Aqtöbe qalasyndaǧy qoqys poligonynda ört bolyp, qyzyl jalyn şamamen bır jarym saǧat ışınde söndırıldı, dep habarlaidy "Adyrna" ūlttyq portaly.
Qala äkımdıgı baspasöz qyzmetınıŋ mälımetınşe, ört 26 mamyr künı saǧat 15:36-da tırkelgen. Al saǧat 17:02-de ört tolyq söndırılgen. Jalyn şarpyǧan aumaqtyŋ kölemı 600 şarşy metrdı qūrady.
Ört poligonnyŋ jaŋa bölıgındegı 18 kartanyŋ ekeuınde bolǧan. Qalǧan 16 kartada būǧan deiın topyraq töselıp, aldyn alu jūmystary jürgızılgenı habarlandy.
Qazırgı uaqytta aumaqta byqsu prosesı jalǧasyp jatyr. Qaita tūtanu men tütınnıŋ qalaǧa taraluynyŋ aldyn alu üşın poligon aumaǧyna qūm men topyraq töselude.
«Ört qaita tūtanyp, qalany tütın baspas üşın tötenşe jaǧdailar qyzmetı men jergılıktı atqaruşy organdar bırlesıp jūmys jürgızıp jatyr», – dep habarlady qala äkımdıgınıŋ baspasöz qyzmetı.
Örttı söndıru jäne saldaryn joiu jūmystaryna jergılıktı atqaruşy organdardan 54 adam, 25 KamAZ, 3 buldozer, 7 tiegış, 5 assenizatorlyq tehnika jäne 3 MDK tehnikasy jūmyldyrylǧan.
Sonymen qatar Aqtöbe oblystyq tötenşe jaǧdailar departamentı tarapynan 48 qyzmetker men 11 tehnika tartylǧan.
