قازاقستانداعى ۋران كەن ورنىن ساتىپ الۋدى قولداعانى ءۇشىن رەسەيلىك كومپانيا پۋتينگە العىس ايتتى

«روساتوم» كورپوراتسياسى قازاقستانداعى بۋدەنوۆسكوە ۋران كەن ورنىن ساتىپ الدى، دەپ حابارلايدى “ادىرنا” ءتىلشىسى. «روساتوم» كورپوراتسياسىنىڭ باسشىسى الەكسەي ليحاچەۆ رەسەي پرەزيدەنتى ۆلاديمير پۋتينگە قازاقستانداعى بۋدەنوۆسكوە كەن ورنىن ساتىپ الۋعا قولداۋ كورسەتكەنى ءۇشىن العىس ايتقان. بۇل تۋرالى كرەملدىڭ ءباسپاسوز قىزمەتى جازدى. كورپوراتسيا باسشىسى: «بىرىنشىدەن، قازاقستانداعى بۋدەنوۆسكوە كەن ورنىن ساتىپ الۋعا قولداۋ كورسەتكەنىڭىز ءۇشىن العىس ايتقىم كەلەدى»، - دەدى الەكسەي ليحاچەۆ كرەملدە پۋتينمەن كەزدەسۋىندە. سونىمەن قاتار «روساتوم» ۋران قورى بويىنشا ەكىنشى ورىنعا جىلجىپ، يادرولىق وتىن تسيكلىنىڭ بارلىق كەزەڭدەرىندە ۇزدىك ۇشتىككە كىرگەنى بەلگىلى بولدى. ليحاچەۆ بۋدەنوۆسكوە كەن ورنىن ساتىپ الۋعا قولداۋ كورسەتكەنى ءۇشىن رەسەي پرەزيدەنتىنە العىس ايتتى. 2022 جىلى الەمدە ۋران ءوندىرىسى التى پايىزعا ءوسىپ، 50,4 مىڭ توننانى قۇرادى. الەمدىك ءوندىرىستىڭ 85%-عا جۋىعىن قامتاماسىز ەتەتىن توعىز ءىرى كومپانيانىڭ ءبىرى - «روساتوم» مەملەكەتتىك كورپوراتسياسى. ەسكە سالايىق، 2023 جىلدىڭ كوكتەمىندە قازاقستاندىق ميلليونەر الەكساندر كلەبانوۆتىڭ ۇلى ياكوۆ پەن رەسەيلىك ميللياردەر ۆاسيلي انيسيموۆ بۋدەنوۆسكي كەنىشىندەگى ۇلەستەرىن «روساتومعا» ساتقانى بەلگىلى بولعان ەدى.