Prezident Qasym-Jomart Toqaev «Qazaqstan Respublikasynyŋ memlekettık basqaru jüiesın odan ärı jetıldıru şaralary turaly» Jarlyqqa qol qoidy, dep habarlaidy “Adyrna”.
Qūjatqa säikes, Qazaqstan Respublikasy Qauıpsızdık keŋesınıŋ apparaty memlekettık organ retınde qūryldy.
Jaŋa memlekettık organ Prezidentke tıkelei baǧynady jäne esep beredı.
Qauıpsızdık keŋesı – ūlttyq qauıpsızdık pen eldıŋ qorǧanys qabıletın qamtamasyz etu, egemendıgın qorǧau salasyndaǧy bıryŋǧai memlekettık saiasatty üilestıretın konstitusiialyq alqaly organ. Qoldanystaǧy zaŋnamaǧa säikes, Qauıpsızdık keŋesınıŋ töraǧasy qyzmetın Prezident atqarady.
Memleket basşysy būǧan deiın Qūryltaidyŋ bırınşı şaqyrylymynyŋ alǧaşqy sessiiasynyŋ aşyluynda Qauıpsızdık keŋesı töraǧasynyŋ jaŋa orynbasary qyzmetı engızıletının aitqan.
«Qūryltaidyŋ qūrylymy qalyptasqannan keiın deputattardyŋ qarauyna vise-prezident pen Premer-Ministrdıŋ kandidaturalaryn engızemın. Odan keiın sızdermen konsultasiialar ötkızgen soŋ Ükımet müşelerın taǧaiyndaimyn. Sonymen qatar Qauıpsızdık keŋesı töraǧasynyŋ jaŋa orynbasary qyzmetıne taǧaiyndau jürgızıledı», – dedı Prezident Toqaev.
20 tamyzda Prezident Qauıpsızdık keŋesınıŋ otyrysyn ötkızıp, sirek jer metaldary salasyn damytu mäselelerın qaraǧan.
Aita keteiık, qauıpsızdık keŋesınıŋ märtebesı soŋǧy jyldary bırneşe ret özgerdı.
2018 jyly zaŋnamaǧa engızılgen özgerısterden keiın Qazaqstannyŋ tūŋǧyş prezidentı Nūrsūltan Nazarbaevqa Qauıpsızdık keŋesın ömır boiy basqaru qūqyǧy berıldı. Būl norma sol kezdegı «Tūŋǧyş Prezident – Elbasy» turaly konstitusiialyq zaŋda bekıtılgen edı.
Nūrsūltan Nazarbaev 2019 jyly prezidenttık ökılettıgın toqtatqannan keiın de Qauıpsızdık keŋesınıŋ töraǧasy qyzmetın saqtap qaldy.
Alaida 2022 jylǧy Qaŋtar oqiǧalarynan keiın Qauıpsızdık keŋesıne qatysty zaŋnamaǧa özgerıster engızılıp, Prezidenttıŋ osy organdy basqaruy bekıtıldı. Qoldanystaǧy zaŋ boiynşa Qauıpsızdık keŋesınıŋ töraǧasy – Qazaqstan Prezidentı.
