شىمكەنتتەگى وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنىڭ دەلەگاتسياسى تۇركيا رەسپۋبليكاسىنا ارنايى ىسساپارمەن باردى. ساپاردىڭ نەگىزگى ماقساتى – بيىل العاشقى تالاپكەرلەرىن قابىلداعان گازي ۋنيۆەرسيتەتى فيليالىنىڭ جۇمىسىن جانداندىرۋ جانە عىلىمي-ءبىلىم بەرۋ باعىتىنداعى ىنتىماقتاستىقتى كەڭەيتۋ.
قازاقستاندىق دەلەگاتسيانى ۋنيۆەرسيتەتتىڭ باسقارما توراعاسى – رەكتورى قايرات بالابيەۆ باستاپ باردى. قۇرامدا رەكتور كەڭەسشىسى مۇقاش ەسكەندىروۆ پەن عىلىمي جۇمىستار جانە يننوۆاتسيالار جونىندەگى پرورەكتور ەرجان كەرىمبەكوۆ بولدى.
ءىسساپار بارىسىندا دەلەگاتسيا گازي ۋنيۆەرسيتەتىنىڭ رەكتورى، پروفەسسور ۋگۋر ۋنالمەن كەزدەستى. كەزدەسۋدە ەكى جوعارى وقۋ ورنى اراسىنداعى سەرىكتەستىكتى ودان ءارى دامىتۋ ماسەلەلەرى تالقىلاندى.
تاراپتار گازي ۋنيۆەرسيتەتى فيليالىنىڭ قىزمەتىن حالىقارالىق اكادەميالىق ءبىلىم بەرۋ ستاندارتتارىنا سايكەستەندىرۋ ماسەلەسىنە توقتالدى. سونىمەن قاتار عىلىمي-زەرتتەۋ باعىتىنداعى بىرلەسكەن جۇمىستاردى كۇشەيتۋگە باسىمدىق بەرىلدى.
كەزدەسۋ قورىتىندىسىندا ورتاق عىلىمي جوبالاردى ازىرلەۋ جانە جۇزەگە اسىرۋ، پروفەسسور-وقىتۋشىلار قۇرامىن زەرتتەۋ جۇمىستارىنا تارتۋ جونىندە كەلىسىمدەر جاسالدى. سونداي-اق دوكتورانتۋرا باعىتىنداعى اكادەميالىق بايلانىستاردى دامىتۋ ماسەلەسى قاراستىرىلدى.
ءىسساپار اياسىندا قازاقستاندىق دەلەگاتسيا گازي، انكارا جانە تاياۋ شىعىس تەحنيكالىق ۋنيۆەرسيتەتتەرىنىڭ بىرلەسكەن عىلىمي-زەرتتەۋ ورتالىعى – NÖROM قىزمەتىمەن تانىستى. ورتالىق نەيروعىلىم جانە نەيروتەحنولوگيا سالالارىندا ىرگەلى ءارى قولدانبالى زەرتتەۋلەر جۇرگىزۋگە باعىتتالعان.
دەلەگاتسيا ورتالىقتىڭ قۇرىلىمى مەن باسقارۋ جۇيەسىن زەردەلەدى. سونىمەن قاتار عىلىمي زەرتحانالاردىڭ جۇمىسى، زەرتتەۋ جوبالارىن ۇيىمداستىرۋ تەتىكتەرى جانە ۋنيۆەرسيتەتتەر اراسىنداعى عىلىمي كووپەراتسيا تاجىريبەسىمەن تانىستى.
تۇركيالىق ارىپتەستەردىڭ تاجىريبەسى وزبەكالى جانىبەكوۆ اتىنداعى وقپۋ بازاسىندا زاماناۋي عىلىمي-زەرتتەۋ حابىن قۇرۋ يدەياسىن جۇزەگە اسىرۋعا نەگىز بولماق. مۇنداي ورتالىق ۋنيۆەرسيتەتتەر مەن عىلىمي ۇيىمداردىڭ عىلىمي الەۋەتىن بىرىكتىرۋگە مۇمكىندىك بەرەدى.
ساپار بارىسىندا بىرلەسكەن زەرتحانالار قۇرۋ، حالىقارالىق عىلىمي جوبالارعا قاتىسۋ، دوكتورانتتاردى دايارلاۋ جانە جاس عالىمداردىڭ زەرتتەۋ الەۋەتىن ارتتىرۋ ماسەلەلەرى دە تالقىلاندى.
تاراپتار ءبىلىم بەرۋ سالاسىنداعى سەرىكتەستىكتى عىلىمي-زەرتتەۋ باعىتتارىمەن ۇشتاستىرۋعا نيەتتى. الداعى ۋاقىتتا حالىقارالىق دەڭگەيدەگى بىرلەسكەن جوبالاردى جۇزەگە اسىرۋ جانە ەكى ەل عالىمدارىنىڭ بايلانىسىن نىعايتۋ باعىتىنداعى جۇمىستار جالعاسپاق.
