بۇگىن ۇلىتاۋ وبلىسىندا ەلىمىز بويىنشا العاشقى اۋە قۇتقارۋ جاساعىنىڭ سالتاناتتى تۇردە اشىلۋى ءوتتى. سونىمەن قاتار وبلىس ورتالىعى – جەزقازعان قالاسىندا جاڭا ءورت ءسوندىرۋ بولىمشەسى ىسكە قوسىلدى. ايرىقشا كۇندە توتەنشەلىكتەرگە سۋ جاڭا تەحنيكا كىلتتەرى مەن بىرقاتار سالا قىزمەتكەرىنە قىزمەتتىك پاتەرلەردىڭ كىلتتەرى تابىس ەتىلدى.
ماڭىزدى شاراعا قر توتەنشە جاعدايلار ءمينيسترى شىڭعىس ارىنوۆ ارنايى قاتىسىپ، ايماقتىڭ توتەنشە جاعدايلارعا دەن قويۋ الەۋەتىن ارتتىرۋ باعىتىنداعى جۇمىستاردىڭ جوعارى دەڭگەيدە جۇزەگە اسىرىلىپ جاتقانىن اتاپ ءوتتى.
ۇلىتاۋ وبلىسىنىڭ اكىمى داستان رىسپەكوۆ قۇتتىقتاۋ سوزىندە اتالعان نىسانداردىڭ اشىلۋى ءوڭىر قاۋىپسىزدىگىن قامتاماسىز ەتۋدەگى اسا ماڭىزدى قادام ەكەنىن ايتىپ، قولداۋ كورسەتكەن توتەنشە جاعدايلار مينيسترلىگىنە جانە «قازاقمىس» كورپوراتسياسىنا العىس ءبىلدىردى.
«مەملەكەت باسشىسى وڭىرلەردىڭ قاۋىپسىزدىگىن كۇشەيتۋگە ەرەكشە ءمان بەرىپ كەلەدى. بۇگىن اشىلىپ وتىرعان اۋە قۇتقارۋ جاساعى مەن جاڭا ءورت ءسوندىرۋ بولىمشەسى – وسى باعىتتاعى ناقتى قادام. بۇل – ءبىزدىڭ تۇرعىندارىمىزدىڭ قاۋىپسىزدىگى مەن ءومىرىن قورعاۋعا ارنالعان ماڭىزدى ينۆەستيتسيا»، – دەدى ءوڭىر باسشىسى ءوز سوزىندە.
مينيستر شىڭعىس ارىنوۆ ءوز سوزىندە اۋە قۇتقارۋ ينفراقۇرىلىمىن دامىتۋ جۇمىستارى جالعاساتىنىن اتاپ ءوتتى.
«وسى ۇلگىدەگى جابدىقتالعان تىكۇشاق انگارلارىن ەلىمىزدىڭ ءتۇرلى وڭىرلەرىندە اشۋ جوسپارلانىپ وتىر. العاشقى نىساننىڭ ءدال ۇلىتاۋ وبلىسىندا ىسكە قوسىلۋى – ورتالىق وڭىرگە كورسەتىلگەن ۇلكەن قولداۋ ءارى ەلىمىزدىڭ توتەنشە جاعدايلارعا قارسى دايارلىعىن كۇشەيتۋگە باعىتتالعان ناقتى قادام»، – دەدى مينيستر.
سالتاناتتى ءىس-شارا بارىسىندا توتەنشە جاعدايلار سالاسىنداعى قىزمەتكەرلەر مەن ءوڭىردىڭ بەلسەندى ازاماتتارى ارنايى توسبەلگىلەرمەن جانە العىسحاتتارمەن ماراپاتتالدى.
ايتا كەتەيىك، بيىل توتەنشە جاعدايلار مينيسترلىگى ۇلىتاۋ وبلىسىنا زاماناۋي جابدىقتالعان تىكۇشاق بەرگەن بولاتىن. بۇل ءوڭىردىڭ قيىن جاعدايلارعا جەدەل دەن قويۋ مۇمكىندىگىن بىرنەشە ەسە ارتتىردى.
جىل سوڭىنا دەيىن ۇلىتاۋ وبلىسىنىڭ ساتباەۆ قالاسى مەن جايرەم كەنتىندە دە جاڭا ءورت ءسوندىرۋ بولىمدەرى اشىلۋى جوسپارلانىپ وتىر.
