامۋ باعىتىن قولدايتىنىن كورسەتتى.

پرەزيدەنت بۇل جاعداي ادىلەتتى، وزىق جانە تازا قازاقستان قۇرۋعا باعىتتالعان جوسپارلاردى جۇزەگە اسىرۋعا بەرىك نەگىز بولاتىنىن ايتتى.

سونىمەن قاتار قاسىم-جومارت توقاەۆ دوستاس مەملەكەتتەردىڭ باسشىلارىنا ءوز ەلدەرىنىڭ تۇراقتى دامۋىنا باعىتتالعان جوبالارى مەن باعدارلامالارىن تابىستى جۇزەگە اسىرۋعا تىلەكتەستىك ءبىلدىردى.

بۇدان بولەك، مەملەكەت باسشىسىنىڭ اتىنا شىۇ، تمد، ۇقشۇ، ەاەك، ەىۇ، تۇركسوي جانە باسقا دا حالىقارالىق ۇيىمداردىڭ باسشىلارىنان قۇتتىقتاۋ حاتتارى كەلگەن.

ەسكە سالايىق، قۇرىلتاي دەپۋتاتتارىنىڭ سايلاۋى 23 تامىزدا ساعات 07:00-دەن 20:00-گە دەيىن ءوتتى. ورتالىق سايلاۋ كوميسسياسىنىڭ الدىن الا مالىمەتىنشە، سايلاۋشىلاردىڭ قاتىسۋ كورسەتكىشى 74,19 پايىزدى قۇرادى. داۋىس بەرگەن ازاماتتاردىڭ جالپى سانى – 9 352 151 ادام.