Aqtóbe kóshelerinde balyqty qarmaqpen emes, qolmen ustaýǵa bolady. Bul týraly jýrnalıst Kozachkov telegram arnasynda jazyp, vıdeo jarııalady, dep habarlaıdy “Adyrna” ulttyq portaly.
Aqparatqa súıensek, áýejaı aımaǵynan qalaǵa sý jiberilgen. Sazdy ózeni arnasynan asyp, kópirler men joldardy sý basqan. Al kólikter sýda turyp qalǵan.
Jarııalanǵan vıdeoda turǵynnyń kóshedegi sýdan balyq ustap alǵanyn baıqaýǵa bolady.
Eske salsaq, Aqtóbe oblysyndaǵy erigen sý joldar men kópirlerdi basyp, úılerge de kire bastaǵan bolatyn. Oblystaǵy 12 aýdannyń Qarǵalydan ózgeleri sý tasqynynan túgel zardap shekken. Úı-jaıyn tasqyn sý basqan Qobda aýdanyndaǵy Qanaı, Shalqar aýdanyndaǵy Búırektóbe, Muǵaljar aýdanyndaǵy Jaǵabulaq aýylynyń turǵyndary qaýipsiz jerge kóshirilgen.
Aqtóbe ákimdigi oblys ortalyǵyndaǵy úsh mekteptiń ǵımaratyna sý kirgenin habarlady. Ázirshe tasqynnan búlingen turǵyn úıler men ǵımarattar sany týraly tolyqqandy málimet joq.
27 naýryz Aqtóbe áýejaıy syrtqy jáne ishki reısterdi qabyldaýdy toqtatqan bolatyn. Sebebi áýejaıdyń ushyp-qoný jolaǵyn tasqyn sý basqan.
Áýejaı ákimshiligi bastapqyda ushý jolaǵy keshki beske deıin tazartylady dep habarlaǵan bolatyn. Keıin áýejaıdyń saǵat 21.00-ge deıin jabylǵanyny belgili boldy.
Búgin, 28 naýryz Aqtóbe áýejaıy jumysyn qaıta bastady.
Sondaı-aq, Aqtóbe oblysynda sý tasqynynan zardap shekkenderdiń materıaldyq shyǵynyn esepteıtin komıssııa qurylatynyn oblys ákimi Ashat Shaharov málimdegen bolatyn.
