قازاقستان پرەزيدەنتى قاسىم-جومارت توقاەۆ بىشكەكتە وتكەن شانحاي ىنتىماقتاستىق ۇيىمىنا (شىۇ) مۇشە مەملەكەتتەر باسشىلارى كەڭەسىنىڭ وتىرىسىنا قاتىستى، دەپ حابارلايدى "ادىرنا" ءتىلشىسى.
مەملەكەت باسشىسى جيىندى جوعارى دەڭگەيدە ۇيىمداستىرعانى ءۇشىن قىرعىزستان پرەزيدەنتى سادىر جاپاروۆقا جانە قىرعىز حالقىنا العىس ءبىلدىردى. سونداي-اق قىرعىزستان مەن وزبەكستاننىڭ تاۋەلسىزدىگىنىڭ 35 جىلدىعىمەن قۇتتىقتادى.
پرەزيدەنتتىڭ ايتۋىنشا، شيرەك عاسىر ىشىندە شىۇ ەۋرازيانىڭ ۇلكەن بولىگىن قامتيتىن جانە ادامزاتتىڭ جارتىسىنا جۋىعىن بىرىكتىرەتىن ىقپالدى حالىقارالىق ۇيىمعا اينالدى.
پرەزيدەنت قاسىم-جومارت توقاەۆ قازىرگى حالىقارالىق جاعدايعا دا توقتالدى. ونىڭ پىكىرىنشە، الەمدە ىنتىماقتاستىقتان گورى ءبولىنۋ، ءوزارا تۇسىنىستىكتەن گورى گەوساياسي باسەكەلەستىك كۇشەيىپ كەلەدى.
«بىرىگۋدەن گورى جىككە ءبولىنۋ، ىنتىماقتاستىق نيەتىنەن گورى گەوساياسي باقتالاستىق باسىم ءتۇسىپ، مۇددەلەر تەڭگەرىمىن ىزدەۋدىڭ ورنىنا ارازدىق ءورشىپ بارادى. ءوزارا سەنىمگە سەلكەۋ ءتۇستى»، – دەدى پرەزيدەنت.
مەملەكەت باسشىسى وسى جاعدايدا شىۇ-نىڭ ماڭىزى ارتا تۇسەتىنىن اتاپ ءوتتى. ونىڭ سوزىنشە، ۇيىم اسكەري-ساياسي بلوك رەتىندە ارەكەت ەتپەيدى جانە قانداي دا ءبىر مەملەكەتكە قارسى باعىتتالماعان.
پرەزيدەنت شىۇ قىزمەتىنىڭ نەگىزىندە ەگەمەندىكتى قۇرمەتتەۋ، ىشكى ىستەرگە ارالاسپاۋ، ءوزارا سەنىم، اشىقتىق پەن ىنتىماقتاستىق قاعيداتتارى جاتقانىن ايتتى.
ء«بىزدىڭ باستى ماقساتىمىز – قۋاتتى ءارى وركەندەگەن شىۇ قوعامداستىعىن قۇرۋ»، – دەدى مەملەكەت باسشىسى.
