مۇحتار تىلەۋبەردى قازاقستاننىڭ جاڭا سىرتقى ىستەر ءمينيسترى بولىپ تاعايىندالدى. اقوردا تاراتقان اقپاراتقا ساي، ءتيىستى جارلىققا مەملەكەت باسشىسى قاسىم-جومارت توقاەۆ قول قويدى، دەپ حابارلايدى “الىرنا”.
"مەملەكەت باسشىسىنىڭ جارلىعىمەن مۇحتار بەسكەنۇلى تىلەۋبەردى قازاقستان رەسپۋبليكاسىنىڭ سىرتقى ىستەر ءمينيسترى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى", – دەپ جازىلعان رەسمي اقپاراتتا.
مۇحتار بەسكەنۇلى 1968 جىلعى 30 ماۋسىمدا تۋىلعان. س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ فيلوسوفيا-ەكونوميكا فاكۋلتەتىن بىتىرگەن، م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى جانىنداعى ازيا جانە افريكا ينستيتۋتىندا جانە يەنسە ۋنيۆەرسيتەتى (كورەي رەسپۋبليكاسى) جانىنداعى تىلدەر ينستيتۋتىندا تاجىريبە العان. وقۋدى اياقتاعاننان كەيىن ءال-فارابي اتىنداعى قازۇۋ-ءدىڭ فيلوسوفيا تاريحى جانە قىتاي فيلولوگياسى كافەدرالارىندا جۇمىس ىستەگەن.
ديپلوماتيالىق قىزمەتىن 1993 جىلى اتتاشە لاۋازىمىنان باستادى. ورتالىق اپپاراتتاعى جۇمىس بارىسىندا ازيا ەلدەرى باسقارماسىنىڭ ءۇشىنشى حاتشىسى، ازيا دەپارتامەنتىنىڭ ءبىرىنشى حاتشىسى، ەكىجاقتى ىنتىماقتاستىق دەپارتامەنتىنىڭ ءبولىم باستىعى قىزمەتتەرىن اتقاردى.
شەتەلدە قازاقستاننىڭ كورەي رەسپۋبليكاسىنداعى ەلشىلىگىندە ەكىنشى حاتشى جانە يزرايل مەملەكەتىندەگى ەلشىلىگىندە كەڭەسشى بولىپ جۇمىس ىستەدى. قر پرەزيدەنتىنىڭ اكىمشىلىگىندە مەملەكەتتىك حاتشىنىڭ سىرتقى ساياسات ماسەلەلەر جونىندەگى كەڭەسشىسى لاۋازىمىندا جۇمىس ىستەدى.
2003 جىلى سىرتقى ىستەر ۆيتسە-ءمينيسترى بولىپ تاعايىندالدى.
2004 جىلى ەلىمىزدىڭ مالايزياداعى ەلشىسى جانە 2005 جىلدان باستاپ يندونەزيا رەسپۋبليكاسى، برۋنەي دارۋسسالام جانە فيليپپين رەسپۋبليكاسىنداعى ەلشىسى قىزمەتىن قوسا اتقاردى.
2009 جىلى قازاقستاننىڭ شۆەيتساريا كونفەدەراتسياسىنداعى ەلشىسى بولىپ تاعايىندالدى جانە ليحتەنشتەين كنيازدىگى مەن ۆاتيكان مەملەكەتىندە ەلشى قىزمەتىن قوسا اتقاردى، سونىمەن قاتار جەنەۆاداعى بۇۇ بولىمشەسىندە جانە باسقا دا حالىقارالىق ۇيىمداردا قازاقستان رەسپۋبليكاسىنىڭ تۇراقتى وكىلى بولدى.
2015 جىلى قازاقستاننىڭ يەرۋساليمدىك اۋليە يوانن ەگەمەندى اسكەري گوسپيتالەرلەر وردەنى جانىنداعى، رودوستاعى جانە مالتاداعى قوسا اتقارۋشى ەلشىسى بولىپ اككرەديتتەلگەن.
2016-2019 جىلدارى قر سىرتقى ىستەر ءمينيسترىنىڭ ءبىرىنشى ورىنباسارى بولعان.
2019 جىلعى قىركۇيەك ايىندا قر سىرتقى ىستەر ءمينيسترى لاۋازىمىنا تاعايىندالعان.
قازاقستاننىڭ اۋسترياداعى ەلشىسى بولىپ تاعايىندالعانعا دەيىن 2021 جىلعى قاڭتاردان باستاپ 2023 جىلعى ءساۋىر ارالىعىندا قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى قىزمەتىن اتقارعان.
توتەنشە جانە وكىلەتتى ەلشى ديپلوماتيالىق دارەجەسىنە يە. اعىلشىن، كورەي تىلدەرىن مەڭگەرگەن.
