كيەۆ حالىقارالىق اۆياتسيا ورگاندارىنا رەسەي اسپانىنداعى ازاماتتىق ۇشاقتار ءۇشىن قاۋىپ-قاتەردىڭ ارتىپ كەلە جاتقانىن رەسمي تۇردە مالىمدەدى، دەپ حابارلايدى «ادىرنا» ءتىلشىسى Euronews-كە سىلتەمە جاساپ.
2 قىركۇيەكتە ۋكراينانىڭ سىرتقى ىستەر ءمينيسترى اندرەي سيبيگا كيەۆتىڭ حالىقارالىق ازاماتتىق اۆياتسيا ۇيىمىنا ء(ىساو) رەسەيدىڭ اۋە كەڭىستىگى ازاماتتىق رەيستەر ءۇشىن قاۋىپتى ەكەنى تۋرالى رەسمي تۇردە حابارلاعانىن جەتكىزگەن.
«بۇل – ءبىزدىڭ ءىساو-عا، بارلىق اۋە كومپانياسى مەن ۇكىمەتتەرگە ساقتىق شارالارىن ساقتاۋ قاجەتتىگى تۋرالى حابارلاۋ جونىندەگى جاۋاپتى شەشىمىمىز. رەسەي ءوز مىندەتىن ورىنداپ، ولاردى حاباردار ەتۋدەن باس تارتسا دا، ءبىز قاۋىپسىزدىك شارالارىن ساقتاۋعا شاقىرامىز. ءبىزدىڭ ماقساتىمىز – بايقاۋسىزدا بولاتىن وقيعالاردىڭ الدىن الۋ»، – دەپ جازدى ول X الەۋمەتتىك جەلىسىندە.
رەسمي حابارلاما ۋكراينا پرەزيدەنتى ۆلاديمير زەلەنسكي اۋە كومپانيالارىن، ساقتاندىرۋ ۇيىمدارىن جانە رەسەيدىڭ نەگىزگى اۋەجايلارىن پايدالاناتىن بيزنەستى ەلدىڭ اۋە كەڭىستىگى كيەۆتىڭ الىس قاشىقتىققا ۇشاتىن دروندارمەن جۇرگىزەتىن وپەراتسيالارىن كەڭەيتۋىنە بايلانىستى بارعان سايىن قاۋىپتى بولىپ بارا جاتقانىن ەسكەرتكەننەن ءبىر كۇن وتكەن سوڭ جاسالعان.
زەلەنسكي ۋكراينا ازاماتتىق اۆياتسياعا قاۋىپ توندىرمەيتىنىن اتاپ وتكەن. الايدا رەسەي اۋماعىندا ۋكراينالىق درونداردىڭ وپەراتسيالارى اۋقىمىنىڭ ۇلعايۋىنا بايلانىستى بۇل تاۋەكەلدەردى بۇدان ءارى ەلەمەۋگە بولمايتىنىن ەسكەرتكەن.
Reuters پەن Flightradar24 مالىمەتىنشە، 2 قىركۇيەكتە ماسكەۋ اۋەجايلارىندا رەيستەر جاپپاي كەشىكتىرىلىپ، توقتاتىلعان. شەرەمەتەۆو اۋەجايىندا 235 رەيس كەشىكتىرىلىپ، 21 رەيس توقتاتىلعان. ۆنۋكوۆودا 94 رەيس كەشىگىپ، 22 رەيس توقتاتىلدى.
ۋكراينانىڭ اۋە كەڭىستىگى 2022 جىلعى 24 اقپاننان بەرى ازاماتتىق اۆياتسيا ءۇشىن جابىق. ال رەسەيدىڭ ازاماتتىق اۆياتسياسى سوعىس ءجۇرىپ جاتقانىنا قاراماستان، جۇمىسىن جالعاستىرىپ كەلەدى.
باسىلىمنىڭ اتاپ وتۋىنشە، رەسەيدىڭ اۋە كەڭىستىگى ارقىلى حالىقارالىق جولاۋشىلار تاسىمالىنىڭ ەداۋىر بولىگى ءالى دە جۇزەگە اسىرىلادى.
ەۋروپالىق جانە امەريكالىق اۋە كومپانيالارى 2022 جىلى رەسەي اۋماعىنىڭ ۇستىمەن ۇشۋدى توقتاتقان. ال Emirates, Turkish Airlines, Air India, Etihad جانە Qatar Airways سەكىلدى ءىرى اۋە تاسىمالداۋشىلارى، سونداي-اق بىرنەشە قىتايلىق اۋە كومپانياسى رەسەيگە رەيستەر ورىنداۋدى جانە ونىڭ اۋماعى ارقىلى ترانزيتتىك ۇشۋلاردى جالعاستىرىپ كەلەدى.
بۇعان دەيىن پرەزيدەنت ۆلاديمير زەلەنسكي رەسەيدىڭ اۋە كەڭىستىگىن پايدالاناتىندارعا ەسكەرتۋ جاساعان ەدى.
