قازاقستاندىق سپورتشىلاردىڭ وليمپيادا، ازيا ويىندارى جانە باسقا دا حالىقارالىق جارىستارعا باراتىن دەلەگاتسيا قۇرامىن جاساقتاۋ ءتارتىبى وزگەردى، دەپ حابارلايدى "ادىرنا" ۇلتتىق پورتالى.
بۇل تۋرالى باس اۋديتور ءاليحان سمايىلوۆ ايتتى.
ەندى دەلەگاتسياداعى جاتتىقتىرۋشىلار، مەديتسينالىق ماماندار، شتاب قىزمەتكەرلەرى مەن رەسمي وكىلدەردىڭ سانى ارنايى نورماتيۆكە سايكەس ايقىندالادى. بۇل وزگەرىس توكيو وليمپياداسىنا بولىنگەن قاراجاتتىڭ ءتيىمدى جۇمسالۋىنا جۇرگىزىلگەن اۋديت ناتيجەسىندە ەنگىزىلدى. تەكسەرۋ بارىسىندا سپورت دەلەگاتسيالارىنىڭ قۇرامىن قالىپتاستىرۋدىڭ بىرىڭعاي ءتارتىبى بولماعانى انىقتالعان.
اتاپ ايتقاندا، ءبىر سپورتشىعا قانشا جاتتىقتىرۋشى، دارىگەر، ماسساجشى، پسيحولوگ نەمەسە باسقا دا مامان ىلەسۋى كەرەكتىگى ناقتى بەلگىلەنبەگەن. سونداي-اق دەلەگاتسيا قۇرامىنداعى شتاب قىزمەتكەرلەرى مەن رەسمي وكىلدەردىڭ ءىسساپار شىعىندارىن نەگىزدەۋدىڭ بىرىڭعاي ولشەمدەرى بولماعان.
وسىعان بايلانىستى باس اۋديتور ءاليحان سمايىلوۆ سپورت مينيسترلىگىنە حالىقارالىق جارىستارعا باراتىن دەلەگاتسيا قۇرامىن رەتتەيتىن نورماتيۆ ازىرلەۋدى تاپسىرعان.
ناتيجەسىندە سپورتشىلار سانىنا قاراي جاتتىقتىرۋشىلاردىڭ، كلينيكالىق-عىلىمي توپ ماماندارىنىڭ، شتاب قىزمەتكەرلەرى مەن رەسمي تۇلعالاردىڭ سانى بەلگىلەنەتىن تالاپ بەكىتىلدى.
جاڭا ءتارتىپ بويىنشا دەلەگاتسيا قۇرامىندا سپورتشىنىڭ دايىندىعى مەن دەنساۋلىعىنا تىكەلەي جاۋاپ بەرەتىن ماماندارعا باسىمدىق بەرىلەدى. نەگىزگى قۇرامعا جاتتىقتىرۋشىلار مەن مەديتسينالىق قىزمەتكەرلەر كىرەدى.
