ەۋرووداققا مۇشە ەلدەردىڭ ءبىرىنىڭ بارلاۋ ەسەبىندە كرەملدە رەسەي پرەزيدەنتى ۆلاديمير پۋتينگە قارسى ىقتيمال قاستاندىق قاۋپىنە بايلانىستى الاڭداۋشىلىق ارتقانى ايتىلعان. قۇجاتپەن CNN, Financial Times جانە ۆاجنىە يستوري جۋرناليستەرى تانىسقان، دەپ حابارلايدى "ادىرنا".
ەسەپتە شابۋىل دروندار (بپلا) ارقىلى جاسالۋى مۇمكىن دەگەن بولجام دا كەلتىرىلەدى. وسىعان بايلانىستى قاۋىپسىزدىك شارالارى كۇشەيتىلگەن. فەدەرالدىق كۇزەت قىزمەتى پرەزيدەنت اكىمشىلىگىندەگى تەكسەرىستەردى قاتاڭداتىپ، مەملەكەت باسشىسىنىڭ قوزعالىسىن شەكتەگەن. مالىمەتكە سايكەس، پۋتين قورعالعان نىسانداردان جۇمىس ىستەۋ رەجيمىنە كوشكەن جانە ماسكەۋ وبلىسى مەن ۆالدايداعى رەزيدەنتسيالارىنا بارۋدى توقتاتقان.
پرەزيدەنتكە تىكەلەي قولجەتىمدىلىگى بار قىزمەتكەرلەرگە دە قوسىمشا شەكتەۋلەر ەنگىزىلگەن. ولارعا قاراپايىم تەلەفونداردى جانە قوعامدىق كولىكتى پايدالانۋعا تىيىم سالىنعان. سونىمەن قاتار اسپازدار، فوتوگرافتار مەن كۇزەت قىزمەتكەرلەرىنىڭ ۇيلەرىنە باقىلاۋ جۇيەلەرى ورناتىلعانى حابارلانادى.
ەسەپتە رەسەيدىڭ بۇرىنعى قورعانىس ءمينيسترى سەرگەي شويگۋ «تۇراقسىزدىقتىڭ ىقتيمال فاكتورى» رەتىندە اتالادى. 2026 جىلدىڭ ناۋرىزىندا ونىڭ بۇرىنعى ءبىرىنشى ورىنباسارى رۋسلان تساليكوۆتىڭ قاماۋعا الىنۋى «ەليتانىڭ بەيرەسمي قاۋىپسىزدىك كەپىلدىكتەرىن السىرەتتى» دەپ باعالانعان.
قۇجاتتا ەل ىشىندەگى شيەلەنىس قاۋپىنىڭ دە ارتقانى دا اتاپ وتىلەدى. كۇشتىك قۇرىلىمدار اراسىندا ءوزارا ايىپتاۋلار كوبەيىپ، ۋكراين ارنايى قىزمەتتەرىنىڭ شابۋىلدارىنان قورعانۋداعى ساتسىزدىكتەرگە بايلانىستى ىشكى قايشىلىقتار كۇشەيگەنى كورسەتىلگەن.
