پرەزيدەنت قاسىم-جومارت توقاەۆ «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ شارالارى تۋرالى» جارلىققا قول قويدى، دەپ حابارلايدى “ادىرنا”.
قۇجاتقا سايكەس، قازاقستان رەسپۋبليكاسى قاۋىپسىزدىك كەڭەسىنىڭ اپپاراتى مەملەكەتتىك ورگان رەتىندە قۇرىلدى.
جاڭا مەملەكەتتىك ورگان پرەزيدەنتكە تىكەلەي باعىنادى جانە ەسەپ بەرەدى.
قاۋىپسىزدىك كەڭەسى – ۇلتتىق قاۋىپسىزدىك پەن ەلدىڭ قورعانىس قابىلەتىن قامتاماسىز ەتۋ، ەگەمەندىگىن قورعاۋ سالاسىنداعى بىرىڭعاي مەملەكەتتىك ساياساتتى ۇيلەستىرەتىن كونستيتۋتسيالىق القالى ورگان. قولدانىستاعى زاڭناماعا سايكەس، قاۋىپسىزدىك كەڭەسىنىڭ توراعاسى قىزمەتىن پرەزيدەنت اتقارادى.
مەملەكەت باسشىسى بۇعان دەيىن قۇرىلتايدىڭ ءبىرىنشى شاقىرىلىمىنىڭ العاشقى سەسسياسىنىڭ اشىلۋىندا قاۋىپسىزدىك كەڭەسى توراعاسىنىڭ جاڭا ورىنباسارى قىزمەتى ەنگىزىلەتىنىن ايتقان.
«قۇرىلتايدىڭ قۇرىلىمى قالىپتاسقاننان كەيىن دەپۋتاتتاردىڭ قاراۋىنا ۆيتسە-پرەزيدەنت پەن پرەمەر-ءمينيستردىڭ كانديداتۋرالارىن ەنگىزەمىن. ودان كەيىن سىزدەرمەن كونسۋلتاتسيالار وتكىزگەن سوڭ ۇكىمەت مۇشەلەرىن تاعايىندايمىن. سونىمەن قاتار قاۋىپسىزدىك كەڭەسى توراعاسىنىڭ جاڭا ورىنباسارى قىزمەتىنە تاعايىنداۋ جۇرگىزىلەدى»، – دەدى پرەزيدەنت توقاەۆ.
20 تامىزدا پرەزيدەنت قاۋىپسىزدىك كەڭەسىنىڭ وتىرىسىن وتكىزىپ، سيرەك جەر مەتالدارى سالاسىن دامىتۋ ماسەلەلەرىن قاراعان.
ايتا كەتەيىك، قاۋىپسىزدىك كەڭەسىنىڭ مارتەبەسى سوڭعى جىلدارى بىرنەشە رەت وزگەردى.
2018 جىلى زاڭناماعا ەنگىزىلگەن وزگەرىستەردەن كەيىن قازاقستاننىڭ تۇڭعىش پرەزيدەنتى نۇرسۇلتان نازارباەۆقا قاۋىپسىزدىك كەڭەسىن ءومىر بويى باسقارۋ قۇقىعى بەرىلدى. بۇل نورما سول كەزدەگى «تۇڭعىش پرەزيدەنت – ەلباسى» تۋرالى كونستيتۋتسيالىق زاڭدا بەكىتىلگەن ەدى.
نۇرسۇلتان نازارباەۆ 2019 جىلى پرەزيدەنتتىك وكىلەتتىگىن توقتاتقاننان كەيىن دە قاۋىپسىزدىك كەڭەسىنىڭ توراعاسى قىزمەتىن ساقتاپ قالدى.
الايدا 2022 جىلعى قاڭتار وقيعالارىنان كەيىن قاۋىپسىزدىك كەڭەسىنە قاتىستى زاڭناماعا وزگەرىستەر ەنگىزىلىپ، پرەزيدەنتتىڭ وسى ورگاندى باسقارۋى بەكىتىلدى. قولدانىستاعى زاڭ بويىنشا قاۋىپسىزدىك كەڭەسىنىڭ توراعاسى – قازاقستان پرەزيدەنتى.
