اقتوبە قالاسىنداعى قوقىس پوليگونىندا ءورت بولىپ، قىزىل جالىن شامامەن ءبىر جارىم ساعات ىشىندە ءسوندىرىلدى، دەپ حابارلايدى "ادىرنا" ۇلتتىق پورتالى.
قالا اكىمدىگى ءباسپاسوز قىزمەتىنىڭ مالىمەتىنشە، ءورت 26 مامىر كۇنى ساعات 15:36-دا تىركەلگەن. ال ساعات 17:02-دە ءورت تولىق سوندىرىلگەن. جالىن شارپىعان اۋماقتىڭ كولەمى 600 شارشى مەتردى قۇرادى.
ءورت پوليگوننىڭ جاڭا بولىگىندەگى 18 كارتانىڭ ەكەۋىندە بولعان. قالعان 16 كارتادا بۇعان دەيىن توپىراق توسەلىپ، الدىن الۋ جۇمىستارى جۇرگىزىلگەنى حابارلاندى.
قازىرگى ۋاقىتتا اۋماقتا بىقسۋ پروتسەسى جالعاسىپ جاتىر. قايتا تۇتانۋ مەن ءتۇتىننىڭ قالاعا تارالۋىنىڭ الدىن الۋ ءۇشىن پوليگون اۋماعىنا قۇم مەن توپىراق توسەلۋدە.
ء«ورت قايتا تۇتانىپ، قالانى ءتۇتىن باسپاس ءۇشىن توتەنشە جاعدايلار قىزمەتى مەن جەرگىلىكتى اتقارۋشى ورگاندار بىرلەسىپ جۇمىس جۇرگىزىپ جاتىر»، – دەپ حابارلادى قالا اكىمدىگىنىڭ ءباسپاسوز قىزمەتى.
ءورتتى ءسوندىرۋ جانە سالدارىن جويۋ جۇمىستارىنا جەرگىلىكتى اتقارۋشى ورگانداردان 54 ادام، 25 كاماز، 3 بۋلدوزەر، 7 تيەگىش، 5 اسسەنيزاتورلىق تەحنيكا جانە 3 مدك تەحنيكاسى جۇمىلدىرىلعان.
سونىمەن قاتار اقتوبە وبلىستىق توتەنشە جاعدايلار دەپارتامەنتى تاراپىنان 48 قىزمەتكەر مەن 11 تەحنيكا تارتىلعان.
