Qazaqstan Palestınaǵa qosymsha gýmanıtarlyq kómek jiberedi, - dep habarlaıdy "Adyrna" portaly úkimettiń baspasóz qyzmetine silteme jasap.
"Memleket basshysy Qasym-Jomart Toqaevtyń tapsyrmasyna sáıkes Qazaqstan Palestınaǵa qosymsha gýmanıtarlyq kómek kórsetedi. Bul másele QR Premer-Mınıstriniń birinshi orynbasary Roman Sklıardyń tóraǵalyǵymen ótken úkimettik komıssııanyń otyrysynda talqylandy", - dep habarlaıdy úkimet baspasózi.
Gýmanıtarlyq kómekke salmaǵy 38 tonnadan asatyn azyq-túlik, tósek-oryn jabdyqtary, dári-dármek jáne medıınalyq buıymdar kiredi.
"Júk jaqyn arada áýe arqyly jóneltiledi. Qazaqstannyń qoldaýy Gaza sektoryndaǵy apatty gýmanıtarlyq jaǵdaıǵa baılanysty Palestınaǵa kómektesýge baǵyttalǵan", - delingen úkimettiń baspasóz qyzmeti taratqan habarlamada.
Buǵan deıin Qazaqstan Palestına halqyna bir mıllıon dollar kóleminde gýmanıtarlyq kómek kórsetken. Syrtqy ister mınıstrligi Qazaqstan úkimeti Palestına halqy úshin bólgen qarajat BUU-nyń Taıaý Shyǵys jónindegi agenttiginiń esepshotyna aýdarylǵanyn habarlady.
Qarasha aıynyń basynda Qasym-Jomart Toqaev Palestına halqyna gýmanıtarlyq kómek kórsetý týraly sheshimin jarııalady.
"Soltústikte Reseı men Ýkraına, Taıaý Shyǵysta - Izraıl men Palestına arasyndaǵy qaqtyǵys jalǵasýda. Aýǵanstandaǵy turaqsyzdyq jalǵasýda. Batysta zańsyz kóshi-qon máselesi ýshyǵyp barady. Búginde Gaza sektoryndaǵy beıbit turǵyndar, ásirese balalar ádiletsiz japa shegýde. Qart adamdar qaqtyǵystyń qurbanyna aınalýda. Olardyń qaýipsizdigin qamtamasyz etý basty mindet. Osyǵan baılanysty men Palestına halqyna 1 mıllıon dollar kóleminde gýmanıtarlyq kómek kórsetý týraly sheshim qabyldadym», - dedi Toqaev.
Eske salaıyq, 7 qazan kúni tańerteń Izraıl Gaza sektorynan jappaı zymyrandyq shabýylǵa ushyraǵanyn habarlaǵan bolatyn. Palestınalyq Hamas qozǵalysynyń ondaǵan jaýyngeri eldiń shekaralas aımaqtaryna kirdi. Izraıl resmı túrde soǵys jaǵdaıyn jarııalady.
26 qazanda Hamas Izraıldiń Gaza sektoryn basyp alǵanyn habarlady. 28 qazanda Izraıl Gaza sektorynda «soǵystyń jańa kezeńine» ótkenin jarııalady.
Kelisim sharttaryna sáıkes, ótken jumadan bastap kún saıyn Hamas 13 ızraıldik kepilge alynǵan áıelder men balalardy, al Izraıl 39 palestınalyq tutqyndy, onyń ishinde áıelder men 19 jasqa tolmaǵan jastardy túrmelerinen bosatqandaryn aıtty.
