Qazaqstandyq sportşylardyŋ Olimpiada, Aziia oiyndary jäne basqa da halyqaralyq jarystarǧa baratyn delegasiia qūramyn jasaqtau tärtıbı özgerdı, dep habarlaidy "Adyrna" ūlttyq portaly.
Būl turaly Bas auditor Älihan Smaiylov aitty.
Endı delegasiiadaǧy jattyqtyruşylar, medisinalyq mamandar, ştab qyzmetkerlerı men resmi ökılderdıŋ sany arnaiy normativke säikes aiqyndalady. Būl özgerıs Tokio olimpiadasyna bölıngen qarajattyŋ tiımdı jūmsaluyna jürgızılgen audit nätijesınde engızıldı. Tekseru barysynda sport delegasiialarynyŋ qūramyn qalyptastyrudyŋ bıryŋǧai tärtıbı bolmaǧany anyqtalǧan.
Atap aitqanda, bır sportşyǧa qanşa jattyqtyruşy, därıger, massajşy, psiholog nemese basqa da maman ılesuı kerektıgı naqty belgılenbegen. Sondai-aq delegasiia qūramyndaǧy ştab qyzmetkerlerı men resmi ökılderdıŋ ıssapar şyǧyndaryn negızdeudıŋ bıryŋǧai ölşemderı bolmaǧan.
Osyǧan bailanysty Bas auditor Älihan Smaiylov sport ministrlıgıne halyqaralyq jarystarǧa baratyn delegasiia qūramyn retteitın normativ äzırleudı tapsyrǧan.
Nätijesınde sportşylar sanyna qarai jattyqtyruşylardyŋ, klinikalyq-ǧylymi top mamandarynyŋ, ştab qyzmetkerlerı men resmi tūlǧalardyŋ sany belgılenetın talap bekıtıldı.
Jaŋa tärtıp boiynşa delegasiia qūramynda sportşynyŋ daiyndyǧy men densaulyǧyna tıkelei jauap beretın mamandarǧa basymdyq berıledı. Negızgı qūramǧa jattyqtyruşylar men medisinalyq qyzmetkerler kıredı.
