اقتوبە كوشەلەرىندە بالىقتى قارماقپەن ەمەس، قولمەن ۇستاۋعا بولادى. بۇل تۋرالى جۋرناليست كوزاچكوۆ تەلەگرام ارناسىندا جازىپ، ۆيدەو جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، اۋەجاي ايماعىنان قالاعا سۋ جىبەرىلگەن. سازدى وزەنى ارناسىنان اسىپ، كوپىرلەر مەن جولداردى سۋ باسقان. ال كولىكتەر سۋدا تۇرىپ قالعان.
جاريالانعان ۆيدەودا تۇرعىننىڭ كوشەدەگى سۋدان بالىق ۇستاپ العانىن بايقاۋعا بولادى.
ەسكە سالساق، اقتوبە وبلىسىنداعى ەرىگەن سۋ جولدار مەن كوپىرلەردى باسىپ، ۇيلەرگە دە كىرە باستاعان بولاتىن. وبلىستاعى 12 اۋداننىڭ قارعالىدان وزگەلەرى سۋ تاسقىنىنان تۇگەل زارداپ شەككەن. ءۇي-جايىن تاسقىن سۋ باسقان قوبدا اۋدانىنداعى قاناي، شالقار اۋدانىنداعى بۇيرەكتوبە، مۇعالجار اۋدانىنداعى جاعابۇلاق اۋىلىنىڭ تۇرعىندارى قاۋىپسىز جەرگە كوشىرىلگەن.
اقتوبە اكىمدىگى وبلىس ورتالىعىنداعى ءۇش مەكتەپتىڭ عيماراتىنا سۋ كىرگەنىن حابارلادى. ازىرشە تاسقىننان بۇلىنگەن تۇرعىن ۇيلەر مەن عيماراتتار سانى تۋرالى تولىققاندى مالىمەت جوق.
27 ناۋرىز اقتوبە اۋەجايى سىرتقى جانە ىشكى رەيستەردى قابىلداۋدى توقتاتقان بولاتىن. سەبەبى اۋەجايدىڭ ۇشىپ-قونۋ جولاعىن تاسقىن سۋ باسقان.
اۋەجاي اكىمشىلىگى باستاپقىدا ۇشۋ جولاعى كەشكى بەسكە دەيىن تازارتىلادى دەپ حابارلاعان بولاتىن. كەيىن اۋەجايدىڭ ساعات 21.00-گە دەيىن جابىلعانىنى بەلگىلى بولدى.
بۇگىن، 28 ناۋرىز اقتوبە اۋەجايى جۇمىسىن قايتا باستادى.
سونداي-اق، اقتوبە وبلىسىندا سۋ تاسقىنىنان زارداپ شەككەندەردىڭ ماتەريالدىق شىعىنىن ەسەپتەيتىن كوميسسيا قۇرىلاتىنىن وبلىس اكىمى اسحات شاحاروۆ مالىمدەگەن بولاتىن.
