ءورت شىققان ساتتە كوپشىلىك قاۋىپسىز جەرگە شىعۋعا اسىقسا، ءورت سوندىرۋشىلەر جالىن شارپىعان عيماراتقا قاراي بەت الادى. ولاردىڭ مىندەتى – ءورتتى اۋىزدىقتاپ قانا قويماي، قاۋىپكە تاپ بولعان ادامداردى قۇتقارۋ. بۇل ءۇشىن كاسىبي دايىندىقپەن قاتار، سابىرلىلىق پەن جاۋاپكەرشىلىك قاجەت. الايدا توتەنشە جاعداي كەزىندە ءورت سوندىرۋشىلەر قانداي قيىندىقتارعا تاپ بولادى؟
قاۋىپتى ساتتە شەشىمدى قالاي قابىلدايدى؟ ال قىزمەتتەن تىس ۋاقىتتا ولاردى نە الاڭداتادى؟ «ادىرنا» ءتىلشىسى وسى جانە وزگە دە سۇراقتارعا جاۋاپ الۋ ءۇشىن اتىراۋ قالاسىنداعى №3 ءورت ءسوندىرۋ ءبولىمىنىڭ قاراۋىل باستىعى رينات وتەۋليەۆپەن سۇحباتتاستى.
«ءوزىم ءۇشىن ەمەس، جەكە قۇرام ءۇشىن دە جاۋاپ بەرەمىن»
رينات وتەۋليەۆ 2020 جىلى مەكتەپتى اياقتاپ، كوكشەتاۋ تەحنيكالىق ينستيتۋتىنا وقۋعا تۇسكەن. 2024 جىلى ازاماتتىق قورعاۋ اكادەمياسىن ءتامامداپ، ەڭبەك جولىن اتىراۋ قالاسىنداعى توتەنشە جاعدايلار باسقارماسىنىڭ №3 ءورت ءسوندىرۋ بولىمىندە جالعاستىرعان. قازىر ول وسى بولىمدە قاراۋىل باستىعى قىزمەتىن اتقارادى.
ء«ورت ءسوندىرۋشى بولۋ – بالا كەزگى ارمانىم. كىشكەنتاي كەزىمنەن وسى ماماندىققا قىزىعىپ، ادامدارعا كومەكتەسكىم كەلدى. اسىرەسە، قيىن جاعدايعا تاپ بولعان جانداردى قۇتقارىپ، ولاردىڭ امان قالۋىنا ۇلەس قوسۋدى قالادىم. سوندىقتان وسى ماماندىقتى سانالى تۇردە تاڭدادىم. قازىر ارتقا قاراپ، ءوز شەشىمىمە وكىنبەيمىن. كەرىسىنشە، ادامدارعا كومەكتەسۋگە مۇمكىندىك بەرەتىن وسىنداي جاۋاپتى قىزمەتتى تاڭداعانىما قۋانامىن»، – دەيدى ول.
الايدا بۇل ماماندىقتى تاڭداۋ – تەك باتىلدىق تانىتۋمەن شەكتەلمەيدى. ءورت ءسوندىرۋشى ءۇشىن ءار ساتتە جيناقى ءجۇرۋ، جىلدام شەشىم قابىلداۋ جانە ءوز ارەكەتىنە جاۋاپ بەرە ءبىلۋ ماڭىزدى. اسىرەسە، قاراۋىل باستىعى رەتىندە رينات ءوز قاۋىپسىزدىگىمەن قاتار، بىرگە قىزمەت اتقاراتىن جەكە قۇرامنىڭ ومىرىنە دە جاۋاپتى.
«مەن تەك ءوزىم ءۇشىن ەمەس، وزىممەن بىرگە قىزمەت اتقاراتىن جەكە قۇرام ءۇشىن دە جاۋاپ بەرەمىن. سوندىقتان ءار شاقىرتۋ الدىندا ولاردىڭ دايىندىعىنا، تەحنيكا قاۋىپسىزدىگى ەرەجەلەرىنىڭ ساقتالۋىنا ەرەكشە ءمان بەرەمىز. مەن ءۇشىن ەڭ باستىسى – تاپسىرمانى ورىنداپ، بارلىق جەكە قۇرامنىڭ امان-ەسەن بولىمگە ورالۋى. ءورت كەزىندە قورقىنىشقا بەرىلمەي، دۇرىس شەشىم قابىلداي ءبىلۋ قاجەت. سونىمەن قاتار، ۇجىممەن جۇمىس ىستەي ءبىلۋ كەرەك، ويتكەنى ءورت سوندىرۋدە ءبىر ادامنىڭ ەمەس، قاراۋىلدىڭ بىرلەسە اتقارعان جۇمىسى ماڭىزدى»، – دەيدى ول.
«بايزارداعى» ءورت
ريناتتىڭ قىزمەتىندە ەرەكشە ەستە قالعان وقيعالاردىڭ ءبىرى – اتىراۋداعى «بايزار» ساۋدا ويىن-ساۋىق ورتالىعىندا بولعان ءورت. ءتىلسىز جاۋدى سوندىرۋگە وبلىستىق توتەنشە جاعدايلار دەپارتامەنتىنەن 90 قۇتقارۋشى مەن 12 تەحنيكا جۇمىلدىرىلعان. وقيعا كەزىندە ساۋدا ورتالىعىنىڭ عيماراتىنان 80 ادام، ونىڭ ىشىندە 45 بالا قاۋىپسىز جەرگە ەۆاكۋاتسيالانعان.
ء«بىز تىكەلەي ءورتتىڭ ىشىنە كىرىپ، ءورت ءسوندىرۋ جۇمىستارىن جۇرگىزدىك. ەڭ باستى قيىندىق – عيماراتتىڭ ءىشى قويۋ قارا تۇتىنگە تولىپ، كورىنۋ مۇمكىندىگىنىڭ وتە تومەن بولۋى ەدى. سونىڭ سالدارىنان زارداپ شەككەن ادامداردى ىزدەستىرۋ جۇمىستارى قيىندادى. ودان بولەك، جوعارى تەمپەراتۋرا دا كەدەرگى كەلتىردى. عيماراتتىڭ ىشىندەگى كونسترۋكتسيالاردان ءوتۋ، كەيبىرىن اشىپ، بۇزۋ جۇمىستارى وڭاي بولعان جوق. دەسە دە، ءبىز بارلىق ادامدى امان الىپ قالدىق»، - دەپ ەسكە الادى رينات.
ايتۋىنشا، وسىنداي توتەنشە جاعدايلاردا ءار سەكۋندتىڭ ماڭىزى ارتا تۇسەدى.
«وسىنداي وقيعالاردان كەيىن قىزمەتىڭە دەگەن جاۋاپكەرشىلىگىڭ بۇرىنعىدان دا ارتا تۇسەدى. ءورتتىڭ ىشىندە جۇرگەندە ۋاقىتتىڭ ءار سەكۋندى ماڭىزدى ەكەنىن تۇسىنەسىڭ. ەڭ باستىسى – ادام ءومىرىن ساقتاۋ. ءبىز ءۇشىن بۇل جاي عانا مىندەت ەمەس، ءار شاقىرتۋ كەزىندە ءبىرىنشى كەزەكتە تۇراتىن ماقسات. قانشالىقتى قيىن بولسا دا، جاعدايدى دۇرىس باعالاپ، قولىڭنان كەلگەننىڭ ءبارىن جاساۋعا تىرىساسىڭ»، – دەيدى ول.
«ءبىر اۋىز العىس – جۇمىسىڭنىڭ ماڭىزى»
ءورت سوندىرۋشىلەر وقيعا ورنىنا ادامداردى قۇتقارۋ ءۇشىن اتتانادى. الايدا ءار جاعدايدىڭ سوڭى بىردەي بولا بەرمەيدى. كەيدە قانشا كۇش جۇمساپ، بار مۇمكىندىكتى پايدالانعانىمەن، ادام ءومىرىن ساقتاپ قالۋ مۇمكىن بولمايتىن ساتتەر دە كەزدەسەدى. رينات مۇنداي جاعدايلاردىڭ قىزمەتكەرگە وڭاي تيمەيتىنىن جاسىرمايدى.
«بۇل – وتە اۋىر جاعداي. ءبىز ءار شاقىرتۋعا، ەڭ الدىمەن، ادام ءومىرىن ساقتاپ قالۋ ءۇشىن بارامىز. وقيعا ورنىنا جەتكەندە، جاعدايدى باعالاپ، ادامدارعا قالاي كومەكتەسۋگە بولاتىنىن ويلايسىڭ. بار كۇشىڭدى سالىپ، قولىڭنان كەلگەننىڭ ءبارىن جاساۋعا تىرىساسىڭ. بىراق كەيدە جاعداي ءبىز ويلاعانداي بولمايدى. مۇنداي ساتتەردى ادام رەتىندە دە اۋىر قابىلدايسىڭ. ويتكەنى ءار جاننىڭ ءومىرى ماڭىزدى. سوعان قاراماستان، ءبىز ءوز مىندەتىمىزدى سوڭىنا دەيىن ورىنداۋعا تىرىسامىز. قانداي جاعداي بولسا دا، كومەككە مۇقتاج ادامداردى قۇتقارۋ ءۇشىن بار مۇمكىندىكتى پايدالانۋىمىز كەرەك. بۇل ماماندىقتا جاۋاپكەرشىلىكتەن قاشۋعا بولمايدى»، - دەيدى ول.
ال قۇتقارىلعان ادامداردىڭ العىسىن ەستۋ – قىزمەتتەگى ەڭ قۋانىشتى ساتتەردىڭ ءبىرى.
«كەيدە ءبىر اۋىز راقمەتتىڭ ءوزى اتقارعان جۇمىسىڭنىڭ قانشالىقتى ماڭىزدى ەكەنىن سەزدىرەدى. سەبەبى ءبىر ادامعا بولسا دا كومەگىڭ تيگەنىن تۇسىنەسىڭ. كەيدە ادامدار ءبىزدىڭ جۇمىسىمىزدىڭ قيىندىعىن تۇسىنبەۋى مۇمكىن. بىراق ءبىز ءۇشىن ەڭ باستىسى – ادامداردىڭ اماندىعى جانە ءوز مىندەتىمىزدى دۇرىس ورىنداۋ»،- دەيدى قاراۋىل باستىعى.
كوپشىلىك بىلە بەرمەيتىن كۇندەلىكتى دايىندىق
ءورت سوندىرۋشىلەردىڭ جۇمىسى ءورت شىققان كەزدە وقيعا ورنىنا بارۋمەن عانا شەكتەلمەيدى. قاۋىپتى جاعدايعا دايىن بولۋ ءۇشىن ولار كۇن سايىن دەنە دايىندىعىن شىڭداپ، ارنايى ساباقتارعا قاتىسادى، تەحنيكا مەن قۇرال-جابدىقتاردىڭ جارامدىلىعىن تەكسەرەدى.
«كوپشىلىك ءبىزدى تەك ءورت سوندىرەدى دەپ ويلايدى. بىراق كۇندەلىكتى جۇمىسىمىز بۇدان الدەقايدا كوپ. ءبىز دەنە دايىندىعىمەن اينالىسامىز، ارنايى ساباقتار وتكىزەمىز، ءورت ءسوندىرۋ تەحنيكاسى مەن قۇرال-جابدىقتاردى تەكسەرەمىز. ءتۇرلى جاتتىعۋلار جاساپ، ءورت كەزىندە قولدانىلاتىن ادىستەردى ۇيرەنەمىز. مۇنىڭ ءبارى بەكەر ەمەس. توتەنشە جاعداي كەزىندە ۇزاق ويلانىپ تۇرۋعا مۇمكىندىك بولمايدى. سوندىقتان ءار ارەكەتكە الدىن الا دايىن بولۋىمىز كەرەك. قۇرال-جابدىقتاردىڭ جارامدىلىعى، جەكە قۇرامنىڭ دايىندىعى، ءار قىزمەتكەردىڭ ءوز مىندەتىن ءبىلۋى – وسىنىڭ ءبارى جۇمىستىڭ ناتيجەسىنە اسەر ەتەدى. ءبىزدىڭ ماقساتىمىز – كەز كەلگەن شاقىرتۋدا جاعدايدى دۇرىس باعالاپ، ادام ءومىرىن ساقتاپ قالۋ»،-دەيدى ول.
ءبىر تاۋلىك كەزەكشىلىك
رينات قىزمەت ەتەتىن بولىمدە جۇمىس كەستەسى ءبىر تاۋلىك كەزەكشىلىك پەن ءۇش تاۋلىك دەمالىس تارتىبىمەن ۇيىمداستىرىلعان. قىزمەتكەرلەر تاڭعى ساعات 08:00-دە كەزەكشىلىككە كەلىپ، كەلەسى كۇنى ءدال وسى ۋاقىتتا اۋىسىمدى تاپسىرادى. دەگەنمەن، قىزمەتتىڭ ەرەكشەلىگىنە بايلانىستى كەيدە دەمالىس كۇندەرى دە جۇمىسقا شاقىرىلۋى مۇمكىن.
«تاڭعى ساعات 8:00-دە جۇمىسقا كەلىپ، كەلەسى كۇنى تاڭعى 8:00-دە كەزەكشىلىكتى تاپسىرامىز. بىراق كەيدە جاعدايعا بايلانىستى دەمالىس كۇندەرى دە جۇمىسقا شاقىرتۋى مۇمكىن. ويتكەنى ءبىزدىڭ قىزمەت تاۋلىك بويى دايىندىقتى تالاپ ەتەدى. ءورت سوندىرۋشىلەردىڭ جۇمىسى تۇراقتى دايىندىقتى قاجەت ەتەدى. سەبەبى توتەنشە جاعدايدىڭ قاشان بولاتىنىن الدىن الا بولجاۋ مۇمكىن ەمەس. سوندىقتان ءار قىزمەتكەر كەز كەلگەن ۋاقىتتا مىندەتىن اتقارۋعا دايىن بولۋى كەرەك»،-دەيدى ول.
«قۇتقارۋشى قاۋىپسىزدىك ەرەجەسىن ساقتاسا، قۇتقارۋشى»
ريناتتىڭ ايتۋىنشا، ءورت سوندىرۋشىلەر دە قورقىنىش، ۋايىم مەن شارشاۋدى سەزىنەتىن قاراپايىم ادامدار. الايدا جاۋاپتى ساتتە ءوزىڭدى قولعا الىپ، ەموتسياعا بەرىلمەي ارەكەت ەتۋ قاجەت.
«بىزدە دە قورقىنىش، ۋايىم جانە شارشاۋ بولادى. ءورت كەزىندە قيىن جاعدايلار كەزدەسەدى. بىراق سول ساتتە ءوزىڭدى قولعا الىپ، دۇرىس ارەكەت ەتۋىڭ كەرەك»، - دەيدى ول.
قىزمەتتەن تىس ۋاقىتتا رينات دەمالىپ، وتباسىمەن جانە جاقىندارىمەن ۋاقىت وتكىزۋگە تىرىسادى. سپورتپەن اينالىسىپ، دوستارىمەن كەزدەسىپ، وزىنە ۇنايتىن ىستەرگە ۋاقىت بولەدى. ونىڭ سوزىنشە، دەمالىس كەزىندە كۇش جيناپ، كەلەسى كەزەكشىلىككە دايىن بولۋ دا ماڭىزدى ءرول اتقارادى.
جاقىندارى دا ونىڭ جۇمىسىنا الاڭدايدى. ويتكەنى ءار كەزەكشىلىكتىڭ قالاي اياقتالاتىنىن الدىن الا ءبىلۋ مۇمكىن ەمەس.
«جاقىندارىم مەن ءۇشىن الاڭدايدى. اسىرەسە، كەزەكشىلىككە كەتكەن كەزدە ۋايىمدايتىنىن بىلەمىن. ويتكەنى ءبىزدىڭ جۇمىسىمىزدا نە بولاتىنىن الدىن الا بولجاۋ مۇمكىن ەمەس. بىراق ولار مەنىڭ ماماندىعىمدى تۇسىنەدى جانە قولدايدى. مەن دە ءاردايىم قاۋىپسىزدىك ەرەجەلەرىن ساقتاپ، تاپسىرمانى دۇرىس ورىنداپ، ۇيگە امان-ەسەن ورالۋعا تىرىسامىن. وتباسىڭنىڭ سەنى كۇتىپ وتىرعانىن ءبىلۋ دە ۇلكەن جاۋاپكەرشىلىك جۇكتەيدى»،– دەيدى رينات وتەۋليەۆ.
ءورت سوندىرۋشىلەر – ادام ءومىرى مەن قوعام قاۋىپسىزدىگىن قورعاۋدا ماڭىزدى ءرول اتقاراتىن ماماندىق يەلەرى. بۇگىندە ولاردىڭ ەڭبەگى مەن ەرلىگىنە قۇرمەتپەن قاراپ، كۇن سايىن اتقارىپ جۇرگەن جاۋاپتى قىزمەتىن باعالاۋ اسا ماڭىزدى. سەبەبى قيىن ساتتە كومەككە كەلىپ، ادام ءومىرىن ساقتاپ قالۋ ءۇشىن تاۋەكەلگە باراتىن جانداردىڭ ەڭبەگى ءاردايىم قۇرمەتكە لايىق.
ديانا اسان
«ادىرنا» ۇلتتىق پورتالى
